【校園，籃球，友情故】兩年前，我係個毒撚。今日，我打緊美國高中籃球聯賽。: ～第六章～ 新生活（附上對香港人的話）

「練多幾年先啦」
「籃底都炒」
「我唔要同佢同隊啊」
「你唔好再雷我啦」 
係呢個時候啊詹同我講嘅說話一次過浮現曬係我腦袋入面 

求下你 

一定要入。








裁判揮手示意得分。

個波，入左。 

我爬返起身，冇做任何慶祝動作，但係我做左一樣野，我望住左啊詹

我嘅眼神已經說明左一切 





啊詹不忿咁講左聲「副轆！」 

係啊，我得確係副轆，但係你知唔知，運氣都係技術嘅一部分

t我真係好想大大聲講出黎，但係我冇，我要專心打埋接住落黎嘅比賽。 

果場波我嘅數據大約係4分，5籃板，2抄截，1封阻。 

我好滿意。





我估，呢啲就係所謂嘅，成果。



2019年6月17號

今日我如常返學，如常唔聽書，如常訓覺 

數學堂我如常係櫃桶玩電話，突然我收到Agent嘅WhatsApp，訊息如下：
「THCA決定考慮你的申請，現在正在安排視面試，請陳同學預留明晚時間。」 

開心。 

我興奮到當住全班面舉高部電話大叫，冇錯，部電話最後俾人沒收左。





我嘅留學籃球夢，正式開始。
---------------------------------------------------------------------------
（幾個月後）
2019.8.23 

呢幾個月我不停練習，日日落樓下打波，遇到勁人就即刻撩佢打波，因為我非常相信一個成語， 

遇強越強。

我深信同勁過自己嘅人打波先會進步得快，尤其係籃球，我可以學多幾招，偷下其他人嘅技術。

係短短兩個月內我突然飆高到179接近180，臂展異常地長，手異常地大，我開始嘗試練習後衛嘅打法，因為我覺得呢個身高去到加拿大根本同籃底無緣。

中距離我開始有一定嘅穩定性，亦都係街場波友到偷到一招。





 Fade-away 後仰跳投。 

呢招可以發揮到我中距離嘅命中率，仲可以提高對方防守嘅難度，所以我街場入面經常會用到，成為左波友口中嘅

「Ming Signature Move（阿明嘅招牌動作）」 

重點來了，我練黎練去都係呢招，次次打街場都係呢招，本身都幾好用，但係久而久之個個都睇穿我進攻路線。 

冇癮！

我攞張慘不忍睹嘅成績表去面試THCA都竟然收左我，可能係因為等錢洗想要多啲留學生掛 

下星期就要去外國讀書啦，宜家嘅心情其實唔係話唔捨得，

只係有啲擔心 

我擔心香港宜家嘅狀況，我擔心我走左阿媽自己一個住會唔慣（阿爸長期外國做嘢，阿哥住大學宿舍），我擔心去到會有言語障礙，我擔心我唔識同啲同學溝通跟住俾啲黑人蛤。 

總之就係兩隻字，

擔心

Three Hills嘅天氣真系好凍，夏天平均氣溫12度，冬天聽講平均有-14度，最低氣溫試過-34度。 

我真系冇咩點接觸過雪，對上次好似已經係6歲去韓國旅行嘅事，所以其實又有啲莫名嘅興奮。



2019.8.30




我覺得呢一個禮拜時間過得真系特別快，眨下眼就已經到左要飛果日。

我推住行李同屋企人慢慢步入機場，每一步都非常沈重，我唔識點樣向屋企人表達自己嘅不捨，更加唔知道以後冇左佢哋嘅日子將會點過。

我隱隱約約見到母親大人嘅眼眶有淚水，阿爸用一個望子成龍嘅眼神望住我，阿哥搭搭我膊頭俾信心我。

呢個時刻係我活左15年最感受到家庭溫暖嘅moment。 

奈何半小時後我就有排都見佢地唔到。

簡單地離別後我過左關。 

過關後我感覺到空虛。
係孤獨嘅感覺。 
但係我知道前面仲有一條漫長嘅路等住我行。 

上機後我慢慢欣賞教會朋友送比我嘅farewell禮物，我開始幻想THCA嘅環境，我開始擔心會遇到啲咩人。 

想著想著，我睡著了。


「Ladies and gentlemen, we just arrived at Calgary Airport…」

到左啦，十幾個小時嘅機程過後我終於到左加拿大Calgary（距離Three Hills有1個小時車程）

一個字，凍
兩個字，好凍
三個字，好撚凍 

仲著住短衫短褲嘅我即刻攞件牛仔褸出黎著翻住，費事去到第一日就病。 

搞掂曬所有手續之後我就踏出左機場，係行李輸送帶到盼望住見到熟悉嘅行李 

正當我等緊行李嘅時候，有個人拍一拍個膊頭。

我向後望見到個大約173cm左右，大我一兩歲嘅亞洲人 

「Hey are you Ming?」
佢用帶有口音嘅英文問我

「umm… yes i am… you are?」

「I am studying grade 12 in PCA and I am your RA(Resident assistant). My name is Shinsoke.」

Shinsoke… 應該係日本人？ 

「Oh nice you meet you Shinsoke! So did Floyd send you here to pick me up?」

 「Technically yes… Floyd is actually out there waiting for us. He’s gonna drive us both to the dorm.」
原來佢都係啱啱落機，Floyd已經係出面等緊我 

呢個時候，佢電話響。

 「喂？」係好正宗嘅廣東話口吻 

「吓」我直請吓左出聲 

「哦我到左機場啦，你唔洗擔心我啦阿媽」佢繼續用廣東話講 

頂，條友扮日本人玩我 

佢收左線之後就笑住咁同我講：「同你玩下咋，呢個我地PCA香港人傳統黎，其實我叫Austin，都係香港人，快啲攞完行李一齊出去搵Floyd啦」 

咪住先。 

究竟一間學校要幾多香港人先可以整個香港傳統出黎。 

我當時冇理咁多就跟左佢出去搵Floyd

------------------------------------------------------------------------------------------------------------------------

第六章就去到呢一度啦，我想趁住呢個機會同咁多位講啲嘢 

琴日相信大家都經歷左好多，香港亦再唔係大家認識嘅文明社會（雖然一早已經唔係）

 好多野其實已經有曬定局

 一個人冇左良知，可能影響唔大
但係如果連一個政府，一個紀律部隊，一個國家嘅人都冇曬良知嘅時候，我地可以做嘅事就真系唔多 

或許呢一刻你會覺得好無助，好無奈，好想付出更多。 

我唔係想安慰你地啲咩，我只係想講聲 多謝。

 每一個香港人能夠行到呢一步確實係唔易，要由早期抗爭生存到宜家更加困難，但係你地堅持到，無論當時情況幾咁惡劣，你都撐到宜家。 

怯。

 個個人都會怯。 

最前線嘅勇武都會怯。 

每個人背景唔同，做嘅嘢都唔同，但係目標只有一個，就係光復香港。 

唔係個個都係前線勇武，唔係個個都冇負擔。 

但係如果承受住家庭壓力嘅情況之下你都行左出黎，我話俾你聽，冇人夠你勇。

如果係呢個時候你覺得好大壓力，

你試下瞇埋眼。 

回憶下自己為呢場運動付出左幾多，
 回憶下自己為呢場運動放棄左幾多，
 回憶下自己為香港憂慮左幾多，

當你行到某個位之後回頭望，你會發現，你已經經歷左好多。


再次送上一句，多謝。