因為ex，我決定向全世界嘅女人報仇: 開心果

之後大部份嘅夜晚，只要佢得閒，我都會同Rachel傾電話。當有一個女仔長期同你傾住，好快你就會好似有個寄託，慢慢唔記得左其他嘢。雖然我地話就話差唔多日日都傾電話，但我地都冇講啲好曖昧嘅嘢。唔係因為我對佢冇好感，而係因為呀婷之後，我好驚又會冇左一個成日聽我講心事嘅人，或者呢樣算係呀婷教識我嘅...？再加上我一直習慣左有一個同我講心事嘅異性..以前係呀婷，而家係Rachel。

「你呀..又搞到我琴晚咁夜先訓..！」我一打過去佢就咁講。
「咩呀！明明就係你講你朋友隻哥基講左幾個鐘，哈哈～」
「我講左一陣炸...邊度有幾個鐘喎..」佢語氣好似做錯事嘅小妹妹咁，我而家慢慢當左佢係我呀妹咁。我記得我曾經同Sophia講過，我想有個呀妹。
「有呀～你由一點開始就話隻哥基好肥，一直講到四點都仲講緊佢肥，哈哈」
「咁..佢真係好肥嘛！冇見佢一排差啲抱唔起佢啦！」
「哈哈，你真係好鍾意小動物～」我話。
「係呀～喂也！你做咩轉移話題！我唔理呀..今晚最多傾到一點就要訓啦」佢話，點解呢句有少少似女朋友同男朋友講嘢嘅感覺。
「係係係～最好你真係一點訓～」我笑住話。


「好呀！今次我一到一點就cut你線，睇你仲會唔會咁得戚！」
「OKOK我錯...，但早啲訓都好嘅，今日開會差啲釣魚。」
「你釣魚人地仲唔炒左你～到時你租都交唔起～哈哈」佢話。
「哇你咁咒我嘅！你唔係好有愛心嫁咩護士姐姐～」
「對住你就即刻冇哂愛心嚕～」佢笑一笑。
「....咁大個仔以嚟，第一次覺得比啲動物羸左我」
「哈哈～如果動物識講嘢，可能我會單身一世」
「哇～咁癲？咁如果你識個男仔好唔鍾意小動物，你會唔會鍾意佢？」我問。
「一定唔會！因為佢唔會了解到我嘅世界，我諗我地嘅價值觀都會好唔同」
「都係嘅，點都要有啲共同興趣會好啲」我話。



我地咩都傾一餐，佢返工嘅趣事我會有興趣聽，我同佢講公司個肥仔啲笑料佢都會同我一齊笑。我地好似有無窮無盡嘅話題，每次打比佢都會傾得好開心同好放鬆。可能因為我同佢講哂我嘅秘密，對住佢我唔會再緊張講錯嘢，唔會怕有啲嘢唔比佢知得，更加唔會收埋自己嘅心事。「喂我同你講呀，我老細真係好on9，明明唔係我跟開嘅嘢，佢硬係鍾意鬧左我先」、「我想講呢，今日係地鐵有條友勁搞笑..佢...」、「我琴日返左屋企食，呀媽煮左勁多嘢....」、「點算呀..我琴晚又唔小心諗起Nicole」。

記得我以前同呀婷都會講呢啲話題，但係呀婷同Rachel係兩個唔同嘅feel。雖然佢地兩個心地都好好，但係Rachel比我感覺更加開朗同樂觀。有時我同呀婷講其他女仔嘅時候，佢都會好似有少少唔開心咁。以前我曾經以為佢係登我唔開心，我而家諗返起先知係因為佢呷醋。而家我同Rachel講起其他女仔嘅時候，佢都係好體諒我咁比啲意見我。如果有唔開心嘅時候同呀婷講，佢多數會陪我唔開心，或者陪我飲酒。但係Rachel係會講啲無聊嘢氹我開心，或者講啲古零精怪嘅嘢令我分心。我好自然咁拎左Rachel同呀婷去做比較...雖然好似唔係幾好..但係我心入面，Rachel係比起呀婷更加好。即使我地未見過面，甚至乎只係傾左一排，佢比我嘅感覺係好似會好了解我諗咩咁。再加上Rachel長期都好似好有活力咁，係一個好正面嘅開心果。同佢傾親計，就算我發生左啲唔開心嘅事，傾完都係會開心返哂。

「係呢，你有冇諗過要見我？」我有一次問佢。
「ummm，都有諗過嘅，但係見唔見都得呀～」
「你唔會好奇我係咩樣咩？我啲相全部都係側面同背面」我問。
「你係咩樣都唔緊要呀～我冇咩特別好奇」
「咁～如果我約你見面食餐飯呢？」


「你真係好想見？如果我真人好樣衰呢？」佢答我。
「冇所謂呀，反正就當識個朋友食一餐飯～唔洗睇樣嫁～哈哈」
「明明就唔係！如果一開始我icon係好樣衰好肥呢，你仲會唔會同我傾～？」
「好啦..我誠實答你，唔會...」我決定誠實。
「咪係囉～個個男仔都係睇樣嫁啦～」
「咁...都冇計嘅，人就係咁現實」
「係嘅～所以我都冇話啲咩呀，反正我對自己都幾有信心！」
「哈哈係咩，有自信係好事嚟！」我話。
「緊係！我讀Ｕ嘅時候不知幾多人追！」佢講。
「叻啦叻啦！但我預左打七折～」
「咩叫打七折？？」佢真心問。
「唔通講緊陳柏宇首歌咩！緊係講緊你啲相同真人！張相打個七折就係差唔多係真人啦！」我笑住講。
「妖！七你個死人頭，姐係你話我P圖啦！」佢扮嬲。
「我冇講呀！你自己講炸～哈哈！有時攞下角度都可以好唔同」
「食屎啦！我啲Fd個個話我真人靚過上鏡！」


「係至好～咁你想唔想食呀？」我問。
「都可以嘅，但要等一排先」
「點解嘅？」
「唔話你知喎！」佢話。
「哦。」

然後，我開始期待同佢見面
唔係因為想溝佢，只係因為新鮮感同好奇心