我中出咗副校: 78. 攝影師

過咗一排，飛機嘅位置已經分配好，而我哋亦開始陸續上機。

Cherry 同我嗰班其中一個人坐，Miss Chan 自然就同 TA，我就同領隊坐。

兩個男人一齊坐，可以有啲咩事發生吖，大家咪各有各做囉。

因爲學校旅行多數搭因航嘅關係，呢程機係有戲睇嘅，仲幾新淨，我就揀咗子華神幾年前好無厘頭嗰套戲，隔離嗰個就好似睇啲唔知咩藝術西片，仲擰轉望住睇緊書嘅Miss Chan，擺明就想扮有品味啦。

我望完佢一眼之後，佢亦都啤返轉頭，對子華神視以一個鄙視嘅眼神。唔係當咗我係假想敵下話？



我冇佢噉得閒，就冇再理佢，直到飛機抵達首爾。

印象中，好似有個前女友同我去過呢度一次，不過都係十幾年前嘅事喇，嗰時仲叫漢城嘅。

去到當地，已經係中午，我哋食咗個唔好食嘅韓式晏晝飯就去咗咩仁川經濟自由展覽館，睇班人點樣話自己好威。

其實帶團真係唔難，因爲講解呢啲嘢從來都唔係老師嘅範疇，係頻頻撲撲辛苦啫。

食埋個晚飯之後，就自然去啲後生女最鍾意嘅shopping 地區，啫係東大門喇。



shopping 呢家嘢我又係完全冇興趣，旨在去啲特別啲嘅地方散下心嘅啫。

「劉sir，你睇下，呀oppa 好有型呀！」班學生妹雀躍噉嗌。

老實講，我就真係明白唔到啲韓星有幾靚仔喇，個個都差唔多樣，仲要梳埋個890年代郭富城頭。

「車，我讀緊書嗰時都係噉嘅樣啦，尤其是係個髮型，都唔知點解而家會興翻。」我搭唔到嗲，咪求其講句噉嘅說話囉。

「哈哈哈哈哈——」一陣笑聲傳來，只見個個學生都笑到見牙唔見眼，尤其是係Cherry。



「劉sir，你唔好咁幽默啦，你邊忽似呀T 呀？」佢指住商店入面嘅小白臉海報。

「總之佢哋個髮型一定係抄香港嘅明星，我話嘅！」費時同班花癡少女喺度嗌交。

另一邊廂，兩個女Miss 因爲冇金錢上嘅限制，所以好開心噉肆意買衫，跟屁蟲嘅領隊就緊追其後。

好囉，噉我咪繼續睇住班學生囉。

話明係科技遊學團，當然就要去嗰棟奇形怪狀，好似UFO 嗰個商場啦，而男人神聖嘅責任都交託落我手上，亦即係影相。

一個個學生妹排住隊等我幫佢哋影相，畢竟我都叫做食過下夜粥，喺攝影呢方面努力過㗎。

「劉sir，你影相影得咁靚，你另一半一定好開心嘅啫！」因爲我從來冇提及過自己嘅感情狀況，所以大家都唔清楚我結咗婚未。

「哦。」感情問題，我向來都唔會回應。



「你都一齊影啦，不過要幫手渣機喎！」可能係因爲我太好人嘅關係，所以佢哋都同我幾熟。

所謂好人，其實就係唔理佢哋，讀到書就得嘅教書策略啫，唔通好似班阿婆老師下下都針到實咩。

就喺呢晚，我同Cherry 就多咗張除咗班相以外嘅相喇。