【校園，籃球，友情故】兩年前，我係個毒撚。今日，我打緊美國高中籃球聯賽。: ～第五章～ 最正確的決定

我係讀九龍區名校，但係成績就永遠係榜尾

係香港讀果3年中學我都唔知自己做左啲咩黎，日日渾渾噩噩咁樣過，直到呢個決定改變左我 

2019年6月8日 

今日母親大人帶左我去一個外國升學嘅簡介會，睇黎佢真系決心送我去外國 

一入到會場我就聽到一大堆ABCD，我冇留意佢哋講咩，或者咁講，我聽唔明佢哋講咩





我一直以「廣東話是我母語」呢個藉口冇去學好英文會話，但係我長期累月煲Netflix，所以都叫做可以用英文溝通下 

「仔啊，你睇下果間，夠曬僻，又少華人，仲要係基督教學校添！」
母親大人指住個banner講 

「Three Hills Christian Academy」
 Three Hills...... 三座山！？
我聽都未聽過有啲咁嘅地方

「呢間好似幾好，學費點啊？」

我問 

「佢好好啊，有宿舍，學費仲要算平」
「我帶你去同個校長傾下吖」
阿媽一輪嘴咁同我講 

「嗯」
我都唔知佢係咪有心想送我去外國 咁就可以冇人煩住佢 

我同阿媽行左過去佢地個booth前面 





「Hello, please have a seat.」
一個唔知係咪食得太多M記搞到超重嘅鬼佬微笑住咁同我講 

【以下內容將會自動翻譯成廣東話】 

「同學你好啊，我叫Floyd，係呢間學校嘅宿舍舍監」

 「你好啊Floyd，我想簡單了解下呢間學校」
母親大人以最簡單嘅英文同Floyd對話 

「我地係位於Alberta嘅小鎮入面嘅一間基督教學校，創校以來一直招募國際生，老師都有豐富嘅教學經驗...」
Floyd開始sell自己間學校 

我冇咩留意佢講嘅嘢，因為我自己好清楚我攞住張咁嘅成績表根本冇學校會收我 





「我地學校仲會提供宿舍俾國際學生居住，宿舍環境都非常唔錯...」
「另外我地學校非常鼓勵同學參加唔同嘅運動，例如籃球...」
Floyd繼續sell… 

咪住。 

我聽到籃球。 

「唔好意思啊Floyd，打擾你一下，我想了解多啲你地學校籃球隊」
我打斷左佢，因為我對籃球實在有太大興趣

 「哦好啊，睇黎同學你好鍾意籃球，等我簡單講下啦」
「我地學校籃球隊叫做Sabres，係當地高中籃球聯盟入面唔算出眾，但係我地絕對有完善嘅設施」
話口未完佢就攞左張相出黎。 





係一個室內籃球場，好大，好靚。

同政府嘅室內球場比根本係天淵之別。

球場兩邊印住學校球隊Logo，成個場館都係以校隊Logo嘅配色搭襯。

「如果我第時可以係呢個球場練波你話幾好」
我心入面咁唸 

「呢個係我地學校籃球場，由於我地學校係新校舍，所以我地學校籃球場都非常新」

 佢之後同我介紹左球員專用嘅換衣室同埋旅遊車（由於球隊經常需要搭長途車去比賽學校，學校客製化左一架旅遊巴俾球隊）

 呢間學校簡直就係我夢想中嘅學校，之後我地行其他booth嘅時候我都冇心聽，只係想入Three Hills Chrisitian Academy 





返到屋企我即刻將Floyd要求嘅成績表同埋自我介紹信send左俾佢，封信我仲寫到自己非常有興趣入讀。

阿媽見我突然咁有心都唔反對我，就係咁，我報讀左呢間三山基督高中。 




2019年6月12日 

呢一日對香港人黎講係好重要嘅一日，對我黎講都係，我有兩場仗要打，Lunch Time係第一場，對啊詹嘅比賽。

而第二場就係喺金鐘... 

今次可能係因為有經驗嘅緣故我冇咁緊張，球證吹雞後Oscar當然跳到波。

我地進攻一直都好順利，我嘅努力都冇白費，開場就有二次進攻嘅機會。

 我攞到籃板就唸都冇唸就一躍而起想籃底攞分，結果就係俾人一野拍走左個波。

 13-9半場完 

我地半場就已經贏緊4分，呢場比賽對我黎講好重要，我要證明俾啊詹睇，我係打到籃球嘅

 「繼續咁落去就一定贏！啊明！做好防守，我地防守靠你架啦」
Oscar突然對住我講 

我嚇一嚇，覺得好大負擔

Oscar見我眼神有啲唔妥，佢行左過黎拍一拍我膊頭，叫我行埋一邊同我傾計 

「做咩啊？你上半場做得好好吖，繼續咪得囉」
Oscar鼓勵我。

 「我都唔知...」
我開始頂唔順佢對我嘅信任，開始覺得有壓力 

「聽我講，你得嘅！我信你，其他隊友都信你」
Oscar非常信任我 

我好感動。 

呢啲可能就係我一直感受唔到嘅信任。 

我決定將壓力好好運用，轉化為力量。 

「嗶～」雞聲響起

 我對位嘅係對面嘅一個肥仔，體型龐大，非常撞得 

對方底線發球，啊詹攞到波就帶上半場，由於我地打緊人盯人戰術（比賽中每個防守隊員看守對位的進攻球員並與隊友互相協防嘅全隊防守戰術=10.5pt），我需要跟實個肥仔，唔可以俾佢有攞波嘅機會，因為我好清楚我自己靠身形一定輸。

個肥仔突然走上葫蘆頂，幫啊詹做左個掩護，Pick走左對位啊詹嘅隊友，我唯有同佢switch（交換對位球員），宜家由我黎對位啊詹。

「好野！，有mismatch！（某一方擁有絕對的優勢，勝出機會很高）」
啊詹冷笑一聲對我講

我唸起隊友對我嘅信任，我唸起啊詹一直對我嘅鄙視。

 我瞬間燃燒左。

 我即刻貼實佢，唔俾佢有過我嘅機會，我向前一伸手佢就做左個behind the back（背後運球）想過我身位。

佢向前踏一步，以為自己已經過左我。 

我轉身再伸手。 

我掂到粒波。

我靠我臂展長（手長）呢個優勢成功防守。

粒波到左我隊友手上，係呢個時候我全力向前場狂奔，啊詹都不例外，想chase down block（追身蓋帽）我。 

隊友向我全力傳球，打快攻，宜家前場嘅局勢係1對1 

我對啊詹。

我今次帶球衝到籃底，一個身位後就係啊詹。

我跳起左，想將個波順勢拋入籃框。 

啊詹都跳起左，佢想封住我。







「嗶～打手犯規」 

佢並冇封到我，反而造成左犯規

個波係籃框邊緣一直徘徊，只要落網就係and one（加罰，獲得兩分後還有罰球機會） 




唔該， 





一定要入...