因為ex，我決定向全世界嘅女人報仇: 心痛回憶

我同個男仔開頭都正正常常拍拖。間唔中去下睇戲，溜下冰，去下Cafe坐。直至有一次我拖住佢係學校行，咁岩嗰日呀文拖住佢女朋友見到我地。我唔知點解有股衝動鬆開佢隻手....我竟然真係鬆開左...點解我會咁驚比呀文見到我拖住另一個男仔。明明我以為我已經放低左佢，點解一見返佢我又係控制唔到我自己..鬆開手嗰刻我先知道，我個心從來都冇離開過呀文。

之後我同男仔主動講左分手，佢好似一早就知道我心有所屬，佢冇怪過我，只係話希望我真係可以幸福。當時嘅我都唔明點解個男仔唔嬲我，後來我先明白到，愛一個人..真係可以蠢到為左佢而放棄自己。

我分左手之後有專登係大學同學Group入面講，話唔開心想約大家飲酒。當然，我最主要係想知道呀文會唔會因為我分手而關心我，同埋好想借呢個機會等佢陪住我。嗰個星期五晚我地幾個人落左去尖沙咀嘅吧，呀文話因為佢女朋友唔比佢嚟，所以佢未必嚟到。我聽到好心痛..好似我做嘅一切都係冇意思咁，究竟我要單戀佢幾耐，我要付出啲咩佢先肯鍾意我..那怕佢只係鍾意我嘅身體..我都願意為佢付出..

「Sorry呀...岩岩同佢嘈完，咁遲先嚟」呀文話。佢最後都係為左我而出現...！我就知道你會嚟..我等左你好耐了..
「唔緊要呀～你肯嚟已經好比面..哈哈」我話。
「傻啦！你失戀喎！咁大件事我點可以唔嚟！女朋友嬲我都照嚟，夠哂義氣啦掛！」呀文話。
「..哈哈...」義氣嗎....？原來係因為夠義氣..？你就真係一秒都冇鍾意過我..？


嗰晚我係咁飲係咁飲，大家都以為我因為同個男仔分手而飲。係呀，我係失戀呀，不過男主角係呀文。之後呀文不斷氹我、安慰我，而我好享受呢種感覺，即使佢唔知我唔開心嘅原因係因為佢。識左佢幾年，呀文都仲係好似我岩岩識佢咁溫柔..咁識得體諒人。

之後我話想去海旁，我地由諾士佛台出發行去尖東海旁。行到一半都未到我就支持唔住，呀文扶住我，我嘔左好多嘢落地下，甚至有啲嘔左落佢隻手。佢用另一隻手幫我掃背：
「冇事呀嘛..？」佢問。佢完全冇介意我啲嘔吐物。
「...嗯..我ok...」
「真係Ok？..我送你上的士啦，唔好去海旁啦」
「我..個頭有啲痛....」我話。唔係講大話，個頭真係好痛。
「..唉..我陪埋你返去啦，佢地又唔順路」
「好..」點解你唔係鍾意我，但又要對我咁好...你知唔知就係因為你咁..我先冇辦法唔愛上你...你真係....你真係.......我一路諗一路喊。嗰次係我第一次係佢面前喊。
「...做咩啦...你又諗起你ex..？」


「.唔係呀...我冇事」我同佢一齊上左的士。
「...」我feel到呀文都唔知應該點氹我。
可能飲左啲酒，我開始大膽到將我個頭挨係佢心口..雖然明知佢有女朋友。但係..佢冇推開我。挨係佢心口之後我好似冇咁唔開心..有種感覺係好似呢一刻，呀文只係我一個人。呀文..多謝你嘅善良，令到我都可以分享到屬於你嘅溫暖。

無情人做對孤雛 暫時度過坎坷
苦海中不至獨處至少互相依賴過
行人路裡穿梭 在旁為你哼歌
你永遠並非一個