我中出咗副校: 79. 冇咩嘢做

濕完平，就自然係返酒店嘅時間，學校慣咗將啲遊學團定到好早完，啲行程鬆動啲，去多日就收多日錢呀嘛。

好彩嘅係，學校喺對待員工方面都毫不吝嗇，所以我哋四個老師就好好彩有自己房，唔使同啲三唔識七嘅人瞓。

因爲男老師去查房就唔係太好，所以我變相成晚都好得閒，自然可以自己出去酒店玩到幾點都得啦。

今日始終係第一日，就唔要太哽喇，去下睇風景算，夜生活嗰啲留返去中間嘅日子先。

我搭住地鐵去鷹峰山，都唔知嗰啲垃圾旅遊網介紹夜生活會介紹埋啲死人行山景點㗎。



不過，難得有免費旅行去，我就唔會蝕咗個機會畀學校嘅，所以咪搵啲嘢做下啦。

好彩嘅係，辛苦行嚟山頂，城市嘅景色又真係幾迷人，咩樂天塔，漢江，四條大橋都可以一眼睇曬。

原本我仲以爲呢個行程淨係要一兩個鐘，點知要搞成兩個幾鐘，直到我喺地鐵站見到一個特別嘅人。

「咦，劉sir，你又會喺度嘅？」

歌都有得唱啦，「地下鐵碰着她」，又真係畀我見到熟人。



眼前咁啱得咁橋就係Miss Chan，縱使喺個擠迫嘅環境入面，佢都揸住嗰本村上春樹嘅唔知乜書。

「哦，我見第一日冇咩嘢做，所以出嚟行吓啫。你都係呢？」

「係呀，我去咗漢江，隔離有間cafe 一路飲嘢，一路睇書，好舒服㗎。」

「哦，咁啱呀，我都係去咗漢江嗰頭睇景。」

「可惜吖，一陣間就要check 房，所以出去玩得兩個鐘。」



「噉都係，辛苦你喇。」

「唔。」

原本我返到酒店，明明可以沖涼梳洗，再睇吓片，點知一個電話就將我嘅計劃抹煞嗮。

「喂，劉sir，可唔可以嚟我間房呀，啊啊啊！————」一陣刺耳嘅女高音從聽筒傳出，搞到人差啲聾。