因為ex，我決定向全世界嘅女人報仇: 二人世界（上）

貪新忘舊完全可以形容而家嘅我。明明前兩日先約左呀婷，今日就已經唔記得左。呀文呀呀文，賓周得一條嫁炸..你今次要起雙飛先搞得掂啦。你話如果我叫埋呀婷去睇戲....唔得，太蠢啦呢個方法，諗起都覺得奇怪。
推左呀婷..？好似好衰，明明就係我約佢嘅。
推左Nicole..？我今日先同佢講完我得閒..

對我嚟講，Nicole重要過呀婷。點解咁講，其一係我同Nicole相處得舒服啲，加上我對佢嘅感覺係有少少鍾意。而呀婷，因為我對佢仲有啲歉意，見到面又怕老尷。嗰日約佢純粹係太嬲想報復想搵人陪。如果我推左呀婷..佢應該唔會怪我掛..。有時男人就係咁仆街，識左一日嘅女仔隨時可以重要過識左幾年，一個對你好嘅「朋友」。權衡左兩邊之後，我決定...

「呀婷..，Sorry呀我今晚可能去唔到...因為我唔記得咗屋企人生日..」我send wtsapp 比佢。我決定講大話。
「唔緊要呀～屋企人生日緊要啲！我地可以再約啦，幫我同佢講聲生日快樂～」呀婷秒覆。唉..點解你要咁善良..我個心突然間有啲唔舒服。如果我同Nicole講大話，可能都唔會有咩感覺，始終我同呀婷識左咁多年..諗諗下，我好似第一次呃佢。因為你對住朋友正常係唔洗講大話，就算做左衰嘢都會照直講，然後大家笑下，又話下我仆街咁。但今次..我真係冇勇氣同佢講我約左另一個女仔而唔記得左約左你。Sorry呀呀婷....真係Sorry...

呢個時候狗賢Wtsapp我：


「喂Nicole話冇拎到你電話，我比左你電話佢啦。」
「ok呀。」我覆。
「拎電話似有下文喎，做sp？」佢問。
「佢約我今晚睇戲，s你個死人頭，我都唔知佢想點。」
「小心沉船呀傻仔，Nicole呢啲真係玩下好啦。」
「屌！洗撚你講。」我覆佢。
「自己睇車啦。」

傻啦，我點會沉船。佢係靚，我對住佢係有feel，但我好清楚佢唔係我想要嘅女朋友。雖然我唔知之後會係點發展，但佢想玩我咪玩下。當時嘅我係本住呢個心態...



星期日夜晚六點。
「呀文～我係Nicole呀～」Nicole wtsapp我
「Hi～我係呀文。」
「頂你，好似唔識我咁！」佢覆。
「哈哈，今晚幾點呀。同埋你想睇咩？」
「到時咪知囉！放心啦，唔係睇鬼片。我地9點奧海城等？我食左嘢先嚟～」
「可以呀，你住奧運嗰頭？」我問。
「唔話你知～好啦一陣見～」

星期日夜晚九點。


我係奧海城二期行緊，望一望錶，都差唔多了，我再行到去戲院門口等。
「呢度呀～」Nicole把聲傳嚟。因為我用緊手機，所以冇第一時間望到佢。
我視線慢慢向上移...Nicole....今日....好撚靚.....我即刻冇後悔今日推左呀婷。咁諗好仆街？係呀，但我只不過係將我最真實嘅諗法講出嚟。我有內疚，但呢一刻嘅我，只係想享受同佢二人世界。

讓那 飄呀飄呀的裙 挑惹起戰爭
賜予世界更豐富愛恨