因為ex，我決定向全世界嘅女人報仇: 再一日甜蜜的下午

第二朝我地check out左之後佢同我一齊上我屋企。因為琴晚太夜先訓，所以返左上去之後我地再訓多左陣，起身已經中午四點幾。
「肚唔肚餓呀？」我問佢。
「餓死啦！全日一餐都冇食！」
「你煮個麵比你食？」
「你得唔得嫁～？」佢笑住問。
「err...正常囉～哈哈，唔會食死嘅」我話。
「你雪櫃有咩料？我去睇下先～」
「你望一望，好似有啲蛋仲有啲午餐肉」
「哇你個雪櫃咁空嘅！你好少煮嘢食嫁？」佢問。
「咁...一個男人住嘛，邊會咁得閒整嘢食，哈哈」


「睇下先....有蛋...有啲牛丸...午餐肉。好啦！我煮啦，你坐係到等就得啦～」佢話。
「真係咩？我嚟啦，話哂你係客」
「咁客氣做咩，我同你好唔熟咩～仲分客人主人」佢話。我諗諗下，我同你真係唔算得上係熟...我都想我地係好熟..
「哈哈咁好啦..！」我話。
「你落去買啲嘢飲？」
「你想飲咩呀？」
「我想飲啲甜嘢～」佢答我。
「咁我求奇買嫁啦」
「好～你返嚟有得食嫁啦！」
「係～」我發現Nicole今朝起身之後好似冇哂唔開心嘅感覺，變返當初第一次係Bar飲酒嘅嗰個佢。琴晚嗰種距離感好似少左好多，而家嘅我地又好似拍緊拖咁。我落去買嘢飲，佢係度煮嘢食...



我求奇買左幾罐汽水又買左啲果汁檸檬茶上去，一開門就聞到好香嘅麵同午餐肉味。
「哇！你開Party呀？哈哈，買咁多嘅」佢話。
「哈哈..我唔知你想飲咩嘛，咁咪咩都買啲，反正全部都係甜嘅！汽水呀、果汁呀、檸檬茶都有！咁你就可以簡啦～」
「哈哈傻仔～好sweet呀」佢笑得好甜。
「係咩..哈哈，對住你呀嘛」我講完之後佢埋嚟錫左我一啖。
「傻仔....，快啲食嘢啦，唔食凍哂啦！要試下我啲手勢！」
「好呀～」我拎起筷子，臨食之前都覺得淥個麵姐，唔洗啲咩技巧掛～邊有分好唔好食。我夾起啲麵，吹一吹，放左入個口度。哇...點解同我平時煮嘅唔同..！啲麵唔會太硬又唔會太淋，湯唔會太多好淡但又唔會太濃。蛋係岩岩好半熟，入面仲有少少流心。午餐肉先係不得了，佢煎到兩邊都好香，但又介乎未燶同燶之間...
「哇好好味！」我話。
「真係！？你識欣賞就好～」佢笑得好甜好開心。


「係呀！啲蛋煮到入面流心我勁鍾意...！」
「哈哈咁就好！我仲驚你唔鍾意食生生地嘅蛋」
「你都快啲食啲呀～餓死你啦..！」我話。
「好～」
「你煮嘢咁叻嘅？平時有煮開嫁？」我問佢。
「有呀..平時無聊就會自己煮下嘢食，反正都冇嘢做」
「哦..～平時可以多啲上嚟煮嘢食喎～材料我包！」我想留住佢。
「哈哈，明明就想我做你廚師！你諗多左啦～」
「咁，你煮嘢食咁好食～唔好哂左佢～我係比個地方你發揮你嘅才華..～」我笑住話。
「你好鍾意食我煮嘅嘢咩？」
「好鍾意，超鍾意」
「哈哈，好，我有機會就上嚟煮比你食」
「好呀！隨時歡迎～當係你自己屋企都得！」我話。
「咁你配埋條鎖匙比我，我間唔中上嚟用廚房」
「好呀！我聽日就去配！」


「講笑炸！睇你開心到～遲下再算啦」佢笑一笑，搞到我開心左下，但都算係個好開始..雖然唔知佢隔幾耐先會再，至少佢會肯繼續見我。
「好～想唔想睇戲呀，食飽飯」
「好呀！等我仲諗緊點打發啲時間」佢話。
「好，你想睇咩？我上Netflix 睇下有咩好睇先...」
「你拎部notebook 過嚟啦～」佢坐左係我張床上面，拍一拍張床，示意我坐過去。
「好～等我連埋個喇叭先～」
「嗯～」我一坐左上床佢就挨住我膊頭，一齊睇住個Mon。
「呢套好冇？」我簡左套外國嘅愛情片。
「可以呀，我未睇過～」

我地挨住個枕頭，個身痴埋一齊睇戲。Nicole係一個好感性嘅人，佢係嗰種好投入齣戲嘅女仔。去到一啲感動位，佢間唔中都會眼濕濕咁..，我都會攬住佢條腰，輕輕掃佢個頭安慰佢。套戲去到尾段，有一幕係男女主角係大雨下面濕吻。睇到嗰度，我望一望Nicole，發現佢都望緊我。唔知點解每次同佢對望我都好有feel...，我忍唔住錫落佢度，佢都有回應我。套戲仲播緊但係我地已經冇心再睇，然後好順理成章咁我地又做愛。今次做唔係好似琴晚咁激情，而個感覺算係似情侶之間好sweet嘅feel。完事一次後我地再做，直至我地都好攰..兩個人訓左係床上面休息。

「呀文」Nicole問我。
「嗯？」
「如果我做你女朋友，你會唔會好開心」佢話。


「下..？」
「你係咪鍾意我」
「...做咩無啦啦咁問」我話。
「你答我先啦」
「我鍾意你」
「真係？但係我見過你兩次炸喎」佢話。
「我都唔知..解釋唔到，但我冇辦法呃自己我唔係鍾意你..」
「傻仔...」佢又錫左我一啖。
「咁..你會做我女朋友？」我問完佢冇答我，然後又錫左我一啖。
「好啦，我地換衫落去食飯？」佢問我。
「嗯..行啦」...

明明我知道你都鍾意我
究竟你收埋左啲咩秘密