今日我開始左對公司啲同事進行復仇大計: 第九十六節

喺無乜選擇之下，開心骨場正式墮落成為踩界咸game。喺隻game入面，玩家除左可能正正經經地經營正統骨場外，仲可以畀錢去unlock神秘服務。果然呢個系統一出，隻game即刻大受歡迎，一班青春期小男生都好踴躍拎零用錢去投資落隻game度。果然真係好阿油想講，要成功就唔可以顧及太多社會道德同怕有失身分。喺第一次經歷左少少甜頭之後，我好開心地再次send email畀Miki報喜，但好可惜地都係沒有回應。由於終於叫賺左啲錢，我急不及待約Daisy出黎想還錢畀佢。其實我係想襯早還左呢幾千蚊畀佢先，到我第日真係賺大錢啦，名成利就啦，咁我咪真係要十倍還返畀佢？到時無藉口唔報恩，咁樣好蝕架嘛。當我滿心歡喜想約Daisy出黎還錢，兼平平地請佢食餐之時。唔知點解我WhatsApp畀佢十次八次都係無回覆，我心裡覺得有啲奇怪，而家明明係我要還錢喎，邊有債主會調返轉避個債仔架？不過由於對我黎講其實都無咩損失，所以我見佢無覆我後我就無理到。除左Daisy之外，我另一個急於還人情債嘅女人就係Jamsine，經過上次我拒絕左佢嘅交換條件，再經過同Evans反面之後，我其實一直都唔敢再搵佢。講真，我真心感謝佢對我咁好，不過耐何我同佢真係兩個世界嘅人，我唔想浪費大家嘅時間，因此我一直都好怕再面對佢。我用左好耐時間去寫一個message想去多謝佢，但我根本唔知應該講咩好，反正點我都係欠左佢，既然係咁，我就決定繼續欠佢，直到一日我諗到可以點去報答佢先再算啦。其實而家都只係啱啱開始，如果想隻game繼續賺錢，我相信都真係要好花時間去經營。阿油喺隻game剛剛有錢賺之時，已經急不及待辭左份工全身投入，想成為IT界鉅子。我有問佢喺辭職嘅時候，Daisy同Evans果啲有無同佢講過啲咩？但原來阿油同我當日辭職一樣，都係是但send過email去就無再返過工。不過由於佢對公司黎講都係可有可無，所以相信公司都應該好欣然接受佢嘅辭職，而唔會同佢計返咩通知期之類。

 

但好景不常，正當我地仲沉醉喺第一次賺錢嘅喜悅之時，我地就面對住另一個大困難。由於我地隻game嘅踩界風格吸引左好多青少年去玩，所以我地終於成功引起左傳媒嘅注意。不過同我地原先諗嘅好唔同，班傳媒無打算將我地塑造成咩成功創業八十後，相反我地竟然係無意中成為左為錢教壞細路嘅賤人。的確我地由決定將隻game轉型之後，又真係無諗過會唔會茱毒青少年，我一向覺得教仔嘅責任係喺父母身上。但當畀傳媒公開指責後，我真係諗唔到點樣可以去否認。呢個時候我唯有發揮我一貫厚面皮嘅性格，每次有記者打電話搵我回應，我都例必會答佢地話：「其實我地都係想畀啲青少年，喺玩遊戲之時學到點樣管理同經營一間公司姐。至於果啲要畀錢先可以玩到嘅內容，我地都寫到明十八歲以下係唔可以購買，至於點解仲有青少年會玩到，咁就係佢地家庭管教嘅問題啦。」我呢啲官腔答法雖然係人一聽都知係廢話，不過香港啲高官都成日係咁架啦，做錯嘢之後求其講兩句，將責任推下其他人身上就過到骨。我初初都以為過多一排，當啲傳媒搵到其他嘢去攻擊之後就會忘記左我地。但喺我無為意到之時，網上已經有一股自稱維持社會道德嘅勢力開始對我地窮追猛打。有一班自稱係網民自發嘅家長會，喺網上鋪天蓋地地怒罵我地教壞佢地啲仔女。而且又唔知點解有一班唔多關事嘅網友，都受到佢地嘅感召下一齊登上道德高地去作出批判。而首當其衝畀人批判得最多嘅就係我個妹。由於佢當日幫我去以自己獎勵班毒男，同左個畀得最多錢嘅毒男食左餐飯之後。果班道德高人就開始話我個妹係妓女，而我就係馬伕。我聽到佢地咁樣講，我真係好痛心，我其實唔介意佢地話我個妹係妓女，因為某程度上我都好認同，不過畀人話係馬佚先係令我最介意。大佬呀，如果我真係做馬伕，將自己嘅親生妹妹當係搖錢樹咁賣畀唔同男人，我應該真係發左達，而唔會好似而家咁霉呀。

 

我其實都有小小擔心我個妹喺咁樣畀人拎出黎講之後，佢會覺得介意同不快，怕第日嫁唔出之類。點知佢同我講話自從佢突然成為左網上紅人之後，竟然有啲性用品公司出錢畀佢做代言人，佢作為一個好食懶非嘅死港女，有咁多企喺度講兩句就有錢收嘅工作機會，佢根本係開心都難唔切。相反我就慘，又畀人話係馬佚，到我個妹而家真係可以出賣下色相賺下錢啦，佢又唔會分返啲畀我架喎。呢個發展可能都大出立心攻擊我地班人嘅意料，所以喺之後佢地都沉寂左一時。不過過左一排，班唔知喺邊度冒起嘅道德軍團又開始攻擊我地。今次佢地嘅攻擊目標係阿秀，而且佢地仲喺唔知邊度影到阿秀同莊神出入嘅照片，將阿秀講到好似係畀人包起咁。由於呢件事影響到阿秀呢個清純少女，我終於感到有啲內疚。而且喺班道德軍團嘅呼籲之下，好多家長都禁止自己啲小朋友去玩我地隻game，令到我地收入大跌。喺在公在私之下，我都需要去認真應付一下呢班網上道德軍團。喺阿油同班ive仔發揮佢地網上起底威力之後，佢地搵到呢班所謂要維持道德嘅人，當中只有少數係家長或者咩正人君子，而大部入人都係受薪網上打手。而再經左一輪明查暗訪之後，我地發現喺背後出錢出力，都要搞死我地嘅人，既然係我曾經嘅宿敵，但事實上我已經開始違忘嘅人，佢就係Valarie。