因為ex，我決定向全世界嘅女人報仇: 美夢醒來

「夠了！如果你是愛我的，就讓我走吧！」男主角話。
「為什麼....為什麼我為你做了那麼多...你還是愛著那個女人嗎...」女主角喊住話。不得不說男女主角演技都好好。
「五年了，我跟你在一起五年了。你知道這五年，我有多累嗎？一開始我早就跟你講我們是不可能的，你是大老闆的女兒，我是什麼！你的家人我就算了，你的朋友看不起我我會不知道嗎！？幹！」男主角都開始講得好激動。
「那你為什麼要跟她一起......你知道我為了你..跟家人每天都吵架。我的朋友看不起你，那我們就不去見面呀...為什麼要跟別的女生在一起...那我算什麼！！」女主角喊得越嚟越勁，開始大叫。又係啲窮人溝左富家女嘅悲慘故事。
「你不懂！你什麼都不懂！你活在自己的世界，你從來都沒有了解過我有多累！但她不同，她不介意我的身份，我跟她在一起才是真正的開心！」
「我懂...我懂...我求你了，不要走...」女主角想抱住男主角。
「你放開我！」男主角一嘢fing走女主角隻手，同時撞到佢地屋企嘅一個相架，玻璃散落係地下。之後男主角走左，影住女主角坐左係地下望住張合照喊。呢個時候播電影嘅插曲，好sad嘅歌詞同旋律，好勾起到觀眾嘅反應。

我睇得太入神，都冇留意原來Nicole眼尾都有啲淚光。我即刻拎左張紙巾比佢。
「..唔該...」佢抹一抹眼淚。


「傻妹..睇戲炸..冇事。」我摸一摸佢個頭。
「...嗯...」佢好似仲好唔開心咁。我諗可能勾起左佢一啲回憶，但我都唔方便問，我又唔係佢男朋友。

出到戲院Nicole 開始正常返少少。
「想唔想去海旁？」Nicole問我。
「可以呀，你想去邊我都陪你。」我答。佢笑左一笑，拉起左我隻手。
「唔係好多人知呢邊有海旁行嫁炸，多數係住樓上嘅人落嚟散下步，所以靜靜地幾舒服。」
「我之前有嚟過呀～」我話。
「同女仔？」。
我笑一笑，冇答到佢。


「咁唔去了。」佢突然間話。
「下唔好啦，去行下啦，我好鍾意海。」
「講笑炸～行啦死蠢～」

我地拖住手係海旁行，係旁人眼中睇落，好似普通情侶咁。甚至乎有啲似住係樓上落嚟散步嘅兩公婆，雖然..你未必會著連身裙同平底鞋落樓散步，但屌，唔重要啦。

行下行下，佢無啦啦吉起個身，錫左我一啖。正當我想錫返佢嘅時候，佢另轉左塊面，慢慢行左去海旁嘅扶手位。我跟左過去，同佢一齊挨住個扶手，望住個海。
「今日多謝你。」佢話。
「傻啦小事，無啦啦多咩謝。」
「我好耐冇試過拍拖嘅感覺。」


我冇覆佢，引緊佢講佢嘅故事。
「你係咪會覺得我拍好多拖，同好多男仔上床。」佢問。
「....唔係啦..點會。」我講左大話，因為當初我真係咁諗佢。
「唔洗呃我喎，反正好多人都係咁諗，我又唔介意。」佢咁講我有啲心虛，好似我同普通嘅男人一樣咁諗佢。簡單啲嚟講，我唔了解佢，但我好想了解佢。
「咁...會咁諗都有原因嘅..我明點解啲人會咁覺得。但即使你係唔係咁都好，我都想了解你多啲..」我本身係想講，「即使你係唔係咁都好，我都鍾意你。」但講唔出。一嚟唔想自己沉，二嚟我知道就算我講左，都唔會一齊。
佢笑一笑。笑容入面有種有苦難言嘅感覺。
「你點解想了解我多啲，維持住呢種關係唔好咩？」佢問。
「或者咁講，其實我本身就鍾意同女仔交心多過肉體上..」
「但我唔係你想像中咁完美。」
「我知呀，我都唔係啲咩正人君子。」我笑一笑，嘗試化解空氣中奇怪嘅氛圍。
「你望唔望到個海。」佢問。
「望到呀，咪係前面，做咩咁問。」
「你望住個海只係望到水面，所以你覺得佢好靚好美好，係因為你只係留意到佢表面。海底下面有好多你唔知嘅嘢，可能好醜陋好恐怖。」
「Nicole...」
「好啦，都差唔多啦～再唔返去我冇車走。」佢笑住話。


「.....嗯...行啦。我車你返去？」我問。
「唔洗啦，送我去巴士站得啦。下次再約啦～Wtsapp你。」佢話。
「好呀，隨時都可以～」
「多謝你..」佢攬一攬我，就上左巴士。

佢走嗰刻，我覺得有啲寂寞。雖然本身都冇諗住同佢拍拖，但自己好似慢慢比佢吸引左，佢笑佢喊佢唔開心，每一個表情都係我個腦度。我揸緊車返屋企嘅時候，成個腦都係Nicole同佢講嘅嘢，但諗諗下又諗起Sophia...唔知佢而家點...應該同個撚樣明好開心啦。我發現我好似冇咁嬲佢，大概係因為有人陪。大家都話要放低一段感情最好嘅方法就係開展一段新嘅感情。我唔Sure我同Nicole係咪叫開展一段新感情，但我冇得否認嘅係，我鍾意佢。腦海突然又浮現呀婷出嚟..唉，我唔應該放佢飛機。人多數都係咁，完事後先識後悔。

我信與你繼續亂纏 難再有發展 但我想跟你亂纏