今日我開始左對公司啲同事進行復仇大計: 第九十八節

對付網絡打手，我唯有同樣地動用網絡力量。想話喺網上唱好人就話難姐，要唱衰一個人其實都唔係話太困難，特別係網民們最痛恨嘅打手。早排Valarie曾經行錯左一步棋，佢見喺網上周圍鬧阿秀同我個妹係公廁，我隻game都依然繼續營運後。佢嬲起上黎就決定將戰場移師到現實，佢一連幾日，搵左班打手喺我公司（亦即係阿油屋企）樓下示威。由於阿油同阿虎兩個本身同鄰居關係都麻麻，正確黎講係啲鄰居一向都當呢個毒男同無業遊民唔存在。所以阿油根本唔在意啲鄰居之後點睇佢，雖然有鄰居曾經因為覺得有班人喺樓下示威好麻煩，所以出聲叫過阿油快啲搞掂佢，不過我地亦無打算過顧班鄰居嘅感受。相反，我地搵左阿虎匿埋喺暗處，將佢地幾日嘅示威過程都拍低，就連班友喺示威完收工嘅行蹤阿虎都影低埋。而公司一眾同事亦都好落力地，喺其他示威場合新聞片進行認人後，我地確定左呢班人係打手常客後。就將阿虎拍低嘅片段，再加埋啲新聞片段剪接埋一齊。而近排成為網上熱門搜尋關鍵字公廁嘅細妹，亦都充當左呢段片嘅旁白。就係咁，一條揭露職業打手醜態嘅紀錄片，好快就喺網上瘋傳。而我地就由荼毒細路，敗壞社會道德嘅人渣；搖身一變成為受到打手迫害同被奪去創作自由嘅受害者。喺段片廣傳之後，不過佢手下班烏合之眾喺見晒光之後，果班以為自己幫助維持社會道德嘅人士，就即刻散水同班打手劃清界線；而班打手亦都非常驚青，不斷去搵Valarie商量。而好彩佢地死蠢地去搵Valarie，阿虎今次亦都非常盡責地將呢啲精彩片段拍低左。其實我都無諗過Valarie會喺風頭火勢之下仲會現身去應酬呢班打手，Valarie可能係急住搵佢地共商下一步可以點對付我，又或者係佢需要安撫呢班職業過街老鼠啦，無論原因係點。我都拍低我需要嘅片段，而喺上一次紀錄片part 1大受歡迎之後，Valarie將會喺part 2度上鏡。不過剩係喺網上播放呢條part 2未能夠消我心頭之恨，為左隆重其事，我決定去搵一個人幫手。

 

「在公，呢個係你公司前僱員，你有責任處理仍；在私，你欠我一個人情，我而家就要你還畀我；在情，佢都有唱到Jasmine，講到佢係啲唔三唔四嘅女人；在理，佢地呢啲打手同你地社運熱血分子可以話係勢不兩立。在公在私在情在理，你都無唔幫我嘅理由。」雖然唔係好耐之前，我已經講到同Evans恩斷義絕咁，不過我又急需要佢喺社運界嘅號召力。再講，我份人不嬲都無乜廉恥架啦，Evans喺我一輪咀講出啲似是而非嘅大道理之後，一時間都唔識畀反應。而唔知係咪為左見我一面，喺知道我去搵Evans後亦都趕黎嘅Jasmine，亦喺一旁幫我手勸Evans：「Evans呀，果班人係衰人黎，我地好多朋友之前都畀佢地抹黑過，話係廢青同社會垃圾。就算唔係幫James呢個賤人，我地都好應該懲戒一下佢地呀。仲有果個Valarie呀，佢激到John好嬲呀，佢話埋阿秀係公廁，你都知你Uncle莊有幾錫阿秀架啦。你咪唔好當係幫賤人James囉，你當為左你Uncle又好，為左社會公義又好，你好應該幫手對付Valarie呀。」雖然Jasmine不斷將賤人兩字加喺我個名前面，不過我都好明白佢係幫緊我。Evans經唔起Jasmine同我嘅說服，佢無力地問我：「咁你想我點幫你呀？唔通你要我借錢畀你搵人打佢斬佢？我唔係唔想幫你呀，不過我真係唔知我可以點幫你。你咁醒目，以前都只有你幫我，我自問真係無能力幫你。」我聽到佢咁講後，輕輕一笑：「咁你又唔洗咁灰心喎，我樓下個阿伯養左隻狗好多年，平時見隻狗剩係食同訓架咋。但點知早排阿伯死左，隻狗可能因為無人餵覺得肚餓，都識得大大聲吠，等人黎幫阿伯收屍呀。隻狗都可以喺關鍵時候發揮作用囉，更何況你Evans，你今時唔同往日架啦，間公司你睇架啦，你係大粒佬黎架啦。更何況以你昔日喺社運界嘅地位，你絕對可以幫到我。」一直同我一齊說服Evans嘅Jasmine，喺呢個時候都加把咀鼓勵Evans：「你而家唔同晒架啦，你睇下，連賤人James都要搵你幫手。以前就話你欠左佢人情姐，今次之後，你地就無拖無欠架啦，你肯幫佢就得架啦。」喺連要點幫我都未知之下，Evans無奈地入左局。

 

喺得到Evans應承後，我亦都要再次面對在場嘅Jasmine，人地都咁落力幫我，我無理由唔畀返個交代對方。Evans喺離開我地之前，都仲係一臉迷惘，相信佢都唔係好明白，點解明明之前先為左Jasmine同我反左面，但而家又會因為Jasmine說服下應承幫我。面對住Jasmine，無恥如我都不禁流露出歉疚，我直頭唔敢扣抬頭直視佢。過左好耐，我終於鼓起勇氣問佢：「其實以你嘅質素，大把好過我一萬倍嘅男人等住你啦，你做咩要咁幫我呢？由內至外，我都諗唔到自己有咩好處值得你鍾意。」佢冷冷地反問我：「你覺得呢？我想聽你講真話，如果你仲有係個人嘅話，就唔好當我白痴用啲廢話敷衍我。」嘩，講真話真係我嘅弱項，不過既然Jamsine叫到，我都唯有硬住頭皮去答佢：「拿，我估下架咋，估錯左唔准嬲架。係咪因為你大小姐由細到大要乜有乜，但反而我呢啲貨色竟然咁對你，所以挑起左你嘅好勝心呀？」我初初以為佢聽到我咁講，會好嬲好大反應。點知佢竟然微笑左一下，之後同我講：「今次係你第一次同我講真心話。係呀，我唔否認我鍾意你某程度上可能係因為好勝。不過我唔同你，我鍾意一個人只係憑感覺，我唔會分析自己點解會鍾意你，所以呢個問題我無答案。不過由細到大，都無人迫到我做唔鍾意嘅事，亦無人阻到我去做我自己想做嘅事。我幫你只係出於自己嘅心意，放心你無欠過我，我如果係唔想做你亦都唔會迫到我做啦。不過今次亦都係我最後一次幫你，我雖然唔知點解會鍾意你，但我就好清楚你唔會鍾意我，我知你心入面有第二個人。唔好咁婆媽啦，快啲去做你應該做嘅嘢啦。」聽到Jasmine咁講後，我第一次感到對一個人無以為報，係幾咁沉重。其實Evans真係好幸運，佢唔知Miki為佢付出左幾多，所以佢無需要去擔心自己有幾欠佢。我就唔同，我好清楚眼前呢個要風得風嘅大小姐，為左我係有幾屈就自己，需要佢仲開解我話我無欠佢，不過我心知肚明，我對佢的確係無以為報。