我中出咗副校: 117. 真係佢？ （結局篇）

完咗嗰個垃圾talk 之後，我終於上嗮一日嘅所有堂，呀靜之後都彈返出嚟。

「上完喇？你啱啱有冇錄低個過程呀？我可唔可以翻睇呀？」佢一輪嘴噉講。

「有，學校叫我哋一定要錄，個file 喺度呀。你睇嚟做乜呀？」

「冇呀，𥄫下你𥄫咩女啫。」佢平時都唔多鍾意管我㗎，今次又會噉樣主動睇吓我身邊啲女學生？真係怪。

「你睇啦，我屙個屎先。」佢睇咪睇囉，又冇咩唔睇得嘅。



就喺我去完個廁所，打開道門嗰陣，我見到一個好奇怪嘅情景。

「靜？你做咩呀？」我遞咗張紙巾畀佢。

「真係佢？真係佢呀？」佢激動噉問。

「真係啲咩先？」

「呢個女仔呀，佢條手繩呀！」佢指住Cherry 條尋親信物。唔係咁橋呀？



「我臨走之前，叫佢好好保管條手繩㗎！唔係佢仲係邊個？」佢呢個時候已經喊到好似隻豬頭噉。

「誒……據我所知，佢的確係尋緊親嘅，但可能未必係佢嘅……」

「一係你幫我聯絡佢喇。」佢索咗下鼻涕，嘗試冷靜落嚟。

「得喇得喇，我而家Whatsapp 佢。」

「你而家方便傾電話？我幫你打探到你親生屋企人嘅事。」我send咗出去。



「OK」佢秒速噉覆咗我。

我撳咗個電話掣，等待通話嘅聲響自己喺度嘟嘟下，好似每一下嘟，佢哋兩個就距離雙方近一步。

「喂？」聽筒傳嚟少女嘅話語。