因為ex，我決定向全世界嘅女人報仇: 巧遇熟人
今日就係約左Rachel嗰一日，突然間好期待放工見到佢。好好奇佢係唔係真係好似相咁樣，究竟佢係高定矮呢？夜晚約左人嘅話，返工都會精神啲，想嗱嗱臨做晒啲嘢準時走，我依家就係呢種心情。
「我今晚應該可以準時～」我放lunch嘅時候wtsapp Rachel 講。
「好啊，我都係準時六點走」佢覆我。
「冇人睇獸醫咩？咁得閒覆我嘅～」
「放Lunch呀傻仔！」
「哇！問下姐～洗唔洗咁串！」
「Haha，鬼叫你蠢～」佢話。
「係呀係呀最叻係你啦」
「緊係～」
「唔同你講啦，傾多兩句都爆血管..」我話。
「哈哈～今晚見啦傻仔」
「好啦～今晚見」
我係餐廳入面打完呢句之後，坐對面個肥仔就望住我。
「望乜鳩呀..」我話。
「望你含春咁撚樣」肥仔話。
「含你個食人頭，嗱嗱臨飲埋杯凍檸茶走啦」我話。
「喂，唔係喎呀文，你拍拖啦咩又？」另一個同事Steven講。
「冇呀邊有咁多拖拍」
「收皮啦，你岩岩含哂春咁，我都冇拍過拖都知你溝緊女啦！」肥仔話。
「今次真係唔係，純粹fd炸～」我話。
「有邊一段關係唔係由朋友開始？」肥仔話。err....真係可以唔係由朋友開始。
「屌你啦，唔係都比你屈到變係」
「唔通係你玩交友App識嘅？」Steven話，佢地完全冇諗過聽我解釋。
「...我都廢鳩時彩你地，埋單啦」我唔認係因為我真係冇諗過溝Rachel，純粹同佢傾計好開心。
「Bingo～」肥仔同Steven一齊講，然後high five左下。
「你地兩個幾時咁Gay..」
放工之後我直接搭車去旺角，然後Rachel同我講佢已經係旺角等緊我。我約左佢係E出口等，因為一陣係創興嗰頭食。
「我驚我認唔出你喎～你今日着咩色衫？」我wtsapp佢。
「頂你啦，咪同相一樣樣！」
「..我都係堅信自己嘅七折理念」我話。
「我着白色衫，格仔短裙」佢話。
係月台搭緊扶手電梯上去嘅時候我都有啲緊張，話晒第一次約佢出嚟，同埋之前都冇試過用呢種方法識女仔。我慢慢行過去E出口，收工時間嘅旺角站好多人，所以我嘅視線不斷係度搵緊一個着白色衫嘅女仔。唔通係佢..？我遠處見到一個着白色衫嘅女仔....但係比前面條友遮住左，睇唔到係咪格仔裙...。但個樣...屌.....同相咁大出入嘅！？直頭兩個人...！我差唔多行到過去嘅時候，我即刻將隻眼Focus望佢條裙！..好彩唔係格仔短裙。係我鬆一口氣嘅時候，無啦啦有人拍我膊頭。因為啱啱經歷完啲咁刺激嘅嘢，搞到我嚇一嚇，然後即刻擰轉頭望係邊個。
佢梳齊陰，深啡色直頭髮，髮尾去到心口位。隻眼唔算大、雙眼皮，眼睫毛長。塊面有少少Baby fat，但算係可愛嗰種。佢化咗少少妝，搽咗淺紅色胭脂同唇膏。佢帶咗一條銀色嘅心形頸鏈，而佢高度就矮我半個頭左右。白色衫，格仔短裙.....就係你？Rachel..？
「喂！傻仔！」佢笑住講。佢笑係會有笑眼，隻眼彎好似月亮咁。
「Rachel...？」我問。
「係呀，唔通呀婷呀！」佢抽我水之後即刻覺得幻滅左岩岩嘅美好形象...但佢..真係幾可愛。
「頂你啦！你最好係呀婷」
「哇，你都好嘢呀！係一個女仔面前拎佢嚟同另一個女仔比較！」佢話。
「講笑姐....但你又認得我嘅？明明我啲相都冇正面」
「冇呀，個Feel似囉。你成個傻仔咁周圍望，仲行緊去一個著白衫嘅女仔前面嘅時候，我就知道係你～」
「頂，好柒呀...鬼叫你企到咁入，點睇喎！」
「咩呀！我岩岩去七仔買嘢飲炸！」佢話。
「係係係～咁你想唔想行下呀？襯仲未夠鐘食」
「好呀，行朗豪坊？」雖然我已經行過1,000,000次朗豪坊，但係喺旺角，有時真係冇得簡。
「可以呀」
我一嚟就帶左佢去超長扶手樓梯嗰層，然後準備上扶手電梯。
「邊有人直接上嚟嫁！」佢話。
「下，邊有人唔係直接上嚟嫁！識行朗豪坊一定係由上而下咁行～」
「緊係由下而上啦！咁你本身都要上去，點解唔由下面開始行～」
「一嚟就直接上最頂，然後慢慢行樓梯逐層逐層落嚟，咁先係情趣！你都唔識嘅～」我話。
「哇！邊個要同你有情趣！」佢笑一笑。
然後我地上左扶手電梯，成條電梯都係啲情侶係度錫。咁我都明嘅...半年前我都係佢地嘅一分子......係冇諗過半年後會同一個係交友App識嘅女仔出嚟去朗豪坊。其實個情景有少少尷尬....因為佢企係我上面一格，以我地嘅高度相差，如果佢另轉面，我個嘴就同佢個嘴好近。但我見Rachel冇另過嚟，我都冇咁尷尬。我地慢慢由上面行落嚟，沿途都傾下啲無聊嘢、返工嘢咁。
「差唔多啦喎」我話。
「行啦，過到佢岩岩好」
我地由朗豪坊行左去創興廣場，記得以前多人嘅時候，創興樓下會排晒隊等𨋢上去。但今日唔係星期五，所以就冇咁誇張。呢幢嘢上面大部分都係雞煲、打邊爐、放題...間唔中都好多人上去食。我地入左𨋢上去，上到去一打開𨋢門......
屌那星...........我見到Sophia同呀明。
我個心好似有少少抖唔到氣咁..
我以為自己放低左你
但點解會有呢種窒息感