我中出咗副校: 77. 三文治

喺我攞住幾個包返嚟之際，Cherry 已經到咗。

佢着住學校要佢地着嘅鴨仔團T shirt，下身同Miss Chan 一樣着住貼貼地嘅牛仔褲，身邊一個人都冇，淨係得個細嘅喼。

果然佢哋兩個路線一樣吖。

「早晨，你咁早到嘅？」我隨口問。

「早晨吖劉sir，我不嬲都準時㗎啦！你買早餐呀？你唔食過先嚟？」佢用住嗰個典型嘅招積樣講。



「趕時間吖嘛，仲有其餘兩個包係領隊同Miss Chan 嘅，我幫佢哋買埋啫。」我冇繼續回答佢，就將個包遞畀傾得好開心嘅領隊同Miss Chan。

好似眼尾梢到佢攞咗個食物盒出嚟，不過我都冇咩空閒理佢，話嗮帶團唔係你哋班鹹濕仔諗到咁美好。

喺剔完名，分組，擺行李之後，我哋終於起行，差唔多要準備進入禁區。

「死喇劉sir，我今日冇咩胃口，食唔到三文治呀，一陣間帶埋個三文治入禁區又唔係咁好……」因爲佢分咗喺我嗰組，所以就偷偷地扮嗮可憐噉同我講。

「噉唯有掉咗佢囉，你哋平時食唔嗮學校啲飯都係噉㗎啦！」我不嬲好珍惜食物，不過班學生平時都嘥開嘢㗎囉，我理鬼得佢哋。



「下？噉樣好嘥㗎喎！其他嗰啲同學我又唔算好熟，佢哋會唔會食㗎？」

「得喇，噉你而家想點解決？」呢樣又唔得，嗰樣又唔得，噉你想點先？

「你幫我食埋佢呀！」佢央求住我嘅幫忙。

唔係呀話？

「個三文治你食過㗎喎，好唔衛生啫……」男女授受不親，在情在理，我都無理由食㗎，除非我係牆國嗰啲老師，要跟從偉大嘅祖國嘅啫。



「掉咗佢啦，冇時間喇，頂多我幫你掉埋佢。」成班大隊都趕時間㗎，就算你又叻又靚唔代表你有特權嘅啫。

「下，please lah—— 食啦，我唔想望住自己親手整嘅嘢畀人掉咗落垃圾桶呀，更何況呢舊三文治我拆都未拆過。」佢拎住盒入面真係攞住保鮮紙包住嘅水汪汪嘅大眼睛朝向我，可憐兮兮嘅模樣令人心軟。

「唉，是但啦。」男人老狗，唔想同啲細路女亞吱亞咗呀。

「好嘢！」佢遞咗個普通size 嘅腿蛋治嚟，而我都因爲趕時間用咗一分鐘食完個三文治。

火腿煙韌得嚟又唔太鹹，至於滑蛋唔單只唔硬，更加係滑嫩唔油膩，加上鬆軟嘅白麪包，完全就係好食嘅代名詞。

當然啦，我係唔會將內心嗰句家燕姐嘅獨白講出嚟嘅，畀人睇到仲得了嘅。

「嘩！咁快嘅！食嘢咁快，仲要食完個包食三文治，怪唔得知劉sir 你有個肚腩仔啦！」佢又用嗰個平時攞嚟窒人嘅笑容望住我，就好似隻史迪仔噉，個樣奸得嚟又細細粒，幾可愛噉。

「仲講，入去喇！」雖然我平時畀班學生窒慣，但都唔代表我嘅弱小心靈唔會因此收到創傷㗎嘛！



與其話入女校教書係調教緊一班純情嘅綿羊，倒不如話自己係畀一大班餓狼圍住嚟噍你，根本成班學生都係欺凌緊老師嘅。

雖然係噉，但我同佢同樣漾起一個莫名嘅笑容。