我中出咗副校: 118. 重逢 （結局篇）

「喂？我係李伊靜，你係咪叫黃曉頤？」佢聲線顫抖，講出兩個我一啲都唔知嘅名。佢哋兩個都改名改姓嚟呀？怪唔得知認唔到對方啦。

「係……我係……」

「記唔記得我走嗰陣時，你幾多歲？係咪三歲？」佢雖然神情驚慌，但聽得出啲問題係好似早有預備。

「係呀……我又問你吖……你係因爲啲咩飾物認得我㗎？」

「嗰條……嗰條紅色手繩，上面仲有細細舊金，刻著個頤字㗎，係我臨走之前叫你好好keep住㗎！」佢終於忍唔住自己嘅淚水，變得激動起嚟。



「係……係你喇！嗚嗚嗚」佢哋兩個雖然物理上見唔到面，但我可以感受到此時此刻，佢哋應該係深深噉擁抱緊。

爲咗唔打搞佢哋，我入返房自己冷靜下。

今鋪真係亂嘞，而家呀靜就係我條女，然之後Cherry 就係我學生，加我條女個女，啫係我個女？好彩，佢過多幾個禮拜都畢業，兼且而家佢只係女朋友，呢啲嘢都未定嘅……

「我哋而家出嚟見個面啦……」我出到去，就聽到呀靜收線。

「而家出去？你唔使返工啫？都唔使噉㗎？約個星期六日唔係好啲咩？噉我使唔使出現㗎？」雖然呢啲嘢就唔關我事，但我點都要有知情權啩？



「係呀係呀，4點鐘旺角黨鐵站等，你唔使跟住嚟㗎喇。」

「你哋唔使計劃下先咩？而家咁趕？得返一個鐘咋喎？仲有，你到時諗住點樣交代我同你嘅關係？」雖然佢哋應該都好雀躍，但都會唔會太過冇準備呀？

「計劃咗啦！我一見到佢咪要同佢去旺角囉！我哋以前住嗰度啲劏房㗎嘛。你嘅話就……話我係你個朋友，咁啱知我喺度尋親，啲背景差唔多咪介紹佢畀我啩。是但啦，見到佢先算！」話咁快，佢已經執好嗮要攞出街嘅嘢，衫都換埋。

「哦，噉你行囉，返嚟話俾我聽喇喎。」我都只好無奈噉講，因爲自己其實仲未可以完全消化到呢段消息。