因為ex，我決定向全世界嘅女人報仇: 獨一無二的你
我同呀文係大學同學。
我記得第一次見到佢係year1新生註冊日。嗰日落好大雨，我拎住把遮，自己行左入去學校。我對讀大學唔係特別期待，但係成日聽人講大學生活好精彩，所以我都好想體驗下。
「喂，快啦，等左你好耐啦。」有個男仔係我隔離對住另一個比雨淋濕哂嘅男仔講。
「Sor呀..岩岩去左幫一對母女帶路，佢地好似好趕住去睇醫生。」濕哂嘅男仔講。
「收皮啦，靚女人妻炸？」
「食屎啦！」淋濕左嘅男仔講完打左佢朋友一下。而家我先睇得清個男仔個樣，佢唔算好靚仔，但睇落好陽光好順眼。聽佢講好似去幫母女帶路？好少有男仔咁有心。佢一米八嘅身高，感覺上好sporty，呢個就係我對佢嘅First impression。當時我仲未知，佢就係呀文。我有時都好羨慕人地有朋友一齊入同一間大學，因為我係中學嘅朋友唔算多，而佢地都同我讀唔同大學。
佢地行左係我前面，我亦都跟住佢地慢慢行入去教學樓去註冊。
上到去，學校幫我地分左唔同學院同唔同系分開註冊。我望住指示牌，跟住指示牌嘅方向行。
「喂，我行呢邊呀！」呀文同佢朋友講。
「你搞完call我啦，好似話Ocamp都係今日報埋。」
「係呀，咁電聯啦。」
岩岩個男仔同我行入同一度註冊，因為都濕得好嚴重嘅關係，佢件衫仲未乾。佢打左個乞痴，我想拎張紙巾比佢，但佢已經自己拎左張出嚟。註冊都要排一陣，我等下等下就望住出面啲雨發呆。
「哈哈，師兄多多關照啦～」佢話。
「小事啦～遲下有咩都可以搵我。係喎，洗唔洗同你介紹下有咩Ocamp好玩？」幫手註冊嘅師兄話。
「唔洗啦，我約左我個fd係出面等，廢時要佢等咁耐。」
「好啦！同學，到你啦。」師兄講。
「同學？同學！」呀文話。
「下...？叫我呀？」我話。
「係呀...到你啦，見你岩岩緊發呆」佢對住我笑一笑。
「..哦！好！」我話。
「係呢，你又係讀呢科？好少見女仔讀呢科Engine喎～」我一邊註冊，佢企左係隔離問。
「係呀...我本身讀中學嘅時候對理科有興趣。」
「係喎，我叫呀文呀～雖然個名冇個文字...唉唔重要，哈哈。遲啲上堂多多指教啦～」
「..你叫我呀婷得啦」我答。就咁，呀文就係我第一個係大學識嘅朋友。
「又話驚個fd等～同女仔就傾多幾句，哈哈」師兄笑住講。
「哈哈，我驚佢唔識註冊流程炸，見佢發呆嘛。」
「你教埋佢，咁我做咩呀？」
「哈哈..講下笑姐..哈哈」呀文尷尬一笑。
我係隔離聽到都笑一笑，嗰次係我第一次覺得呀文可愛。
係之後嘅日子，呀文都會同我一齊。間唔中有幾個都係同major嘅同學一齊，佢地都係呀文識返嚟嘅朋友。佢比我嘅感覺好Social，好識同人相處。因為呀文，我係大學都多左幾個朋友。
又一日天地堂。
「喂不如上你hall玩呀～」Chloe同呀文講。Chloe都係我地嘅major mate。
「下..我間房冇嘢玩嫁喎，但係你地想上嚟hea下都得呀。呀婷呢，嚟唔嚟？」呀文問我。
「好呀，我都得」我話。
「喂～～～～淨係問呀婷唔問我嫁」Eric奸笑咁對住呀文講。
「你條友，唔問你都會痴埋嚟啦～」呀文話。
我第一次上呀文hall就係year1，之後已經上到習慣哂，好似係自己hall咁。因為呀文roommate 好少返，佢多數都係一個人住哂成間房，所以我地一有時間就上去玩。
記得有一次..因為其他人有堂，所以得返我地兩個係佢間房。
「好攰呀...超級眼訓」我話。
「你攰就訓我張床啦，唔洗坐係度喎」呀文話。
「唔好啦..我件衫污糟呀」我怕尷尬..話哂我都未訓過男仔張床。
「得啦～唔怕啦」佢拉住我隻手，帶我去佢張床。
「.....」我訓左係佢張床。佢個枕頭有陣佢嘅洗頭水味，係好清新嘅味道。咦.....死啦...我緊張到連鞋都冇除...
「..哈哈，傻妹！你未除鞋呀」呀文話，之後好溫柔咁幫我除左對鞋。我雖然中學有拍過拖，但真係冇試過有男仔幫我除鞋。我望住呀文幫我除鞋個樣，嗰次係我第一次對佢心動。
「我roommate應該唔會返嚟嘅～我訓佢張床啦」佢講完就訓左係我隔離，因為佢地兩個拍左床，姐係將兩張單人床拍埋左。慢慢，佢訓著左。我望住佢訓教嘅樣...心跳得好快...
之後升到year2，我記得有一次我想試下學下有啲著得暴露嘅女仔，著得暴露少少。唔係為左露啲咩，純粹係我覺得佢地著得好靚...
返到學校好多男仔都有意無意望住我。
「哇！呀婷你著到咁chur呀～放學去蒲～？」有個男仔問我。
「唔係呀...我覺得呢件衫靚炸。」
「喂...嗰嗰呀婷嚟？著到咁嘅。」
「可能人地做ptgf呢，你理得人咁多。」
「哇....著到成隻雞咁。」我聽到幾個男仔講，佢地都講得幾大聲。
「著到咁都唔知搏咩..明知呢一科多仔」有個女仔講。
「呀婷？哇你今日著得咁唔似平時嘅～」我fd嘅其中一個女仔講。
「係呀..想試下轉下style」我話。呢個時候，呀文行左入lecture。
「哇呀婷～你咁著好靚呀！」佢同我講。
「...真嘅？」我聽得好開心。
「真呀！超有魅力！」
「哈哈多謝」我覆佢。其他人點睇我一啲都唔重要，就算之後佢地將我改左花名做「雞婷」我都唔介意。我淨係記得，呀文話我咁著得靚，所以之後我一直都keep住呢種著衫style。
只有你看我的眼光和別人不一樣
我的心屝 只為你開敞