因為ex，我決定向全世界嘅女人報仇: 後悔

落左巴士之後，我仲停留係呀婷錫我嗰個畫面...我點會唔知佢對我有好感，但係我冇諗過會係咁樣收場。我曾經有諗過會整喊呀婷，始終嗰一晚我食左佢....但係當佢配合我扮唔記得嘅時候，我以為件事會就咁告一段落。唉屌..我做乜撚嘢呀...貪嗰晚爽，想要人陪...搞到同呀婷而家咁。

沖左個涼，我上返自己張床。望住呢一間房..我回憶起當日同呀婷嘅經歷..如果我當晚冇搞佢，我地係咪會繼續咁fd？..我開始覺得好內疚..佢係我異性入面最好嘅一個朋友。平時suppose有呢啲事發生，我就係搵佢飲酒吹水..但係而家女主角係佢...我應該點。我好無助...當你親手摧毁左你唯一嘅樹窿，你已經唔知可以搵邊個傾訴，嗰種有苦冇得呻嘅感覺真好難受...。記得呀婷話多謝我？多謝我啲咩...？死啦我覺得我點都要搵返佢問佢有冇事..唉...麻煩了今次，自己攞嚟衰。

「冇嘢呀嘛..？」我打完又Delete返。都係唔好咁問。
「呀婷..想唔想再出嚟飲酒？」屌，好唔知想點..咩想唔想出嚟飲酒..我仲有面見佢咩..，都係唔好咁打。
「呀婷..對唔住..」咁好冇呢...唉..好似好突兀咁，咩都唔講無啦啦道歉..頂！呢樣又唔好，嗰樣又唔好..點打先好。

我諗左好耐好耐，最後決定：「呀婷，你得唔得閒傾個電話..」我決定打比佢問，唔想淨係用Wtsapp。一send左出去，一個剔。唔通佢訓左？..應該係啦，而家都咁夜了。算啦，聽日再搵佢。



第二日一樣係一個剔，直至我覺得有啲唔對路，我用手機打比佢都即刻飛留言。死啦..佢會唔會有咩事..萬一佢諗唔開..屌！唔好呀！我開始用IG去搵佢，但我search極都search唔到佢。冇理由嫁..我記得佢個ig名嫁，定係佢改左？之後我逐個逐個follower搵，都係搵唔到..呀婷你唔好有事呀..！！！
「呀婷del左IG？」我wtsapp問Chloe。
「下，唔係呀，我仲見到佢喎。佢琴日先po完嘢」佢話。
「哦..，我搵到啦，岩岩Bug左 lol」我扮。
「haha okok」Chloe話。原來.....呀婷...block左我。我個心好唔舒服..嗰種感覺有少少似分手..。唔係普通分手嗰種，如果你有試過好突然咁分手，你就會明呢種感覺。姐係前一日你仲以為同佢好地地，後一日已經好似失去左啲好重要嘅嘢咁。原來呀婷對我嚟講係咁重要...就算佢唔係我女朋友，我都唔想佢離開我嘅世界。呀婷..陳綺婷...你可唔可以返返嚟..

「喂大佬呀，你對人做過啲咩呀？你仲期望人地會同你做Fd？」我心入面嘅另一個自己咁講。
「咁..我真係唔想冇左個朋友」
「你唔做都做左啦，有得後悔咩？」佢話。
「我知冇得後悔，但係..」


「但係？你到而家仲係咁撚自私」
「我自私..？咁Sophia唔自私咩？你識條撚咩！」
「佢出軌你就要咁對呀婷？你唔開心想取暖你想食女我明，但點解要搞呀婷？佢係你best friend呀，你利用佢鍾意你而食佢？屌你老母你仲有冇人性呀？」佢話。
「我...」

當你連自己都原諒唔到自己
你又點敢奢求人地嘅原諒

我發現我駁唔到自己，我究竟係有幾仆街先會食左呀婷。失戀之後一直都好想報復，好想比Sophia見到我冇左佢我一樣大把女仔，一樣可以好瀟灑。所以我去Club又好，同呀婷、Nicole過夜，我都一一偷影Snapchat 比佢睇。唔係影裸照，純粹影住我攬住個女仔。而佢每次都有睇過我嘅相，但從來都冇覆我。而家睇返都覺得自己好撚幼稚..仲要想報仇，點知第一個就傷害左自己嘅朋友。



呢個時候我真係好需要一個傾訴對象...我打開手機，而家先留意到tinder有幾個通知。係Rachel。
「我收工啦～今日勁攰..有隻狗狗唔肯打針..！」- 下午 06:21
「你今日好忙？」 - 下午 10:18
「做咩啦..係咪有啲咩事？」 - 上午 00:34
「我訓啦..你有咩事就搵我啦」 - 上午02:36

「Sorry呀，琴晚發生左啲嘢，所以冇覆到..」 - 下午01:45 我覆返佢。
「唔緊要呀～我都估到。做咩啦..？係咪好大件事？」 - 下午 01:50
「我好想搵人講..但唔知應唔應該同你講...」 - 下午 01:50
「關於咩嘅？」 - 下午01:50
「關於..感情..」 - 下午 01:51
「可以呀，唔怕喎！我好叻守秘密嫁！我啲Fd都好中意同我講感情嘢haha」 - 下午01:51

就係咁..我決定同Rachel呻我嘅煩惱。



愛你的那一個　傷你的那一個
誰才是你愛情中的伯樂
放棄了這一個　然後等待著下一個
最後哪一個讓你最捨不得