我中出咗副校: 116. 唯一出路

嗰啲噉嘅無聊檢討大會，基本上就係要讀嗮學校準備嗰啲無聊正向教育教材啫，實質上對學生冇咩幫助嘅。

不過，唯一嘅好處就係可以聽下班學生覺得自己考成點，做個參考噉，到時放榜唔好有咁大期望落差啦。

佢哋逐個逐個私人同我講，好似見家長噉，當中亦不乏胸有成竹嘅同學，好似之前嗰個Vanessa 。

佢考得好咪好囉，出人頭地，唔使色誘考官吖嘛。

不過，Cherry 真係唔係好開心，我見佢全程都鏈住隻手，好似好緊張。



「誒……我覺得自己唔係考得咁好，嗰……嗰日中文綜合，仲好似有啲頭痛，所以我……可能真係炒咗……對唔住呀……辜負咗你哋嘅期望……」佢講咗一陣，就已經淚眼汪汪。

「Cherry，過咗去嘅嘢就係過咗去；兼且，以你嘅底子咁好，就算有幾科真係失手都好，我都對你有信心嘅。而家距離放榜仲有成兩個月，你而家就咁擔心，遲啲一定好難捱㗎。不如趁呢段時間同朋友好好相處，或者參加唔同嘅計劃，實習擴闊下自己嘅眼界，唔好諗咁多啦。」呢個時候，TA 妹妹見我冇嘢噏到，就唯有自己安慰佢喇。

算啦，安慰呢啲嘢我真係唔識，兼且見到女人喊呢個情景，真係好難搞㗎嘛。

呢個時候，我望住佢手上嘅紅繩。

講真嗰句吖，佢屋企又唔係窮，又唔係話志願入啲咩神科，我諗佢嘅動力真係源於尋親㗎咋。



呢個時候，我終於諗到有咩好講喇。

「噉天無絕人之路嘅，有邊個話一定要考公開試考得好好？我當年會考都係考得好差，要去band 4 中學先讀到A level 㗎，噉又點？條條大路通羅馬，DSE考得好好又唔係唯一嘅出路，更何況一啲少少嘅臨場狀況其實未必影響到你作答嘅根底。唔好咁擔心啦。」唉，睇嚟我真係唔識安慰人，佢講完仲喊多兩錢重。

噉又係吖嘛，有邊個話DSE 考得唔好就冇面見老母㗎？張砂紙可以代表啲咩？唔可以用其他途徑去搵，一定要咁迂迴曲折嘅咩？又或者佢有其他我唔知嘅顧慮啦。

「你收拾下心情先啦，你都唔想其他同學見到你喊得咁慘㗎嘛個樣。」

佢勉強點頭，就抹住眼淚，返去聽學校準備咗嗰個網上talk.



唉，一個DSE 就打沉嗮班學生。問心嗰句，值得咩？