今日我開始左對公司啲同事進行復仇大計: 第九十七節
阿油嘅老表阿虎，自從喺我地正式開始營運隻game之後，就一直代我地擔當住打雜同跑腿嘅角色。由於佢依然係食阿油嘅住阿油嘅，所以我地就唔洗出糧畀佢。由於呢排阿秀成為左網上當紅人物，由班毒男口中嘅清純妹妹，變左一個畀老細包嘅風塵女子。為免佢平時出街嘅時候佢會受到騷擾，所以我要求阿虎要貼身保護阿秀。不過無幾耐我就發覺我嘅擔心係多餘，因為自從畀人改左個花名叫公廁之後，阿秀唔好話出街，佢連屋門都唔想出。莊神知道左之後大為震怒，佢要求我要盡放解決件事，如果唔係佢就會連解決左我。我初初仲天真地打算反過來要求莊神以高層嘅身分，去施壓要Valarie收皮，但點知原來Valarie已經無喺公司度做。既然阿虎唔需要去保護阿秀，我就要求佢同我一齊去跟蹤同監視Valarie。真係估唔到喺辭左職之後，我都仲要花心思去對付Valarie，本應以為當日幫Evans上左位之後，我就同佢各不相干，但點知佢對我都仲係念念不忘。由於Valarie除左辭左份工外，佢就連屋都搬埋，阿油又喺網上起唔到啲咩料出黎。苦無對策之下，我唯有又向公司入面嘅舊同事求助。我第一個搵嘅人係Daisy，但其實喺搵佢嘅時候我都有個隱憂，就係當日我有錢嘅時候搵唔到佢還錢；到我而家又因為呢件事搞到收入大減啦，我又怕佢呢個時候向我追數。不過點都好啦，為左解決Valarie，我都係要硬住頭皮去搵Daisy。不過唔知點解，我打左好多次電話Daisy都係唔肯聽，唔知隻哈比人係咪掛住拎隻魔戒去融，所以唔聽電話。喺咁嘅情況下我只唯有親自去佢屋企度搵佢，喺佢屋企樓下等左唔係好耐，我終於見到佢。但唔知點解佢見到我之後，就好似見到鬼咁調頭走。我見狀即時上前追住佢，但係唔知點解佢死都唔肯停低，情急之下我就拉住佢隻手唔畀佢走，佢即時好大反應咁話：「死變態佬，你唔好再捉住我，如果唔係我大叫非禮架。」面對住Daisy突如其來嘅態度轉變，我都只有即時縮手退後，目送住佢離開。
無幾耐我就收到Daisy嘅message話：「我真係睇錯左你，你竟然為左錢去荼毒啲青少年。我真係好後悔借左錢畀你去做呢件事，我覺得自己好似做左幫兇咁。不過就算你還錢畀我，我都係唔會要你啲污糟錢架。Valarie真係講得你好啱，佢話你變到為左錢就咩都做得出，你知唔知Valarie有個親戚嘅仔，就因為玩左你果隻game學壞左，佢原本係品學兼優年青人，喺玩左你隻game之後真係走左去做扯皮條呀，迫良為娼，你收手啦James。」Daisy果然保持住佢一貫嘅IQ智商，Valarie呢啲咁無稽嘅大話佢都相信。不過既然佢開到聲話唔洗我還錢，都算係一件好事呀。既然Daisy幫唔到手，我就剩返唯一一個幫手文員輝。阿輝聽到我有求於佢之後，佢好興奮咁出黎見我。無見文員輝一排，佢依然都係一副猥瑣相，當街邊有靚女走過，佢都會即時用眼神去強姦人，不過最緊要係佢幫到我。我一黎就開門見山同佢講，我要知道Valarie下落。佢聽到我嘅請求之後扮到一臉為難咁話：「我地大家咁老友，你叫到我幫我點會唔幫你。但唔知點解，我真係唔記得左Valarie當日辭左工之後，佢話會去邊一度呀。」我一睇就知佢咁樣問得，係想要報酬。我反問佢：「咁你要點先會記得返呢？」佢突然淫笑起黎話：「我其實之前都有參加你地隻game個活動架，不過贏唔到，無得同你個細妹食飯。不如咁啦，你畀我同你個妹食一次飯，我咁開心一定會記得返架，不過我講到明呀，到時食飯果陣佢要餵我架。」佢問我攞錢我就話無姐，但佢只係又要我個妹出賣色相姐，我欣然接受。喺同左我個妹食左餐飯之後，佢就如數家珍地將我離開之後，Valarie嘅所有事都話晒畀我知。其實我都知道Valarie上唔到位之後，佢應該會心灰意冷要離開間公司，疊埋心水去嫁人。Valarie係就係打算唔做嫁人，但原來佢嫁嘅對象唔再係果個鬼佬，相反佢又打算翻頭嫁，去嫁畀當日畀佢玩到出家嘅戇直醫生。
我真係唔明果個醫生係咪讀書讀壞左個腦，當日明明畀Valarie玩到覺得生無可戀要出家，但而家竟然再娶多一次呢個賤婦人。喺我同阿虎搜索左一輪之後，我地終於喺個醫生嘅醫務所附近見返Valarie。由於就黎又做醫生太太，Valarie穿戴得十分風光體面。我地一直跟蹤左佢幾日後，發覺佢嘅活動除左shopping買衫之外，就係同一班操大陸口音嘅人聚會。由於果班人係操大陸口音，所以我安排左阿虎去埋果班人身。過左一排之後，阿虎返黎向我匯報，原來果班人就係Valarie請返黎嘅打手，而果班人除左喺網上做打手之外，原來喺現實都一樣有做打手。每次喺任何示威之中，呢班人都一定會出黎，自稱係代表香港人，因為睇唔過眼啲社運呀民主派呀搞亂香港，所以要出黎撐政府。而喺我同阿油佢地翻睇左無數個示威短片之後，發覺呢班人無論係因為民生定政治示威都好，佢地都一定會出黎撐政府同批判民主派，而且每次都得果幾句對白。根據阿虎所講，Valarie而家擔任嘅角色就係佢地嘅判頭，至於背後係咩人出錢請呢班人，阿虎就欲言又止咁，不過其實係咩人都唔關我事。我只要知道Valarie嘅角色係做打手判頭就夠，不過一如我所料，阿虎話班打手咁勤力批判我，係出於Valarie嘅個人要求，班打手因為怕Valarie唔畀其他job佢地做，所以都要義務去幫佢。我聽到之後真係不禁失笑，我估唔到呢個世界竟然會有義務打手呢樣嘢，真係大開眼界。不過喺知道左Valarie而家嘅底細之後，我就可以開始反擊。