我中出咗副校: 81. 打工仔真係好大怨氣

去到第二日，食完個垃圾早餐之後，我哋就去咗嗰啲大公司參觀，咩三叔呀，L豬呀，嗰啲都有去，中間就當然有食飯啦，不過都係唔好食，可能韓仔嘢唔啱我口味啦。

原本去呢啲地方都係去睇人哋嗰啲社畜生活嘅啫，講嗰啲科技嘢平時睇文都有留意過，所以唔算話要好似班學生講到「巧犀利吖」嗰啲樣嘅。

可能因爲做IT 狗年年都要學新嘢先唔會被社會淘汰啦，所以我教咗書之後都有繼續留意呢啲科技文章同技術，得閒有學下嘅。

唔通真係除咗扑嘢同踢波之外冇興趣咩。

呢趟首爾之旅真係嚟得非常之巧合，因爲我又撞到曾經嘅熟人喇。



當我哋去嗰啲咩三叔科技館嗰陣，側邊有個員工用流利嘅韓文行緊出嚟。

「咦，榮哥？你又會喺度嘅？」眼前嘅，係我以前條𡃁。

呢條昔日嘅麻煩友而家睇落都殘咗好多，典型IT 狗嘅殘樣，只不過個外表就醒目咗少少，唔似以前跟我做嘢嗰陣咁懵盛盛，可能嗰時係fresh grad 嘅關係啦。

最恐怖嘅就係，連個帶我哋去睇嘢嗰個韓國員工都忌佢三分。

噉就尷尬喇，佢而家睇落都好似公司嘅中層人士，就算我喺香港份人工幾咁巴閉都好，都一定冇佢咁勁。



佢見到我一身悠閒嘅裝扮，加上隔離嘅學生，都知道我咩料㗎喇。

「哦，hello Ivan，好耐冇見喇喎！嚟咗韓國之後點呀？」見到熟人，都係焗住要寒暄幾句㗎喇，就算我而家做緊嘢。

「冇啦，都係一路搏殺噉，仲喺度落地生根添。你而家做旅行團領隊呀？」條友擺明係落我面啫。

「唔係，去咗教書啫，香城女中，你聽過㗎可？」好彩，學校真係數一數二嘅名校之一，都叫做可以壓住佢嘅焰氣。

佢意識到我唔係咁方便講嘢，都繼續雞啄唔停，仲厚面皮到喺啲學生面前自我介紹添。



「Hello 咁多位，我叫Ivan，以前係劉sir 嘅同事嚟㗎！我而家係三叔嘅電話設計部主管，如果大家賞面嘅話，我可以私人帶大家喺度參觀㗎！」佢笑口噬噬噉講，而我同咁多位學生都係以尷尬嘅神情望住佢。

唉，邊叫佢當年咁蠢，要我日日省佢，佢先會咁大怨氣啫。唔鬧佢嘅話就我畀人鬧㗎喇，出得嚟做都應該明白呢個道理啦。

「嗱，呢一部就係我哋公司嘅產品，……，仲有呀，呢部呢，就係呀劉sir 同埋我一齊喺舊公司設計嘅，不過就畀呢度賣咗，你睇吓，係咪好殘舊好核突呢？跟住呢度，呢度呢度，呢啲機款就我有份整嘅，最新嘅呢部我就已經唔使落手落腳整喇，都係負責監督同審核呢啲管理工作。」

「你哋嘅劉sir 以前好勁㗎，佢好勤力嘅，嗰時仲要我哋成條team 通頂喺公司瞓嘅，如果有繼續做落去嘅話，佢都應該高職位過我喇，哈哈！」君子不計小人過，我唔會正面同佢駁火嘅。

「係囉，以前同你一齊搏殺真係好開心嘅啫，見到你而家做到噉高職位我都好自豪呀，正所謂食得鹹魚抵得渴，我都知你一個人離鄉別井過嚟打份咁chur 嘅工真係好辛苦㗎喇，我年紀大喇，所以教下書打份工舒舒服服就得㗎喇。」

好彩，人哋貴人事忙，隔離個祕書就提佢話要開會，唔得閒同我玩喇。

「哦，我有啲嘢做，呢張係我咭片，遲啲聯絡呀！拜拜！」佢扮嗮日理萬機噉走返去office。

「好呀，唔阻你喇，拜拜！」



我將張咭片隨手放咗入袋到，慶幸個瘟神終於走咗。