因為ex，我決定向全世界嘅女人報仇: 暗戀過程

Year2嘅summer sem，呀文拍拖了。佢玩ocamp做組爸識左個女仔，佢地冇幾耐就一齊左。當時呀文仲同我講，話佢好鍾意呢個女仔，覺得佢地好夾。當初都有人問過我做唔做組媽..如果我知呀文做...我一定會同佢一齊做....

佢拍左拖之後，我地十年都唔上佢一次hall。一嚟我地上天地堂中間嘅時間呀文都會拎嚟陪女朋友，二嚟佢間房多左個女仔長期係度，我地都唔好意思上去。

有一排我地好鍾意上完朝早堂就去飲茶。有次呀文話想帶埋佢女朋友嚟一齊食，因為佢都得閒。其他人都好歡迎佢女朋友嚟，咁我都冇理由話唔想，就當睇下咩女仔咁犀利，呀文會睇得上。
「Hi～我叫呀喬。我唔會阻住你地呀嘛..？」佢話。我仲以為會係好靚女，點知係好普通嘅一個女仔。
「唔會唔會～坐呀坐呀！我叫Chole呀」Chloe好好客咁話。
「Hello～我係Eric」
正當我想介紹自己嘅時候，呀喬開左聲。
「咁你一定係呀婷啦～」佢話。


「係呀..你識我嫁？」我答。
「冇呀我成日聽呀文講起你～」
「..哈哈..係咩..」我話。呀文會係佢女朋友面前提起我..？佢究竟會同個女仔講啲咩，我好好奇。
「好啦，快啲食嘢啦，凍哂啦～」呀文話，之後佢夾左舊燒賣比佢女朋友食。我睇得好唔舒服...點解咁普通嘅女仔可以做呀文女朋友...如果佢係一個靚女或者我都會輸得心服口服。嗰一刻我真係好唔甘心..我自問冇一樣嘢會輸比個女仔...純粹係因為我冇玩Ocamp..

當時我真係咁覺得，後來我先發現，一個男仔鍾意一個女仔係唔需要原因。嗰次係呀文第一次帶女朋友係我面前。當然，我咁講得，因為唔只得一次。

當我已經習慣左呀文有女朋友嘅時候，有一日上上下堂佢無啦啦同我地講話佢地分左手。原因好似係因為性格不合，佢話個女仔好固執，佢地成日都嘈交。而我地幾個嗰日就即刻約左夜晚飲酒。我本身唔係特別叻飲酒，但讀左大學之後好似大家都好鍾意約飲酒，所以就飲多左好多。當然，呀文失戀，佢想做咩我都一定會陪住佢。

嗰晚我地飲左好多，而我第一次見呀文咁唔開心。望住佢個樣，我個心乸住乸住好唔舒服。一嚟係因為我唔想見到自己最鍾意嘅人咁樣..同時我好似咩都做唔到咁，無力感好重...我不斷係度諗要做啲咩佢先可以冇咁唔開心。二嚟係我唔甘心呀文為左個襯唔起佢嘅女仔而唔開心..聽呀文講，個女仔明明就成日無理取鬧...點解呀文就咁鍾意佢。飲下飲下，我都好唔開心..開始會諗我係咪應該進取啲..反正呀文而家單身...



就咁又過左半年。呢半年我同呀文嘅關係再Close左啲，我覺得係因為我主動左，再個人開朗左啲。以前嘅我比較鍾意收埋自己嘅諗法，而家嘅我更加勇敢去表達自己。我一直都覺得，如果冇識到呀文，我一定唔會好似而家咁。佢就好似一直令我成長嘅人，那怕我只係跟住係佢後面..

當我以為我地會慢慢發展嘅時候，呀文又再拍拖了。佢返Part time識左個女同事，個女仔唔係同我地讀同一間U，所以呀文成日過去佢度搵佢。呀文開始走多左堂，有時甚至乎成個禮拜都唔會見到佢。慢慢我地開始生疏返..唔上堂見面就好少會私底下pm傾計..講得都係問下我上堂Professor 有冇派midterm ，幾時要上Lab嗰啲嘢。我見佢有女朋友，都唔敢隨便約佢出嚟..廢時人地以為我有咩居心。

我開始慢慢接受左現實，我有同過兩個姐妹講我單戀呀文嘅事。佢地都叫我唔好為左呀文而浪費自己嘅青春，我有嘗試過同單獨男仔出街，但心入面硬係有呀文..直到有一個男仔對我好好。佢係我識左呀文之後，第二個對我好好嘅男仔。我地有出過幾次街，佢比我嘅感覺都幾好，慢慢我對佢產生左好感。而我知道，我心入面仍然係有呀文..但係我決定比個機會個男仔，當比個機會自己放低呀文...

我可以跟在你身後
像影子追著光夢遊
我可以等在這路口


不管你會不會經過