因為ex，我決定向全世界嘅女人報仇: 傾訴對象
「你真係想聽？聽完可能你會對我改觀」我話。
「想呀，就當了解你多啲～」Rachel 話。
「我夜晚再同你講？因為有排講..我而家做一做嘢先」
「可以呀～我今日全日都得閒。你星期六都要做嘢咁慘嘅..」
「係呀，趕緊大project，冇計。我再搵你呀～」
「好～」
到夜晚，我地又講返感情問題。
「我覺得自己變到好差..」
「點解咁講呀..？」佢問。
「我上次咪話我分左手冇耐嘅..」
「你識左第二個？」
「唔只..我仲...唉」之後我將所有嘢一五一十咁講哂比佢聽。當時我諗，如果佢聽完會對我改觀而唔再同我傾嘅，我大不了搵過個人傾。雖然Rachel 係個幾好嘅聆聽者，冇得同佢傾會好可惜。
「呀婷真係好慘..」Rachel 話。
「我到而家都好內疚...好後悔自己咁做。但你覺得我應唔應該搵返佢..」
「我覺得唔好啦..佢既然刻意避開你，就證明係佢主動搵返你之前都唔想你搵佢。我諗..佢要咁做都要鼓起好大嘅勇氣」佢答我。
「你係咪覺得我好賤，如果係嘅我都唔介意」
「你係衰啲嘅..但係始終有苦衷嘅，我都明白」
「你真係冇覺得我好賤咩..？」我再問。
「好多男人都係咁嫁啦，我都見唔少。往往一次分手就可以改變一個男人嘅愛情觀，但明明咁樣對佢以後識到嘅女仔好唔公平」Rachel話。我冇諗過佢講啲咁成熟嘅嘢，佢一直以來都好似比到妹妹嘅感覺我。可能係因為佢個樣睇落比較細，我下意識當左佢係細我幾年。
「係嘅..你講得岩」
「冇過冇嘢喎，我反而開心你會同我講～」佢話。
「多謝你先...」
「傻啦小事。」
之後我地一路傾，我講完呀婷就諗住講Nicole，但我地已經講到就嚟天光都未訓，然後我發現佢好似訓著左冇覆我。係喎..Nicole你而家過成點..我將部手機放埋一邊然後合埋眼.....我突然間有啲掛住佢..係掛到訓唔著嗰種，因為佢真係有種吸引力令我沉沉地。我回想緊一幕又一幕同佢一齊嘅畫面，我地出街嗰陣真係好似情侶...但係點解佢咁耐都冇搵返我，係咪純粹攞我嚟攝時間....諗下諗下我訓著左。
你心目中，究竟當我地係咩關係
第二朝起身我忽然有個念頭，我想試下搵到Nicole個IG，然後如果我搵到之後禁follow佢，佢會唔會accept我呢..？我打開IG，禁去Search嗰度，見到search history 有呀婷個IG...唉..呀婷..，佢連道歉嘅機會都唔比我..。我發左陣呆之後就開始試下搵Nicole嘅IG，既然佢識賢狗，會唔會可以喺佢度搵到Nicole呢？我開始由賢狗嗰七百幾個Follower度搵，我嘗試search唔同Key words... “Nic “, “Nicole”, ....，冇個似。然後我再搵佢嗰五百個Following...屌..又冇。我見今日星期日，我又冇咩嘢做，我決定逐個逐個搵。男人有時為左女仔，真係會勤力過返工，但我最後都係搵唔到。如果問賢狗，佢一定會話我沉左船..我唔想比佢覺得我係，所以都係算...
中午Rachel醒嘅時候我地都有講幾句，但就冇繼續返琴晚嘅話題，可能係日光日白冇feel傾心事。去到夜晚我講返起，佢又繼續做我嘅樹窿。今次，我做左嗰進取嘅行為。
「不如我打比你講？我唔想打字傾..」我問佢。
「errrrr.....都....可以嘅」
「咁你電話係...？」我問。
「唔好用電話啦..，一係你add我telegram」
「都得！」
「我tg係racheltszying」佢話。佢講完我即刻去tg search佢個名再Add佢。
「我add左你啦，你睇下有冇。Btw你叫子盈？」
「係紫凝！見到啦～咁..你打比我..？」佢話。
「Haha，你個名好好聽！咁我而家打啦」然後我去tg打比佢，突然間好緊張，話哂同佢傾左咁耐都冇聽過佢把聲。唔知佢把聲係點呢..？應該係啲可愛嘅聲？定係雞仔聲..？哇我接受唔到係雞仔聲。希望佢把聲唔會好難聽啦...唔係我會傾到好冇mood。「嘟...........」
「喂？」Rachel話。好彩..係把唔錯嘅聲，偏高音，但又未到好高好尖嗰種。總括嚟講，係一把聽得舒服嘅女聲。
「喂～我係呀文呀」
「哈哈我知呀，你講啦，你岩岩係咪話想講你啲嘢」
「嗯..呀，你等一等，我拎一拎個耳機」我話。
「好～」
「.....好～ok啦」
「嗯」
「咁話說我上次咪話我同呀婷..咩嘅...」
「嗯～」
「我其實仲有去Club識左嗰女仔.....個女仔..........」我地一路傾電話，又傾到凌晨都未傾完。
「咁你覺得自己鍾意左佢？..」Rachel問我，佢把聲越嚟越好聽，點解？教精你地啦，點解要凌晨傾電話講心事，有三個主要原因。一，因為凌晨時分，當女仔唔敢講嘢太大聲，怕嘈到屋企人，所以佢地會相對細聲好多。二，因為佢地開始有少少眼訓，有睡意嘅聲同日頭講嘢嘅聲係唔同。呢兩個主要原因加埋就令到佢哋講嘢相對上好溫柔。再加上夜晚個人係Emotional 啲，所以會傾得deep啲同感性少少。
「我...唔知呀...又唔算係好鍾意..，但係會想見佢」我話。
「咁..你似係鍾意左人喎..」
「可能啦..」
「不過你同左我講左咁多你嘅嘢，我遲啲都同你講一樣」
「好呀，關於咩嫁？」我問。
「你到時咪知囉～」佢話。咁神秘...？