因為ex，我決定向全世界嘅女人報仇: 於心有愧
食完飯之後Nicole就要返去，我本身諗住車佢返去 ，但醒起佢自己揸左車嚟。
「下次見面會係幾時？」我隨口一問。
「唔知嫁～你好想見我咩」
「你明知故問..」
「我就係想聽你答」佢話。
「...好想見到你..同你一齊好開心」
「哈哈～你係咪表緊白，傻仔」
「邊度算係表白喎..」我講完佢又錫左我一啖。我發現佢好鍾意無啦啦錫我。
「同你一齊，我都好開心」佢笑住講。
「咁..」
「乖啦，好冇？」佢打斷左我講嘢。
「...嗯..」咁我都唔繼續問落去了。
佢上左車，打開左車窗。
「呀文」佢望住車窗出面嘅我講。
「嗯？」
「我都鍾意你呀！」佢講完就即刻開走左...淨低我係原地呆左咁企係度。就算我都估到佢對我有好感，但係當我親口聽嘅時候，個心都係好唔爭氣咁跳快左一陣。我笑一笑，而後自己返上樓。
我打開wtsapp send左個心心嘅Emoji比Nicole。然後打開Telegram，搵Rachel。
「得閒？」我問佢。
「得呀～」佢隔左幾分鐘之後先覆我。
我直接打左比佢。
「喂？」
「哇，你識得打比得啦咩！」Rachel不滿嘅聲音係耳仔邊傳出嚟。
「咩呀，隔左一日姐～」
「咁你都覆下Message呀嘛～問你最後點又唔覆我！」佢話。我睇一睇，係喎..我冇覆到佢。
「Haha sor囉，冇睇到」
「有異性冇人性啦死仔！睇你嗰樣，得左米？」
「....算係又唔算係啦...」我話。
「咁姐係點？」
「見到面再同你講！」
「車，好啦，我後日可以」佢講。
「好啦咁就後日，你係咪仲未諗到食咩？」
「未呀..你想呢？」
「想唔想打邊爐？我有少少想打」我話。
「好呀！！我都好耐冇打邊爐啦～」佢好興奮咁講。
「咁你想係邊度食？旺角？就返你放工好快到」
「可以呀～」佢答。
「咁我聽日睇下食邊間再Book先！」
「好呀！嗰日我放六，你book 七點打後都得～」
「我預八點？我驚我OT...近排全公司都好忙，我琴日仲要請左日假，差啲比老細照肺..」我話。
「都得呀～」
「好！就咁話！」
「你好似真係好想見我喎！哈哈」
「又唔係真係好想喎～你諗多左啦！」我笑住講。
「扮哂嘢，明明就好想見我！係咪！！係咪！」
「係呀係呀，直頭係 想見你只想見你 未來過去 我只想見你～」我唱左出嚟比佢聽，係一首台劇嘅主題曲。
「咦！！你又有睇 想見你？」佢問。
「有呀..當初嗰個都話呢套劇好好睇，所以我咪睇左～」
「王詮勝超靚仔！！勁Charm囉！！仲要又暖男又型」佢一講起套台劇嘅男主角嘅時候就好似個小fans。同好多睇過呢套劇嘅女仔一樣，佢地都好迷男主。
「哈哈，你係我聽過第一百個女仔咁講佢」我誇張咁講。
「我話你知，佢簡直就係好男友嘅典範！」
「有冇咁誇張..」
「冇誇張..！啲男人做到佢一半都好好了」佢話。我突然之間諗起套劇。如果你冇睇過嘅話，簡單啲嚟講就係男女主角會互相穿越係2019同1998年之間。然後男主角無論係邊個時空都好愛女主角。對我嚟講，呢套劇係真係好睇嘅，而且有啲啟發性。我諗起Sophia，Nicole..佢地。如果我係男主角，我又係咪真係咁愛佢地到會係另一個時空都再重新認識佢地，再追佢地。我覺得我未必....咁其實我究竟幾時有真係好愛一個人..有嘅..我愛我自己嘅時候。
「喂？做咩又發呆呀..？我令你諗返起你ex..？」佢問。
「唔係呀～冇事～我諗返啲劇情姐～」之後我地講多左幾句就收左線。我開左Wtsapp，見到Nicole藍Tick左我嘅Emoji冇覆到。唉..我只可以等佢主動搵我..我攤咗喺床上面，個腦又開始諗嘢。
如果我係1998年嘅男主角，我去到2019年，可能已經鍾意左第二個..而唔會好似男主角咁一直係女主角身邊咁多年。呀婷...我諗起佢。佢一直係我身邊咁多年....原來佢咁愛我..我從來都冇諗過佢對我有幾咁鍾意，但而家借住呢套劇，我終於睇到、終於感受到佢對我嘅愛。佢既然block哂我嘅嘢，我決定用最原始嘅方法去搵佢。我起左身，拎左張紙，拎起支筆：
「陳綺婷：
多謝你一路以嚟對我咁好，我知我冇資格講啲咩，但係我都想你睇哂呢封信。
我想講對唔住先，我以前一直都唔知道你嘅心意，直到近排我先敢去面對。我一直都係一個好怕事嘅男仔，好怕麻煩。曾經有諗過你會唔會係鍾意我，但係又唔想向呢方面諗，因為我怕我會唔知點樣面對你，所以我先自以為一直做朋友會係最好。我而家先發現我錯了，如果當初早啲同你講清楚，或者我地嘅結局唔會係咁，亦都唔會浪費左你咁多年嘅青春。我討厭自己，討厭自己懦弱、討厭自己自大、更加討厭自己自私。我唔奢求可以做返你朋友，更加唔會奢求你原諒我，我只係希望你唔好因為我而對愛情失去信心。第二樣對唔住你嘅嘢係嗰一晚，我知我做咩都補償唔到你，但係我都想為我嘅衝動而道歉。
我諗起初初識你嗰陣嘅情景，當時你好內向，又呆呆地咁，所以令我好想了解你多啲。後來我同你做左好朋友，發掘多左好多你嘅優點。你好善良，以前我哋成日唔上朝早堂叫你幫手點名，你冇一次會拒絕我地，仲要你係我哋咁多個入面住得最遠嗰個。你好善解人意，你成日都知道我想要啲咩，成日都會就我。你好堅強，就算人地點樣睇你都好，你都好堅持做自己鍾意做嘅事。所以，我知道你今次一定都可以好堅強。
最後，衷心祝福你搵到一個全心全意愛你嘅男人。
呀文」
良心有愧 原來隨便錯手
可毀了人一世
立志助世人脫貧以為
便偉大到像多麼有為
這種剌蝟 連誰曾待我好
都可帶來傷勢
被我害過來接受我跪
是我在製造眼淚居然想救世