我中出咗副校: 119. 喜訊 （結局篇）

去到午夜十二點，呀靜終於返咗嚟，仲好似有啲酒氣。

「喂！你唔係同你個女去咗飲酒下話？唔叫我接你？」我望住仲喺度傻傻地春笑噉款嘅呀靜。

「我而家咪好地地喺度？佢都夠秤啦！」睇嚟佢真係醉咗。

我抱起佢上張牀度，隔籬就擺定個垃圾桶，費時張牀遭殃。

豈料，一陣強吻嘅攻勢侵來，佢就好似嗰啲隻樹熊噉掛住喺我個身，個口就喺條頸度纏綿。



「多謝你。」佢喺我耳畔輕輕吹氣，搞到原本諗住繼續做嘢嘅我都臣服於呢種攻勢下。

就喺我未上牀之際，褲袋嘅電話響咗一響，驟眼只見係Cherry send 嘅心心公仔sticker，上面仲有個多謝。

或者我要攝高個枕頭諗吓我同佢哋兩個之間嘅關係喇，不過而家就瞓喺個枕頭先算啦。

------
一個月後，DSE 亦都即將放榜。

有趣嘅係，眼前呢個女仔冇因爲DSE 而變得緊張，因爲佢背後嘅目標已經達到。



佢同另外一個同佢樣貌有幾分相似嘅靚女手拖手，一齊上咗往南丫島嘅船，而我就鳩流流噉企咗喺後面負責影相同埋睇景，思考下人生噉。

「喂，劉sir，行快啲啦！差啲以爲你失蹤咗呀！」

「乜嘢呀，我冇做你呀sir 好耐喇喎。」畀外人聽到有人叫我做呀sir，好容易畀人誤會㗎嘛。

「噉我叫你做乜嘢呀？你都唔係我老豆，有排都唔會係呀！」佢細細聲噉講。

「喂，你哋兩個講咩呀？」呀靜呢個時候插嘴。



睇住佢哋兩個打鬧，我都唔知點解變得好開心。 難得佢哋兩個唔係相認咗好耐，都可以咁快變得融洽，實在係難得一見。

就算大家隔住個口罩，我都可以預想到佢哋兩個都喺度好燦爛噉笑。

呢個時候，電話又再次瘋狂響起通知嘅聲響。