因為ex，我決定向全世界嘅女人報仇: 多謝你

呢個時候，我枱上面部手機有通知，係Rachel係tinder搵我。因為平時我地多數係呢個鐘數傾計，但咁岩....比呀婷見到....
「你有玩tinder嫁？」佢用得我地兩個聽到嘅音量問我。
「...之前啲同事玩嘛...叫我玩..我咪單嚟當識下人..」我答。
「哦～」之後就再冇問。唔知點解我又好似好心虛咁，好似一個偷食比人發現嘅男人。但我唔知點解要心虛，可能係唔想係佢面前留一個太壞嘅印象，唔想佢覺得我玩tinder係食女。

呢餐飯局就嚟完嘅時候，無啦啦有條契弟出嚟講。
「喂係喎呀文，你前排係咪失戀？」講完大家都望住我。
「係呀，都過左一排啦。」
「哇我記得你都拍左幾耐啦喎..做咩無啦啦分手嘅？」佢問。
當我諗緊應該點樣答嘅時候，呀婷開左口。


「人地啲傷心事你就唔好問啦。」呀婷話。
「車～問下姐，喂唔好灰啦，最多我介紹女女比你識！」
「小事啦我邊有灰。你啲女如果有個正常嘅，我都唔介意望下。」我笑住講。
「收皮啦！我介紹啲女不知幾高質！」
「叻啦叻啦，你食哂佢啦咁。」我地繼續打鬧。

食完飯，我同呀婷都係搭同一架巴士返屋企。我地坐左係巴士上層後面，成架巴士都唔多人。
「你冇嘢呀嘛...最衰都係佢地啦，無啦啦又提起你啲嘢。」呀婷問我。
「冇嘢呀～佢地都係好奇姐，由佢啦～」
「真係冇嘢..？如果你唔開心我可以陪你呀，你想嘅我隨時奉陪。」佢話。


「哈哈，好。但係唔洗啦，我過得好好。」我話。
「因為識到新嘅女仔..？」佢問。
「...........」「唔係啦...」
「佢好靚嫁..？」佢再問。
「都話唔...」我正想講嘅時候，見到呀婷無啦啦喊。
「......」我其中一個最唔識處理嘅，就係女仔喊。我即刻拎左張紙巾出嚟比佢。
「做咩啦...」我問。
「冇...事...」佢啲眼淚一滴一滴咁流出嚟，感覺好似佢用盡全力忍住唔喊，但係失敗。
「呀婷......」我個心嗡住嗡，唔知點解望住佢喊我好心痛。
「呀文...你....應承我...一定要..幸福吖...知唔知呀。」佢嘅眼淚冇停過，講完呢句就越喊越犀利。


「.....你唔好喊先啦...」車上面開始有幾個人向後望，因為呀婷越喊越大聲。
「你...應承我先啦...」
「...好...我應承，我應承。」我答。
「...咁就好啦...！」佢笑住望住我，但眼入面嘅淚水依然係冇停過。
「多謝你...！」佢一講完就錫左落我塊面度，之後即刻用手遮住塊面，勁快衝左落巴士。

我係上層望住呀婷嘅背影...一時間個腦一片空白。
架巴士唔等我落車就開左，就好似我係失戀之後不停向前行。
而呀婷...就係呢個唔屬於佢嘅巴士站停低左。

我望住出面嘅一盞又一盞嘅街燈，我突然間諗起Nicole..
「多謝你..」Nicole臨上巴士前咁講。
「多謝你...！」呀婷臨落巴士前咁講。

只期待 後來的你 能快樂


那就是 後來的我 最想的