因為ex，我決定向全世界嘅女人報仇: 二人世界（下）

Nicole佢著左一件深藍色碎花嘅連身裙，裙腳岩岩過左膝頭，唔會太短唔會太長，露到佢對靚腳之餘又唔易走光。佢今日戴左對銀色花花耳環，我諗佢係想襯返條裙。佢化左少少妝，有少少粉底遮瑕，淡色眼影，睇唔出佢有冇畫眼線，因為我印象中佢素顏同而家差唔多。冇畫眉，查左粉色唇膏，襯返佢偏白色嘅皮膚。今次都係著左對銀色嘅平底鞋，同上時第一次見佢比，今次更加似係去拍拖嘅感覺。
我慢慢行過去，最令我忍唔住嘅..係佢嘅香水。佢噴左隻好香嘅香水，但唔係好濃嗰種。要形容就係一隻我好鍾意嘅味，聞極都唔會厭嘅味，聞下聞下直頭會想食左佢..
「咁靚嘅今晚～」我話。
「平時唔靚咩！」佢一嘢撓住我隻手講。
「靚..今日特別靚。」
「哈哈，又係呢啲溝女套路，妹妹仔就比你氹到！」佢笑住講。
「叻啦叻啦，去買飛啦～」

「唔該，想要兩張呢套戲，九點半場。」Nicole邊講邊拎佢個長銀包出嚟。
「喂我比啦，我唔會要女仔請我睇戲。」


「邊個話要請你～我比自己嗰份炸，你就想～」佢覆我。
「好好好，拿，比你。」我比左一張飛嘅錢佢。
「買唔買啲爆谷？」我問佢。
「緊係要啦！邊有人睇戲唔食爆谷嫁！」
「yes madam～」

我地捧住兩個爆谷入去。有睇過戲嘅都知，有啲戲院兩排係會有啲「情侶位」，得兩個座位，之後就係走廊。我地就係坐係嗰度，Nicole簡嘅。其實中間仲有好多位，同埋呢啲位唔係對正個銀幕。但反正我都係為左同佢睇戲，坐邊根本唔重要，呢啲位仲要唔洗同陌生人坐。

開場我先知呢套係一套愛情片嚟，聽佢套戲名唔講以為科幻片..Nicole一直挨住我心口睇，而我個頭就挨住佢個頭，真係好似情侶咁睇戲。當我以為佢簡啲坐咁後嘅情侶位係為左做啲咩嘅時候，佢冇，只係好專心投入咁睇。咁我當然都好配合，同佢一齊靜靜睇戲。呢套係一套嘅台灣愛情劇。