我中出咗副校: 82. 便利店

瘟神走咗之後，其他學生繼續跟住嗰度嘅員工行，當中有唔少都喺度竊竊私語，講返啱啱嗰條友但就唔夠膽三口六面問我本人喇，畢竟我塊面分分鐘黑過鑊膿。

Miss Chan 竟然主動過嚟關心我。

「頭先嗰個係你以前嘅下屬嚟㗎？我都唔知你未教書嗰陣係做電話嘅添！」有啲過去都係唔應該同人講咁多嘅。

「哦，係呀，嗰時公司俾三叔買起咗，我因爲唔想過嚟韓國所以就拒絕咗，佢就跟埋過嚟。」

「噉你後尾又過咗嚟教書嘅？唔留喺業界？」其實唔去韓國同去教書都係分別由我兩任舊菜決定嘅，嗰陣時年少氣盛，邊有人咁快想hea 做㗎。



「都係發展問題啦。」我冇明確噉講，佢亦唔需要知。

去到食晚飯，因爲係嗰啲一大張檯圍埋嗰隻，所以有學生膽粗粗問咗我一個問題。

「劉sir，乜你以前原來真係做IT 公司㗎？」有個我嘅學生問。

「哦，係呀，要轉行去教書其實都係夜晚去讀多兩年啫，嗰時香港啲IT公司唔多景氣，得返啲大公司，所以先諗轉行啫。」所以而家咪畀學校啲高層當埋做真嘅IT 狗囉。

「噉啫係你平時教嗰啲code 係真係識用出嚟㗎囉！」我有一刻真係懷疑班學生係咪以爲啲code 係用嚟考試，雖則DSE 啲code 又真係唔多實用嘅。



「都係嘅，不過有啲出入。如果你哋有啲咩關於IT 公司嘅疑問都可以問下我嘅。」我用呢句說話打咗圓場。

如我所料，除咗去移民之外，呢班名校學生冇一個想喺香港做IT 狗，個個都諗住讀data science 同埋嗰啲有IT 成份嘅金融行業，咩大數據，fintech 嗰啲囉。

你哋真係太天真喇，諗住去外國就可以讀IT 呢啲熱門高薪職業呀？我咪就係傻仔之一囉。

唉，只可以話當時太細個，竟然覺得讀啲外國多人揀嘅科就可以過外國搵阿雯。

咁快就完成咗一日嘅行程，但今日唔可以咁快出夜街住。



「同學，上返房執嘢之後，我哋今日特別畀你哋喺十點鐘有一個鐘時間去附近嘅便利店掃貨，想嚟嘅就記得落嚟喇！」Miss Chan 對住班學生宣佈。

聽到有得去買嘢，班學生就梗係開心啦，難爲我又要出現喺度，仲要畀班學生𥄫住嗮，冇得買自己想買嘅嘢。

「嘩，呢度真係好多杯麪吖！」後生仔唔知點解就係鍾意食杯麪。

「啲便利店連脣膏都有呀，呢隻色好靚呀！」明明佢哋平時都去開旅行，又會喺度大驚小怪嘅呢。

可惜，因爲有學生嘅關係，又冇得買麻甩佬最愛嘅酒喇。

我一條友喺便利店行嚟行去，十足十好似混吉噉款。

「劉sir，你做咩唔買嘢呀，呢度好多嘢買喎！」好彩，都仲有我班學生關心下啲老師。

「冇呀，冇咩想買，所以咪睇住你哋買囉。」日日都出夜街，使鬼食杯麪咩。



因爲有人已經買完嘢，所以我亦都因爲噉所以直接喺出面睇住買完嘅學生，亦即係Cherry.