今日我開始左對公司啲同事進行復仇大計: 第九十五節
我一直因為果分我五成嘅條件，而十五十六唔知好唔好真係搵Jasmine幫手好。而當我喺做唔到決定之時，我一直避而不見嘅Evans竟然為左呢件事踩上門去我屋企搵我。佢怒氣沖沖咁上黎，雖然都成大半年無見，但睇黎佢完全無同我聚舊嘅意思。佢一見到我，就質問我：「點解你要咁對Jasmine，利用完佢之後，佢只係要求同你認真發展姐？點知你又無反應，你當我好朋友係咩呀？」我本身想講：好耐無見，你幾好嘛？但睇黎都無機會講，不過咩認真發展？佢而家係要同我對分一半喎，分我身家都叫同我認真發展？佢繼續鬧：「一個女人肯無條件為你，佢都係想要返個名份姐，佢幫左你咁多，想同你發展，仲肯幫你分擔一半，點解你都可以對佢咁無情？」本身我都因為對Jasmine心存愧疚，再加上之前話晒都同Evans不辭而別，所以唔想反駁佢，但聽到佢鬧我無情我真係忍唔住。仆佢個街，佢有咩資格話我？Miki為佢搞到工都無埋，佢仲反而覺得自己大義滅親做左好人。就算佢遲鈍feel唔到Miki鍾意佢都唔緊要，但果陣佢真係篤Miki出黎，我一諗到呢度就嬲到不得了。我有一剎真係差啲忍唔住仲真相講出黎，但最後我都係將怒氣押下，因為如果我而家先講出黎，就會令到Miki前功盡廢。我深呼吸左一下之後，冷冷地同佢講：「好呀，你而家同我講咩無情無義呀嘛。我話晒都係你恩人。你而家咩態度同我講嘢呀？」原本企喺道德高地責備我嘅佢，頓時語塞。我繼續講：「我從來都無利用過Jasmine嘅感情，我亦都無應承過佢啲乜。一直以黎都係佢主動要幫我，我唔認為雖然向你過問。就好似我之前幫你都係出於自願，如果要為左呢啲事出聲，點都未輪到你黎同我講啦掛？」佢繼續語塞，可能佢真係覺得我因為當日對佢不辭而別，所以以為我會企喺度畀佢鬧。佢無諗過我竟然會咁唔客氣，狠狠地反咬佢一口。沉默左一陣之後，佢有啲軟化，佢平心靜氣咁問我：「你意思係你以後都唔會認真對Jasmine？」不過我依然火上心頭，所以都係冷冷地回答：「呢啲係我同佢之間嘅問題，我唔會向第三者交代。」
對於我嘅答案，佢顯得有啲不知所措。喺隻方沉默左一陣之後，佢就默默地轉身離開。其實同佢曾經一場兄弟，我都唔想同佢搞到咁，不過由於我一見到佢就諗起Miki為左佢付出咁多，我發覺我真係接受唔到佢，我寧願同佢反面，大家以後無拖無欠都唔想再見到佢。不過Evans嘅出現令我決定，無謂再欠Jasmine咁多，我最後嘅決定都係唔會搵Jasmine幫手。不過無左Jasmine幫手，我又不忍要阿秀一個小妹妹出賣色相。我一時之間都唔知點同阿油同Taylor交代。正當我喺屋企好苦惱地諗可以點算之時，頭先聽到我喺廳同Evans鬧交，但無現身嘅港女細妹，行左出黎問我：「嘩你已經無乜朋友架啦喎，呢個Evans都已經算係你啲朋友之中唯一一個正常人，你仲要趕走人。果然你呢啲痴線佬都係唔適合同人相處。」其實自從開始搞隻game後，我經常都喺阿油屋企埋頭苦幹，好少見到我細妹。不過其實我減少留喺屋企嘅最大理由，其實唔係真係咁忙咁多嘢做，相反我係怕我個妹會問我攞錢，又或者會由佢口中畀到莊神知道我有幾不濟，所以我一直無乜同佢講過嘢。不過我而家又未諗到點同阿油交代，我連佢屋企都唔去得。我唔留喺屋企唔通真係去公園坐咩，所以我人生第一次，坐低將自己嘅苦況同我個妹傾訊。而佢都破天荒第一次靜靜地聽我講，途中無打斷過我或者挖苦我。喺聽完我講之後，佢唔出聲諗左一陣，之後佢露出左一個狡猾嘅笑容。佢呢個笑容令我有啲心寒，因為九成都唔係啲咩好嘢。佢同我講：「你要搵女出黎同啲毒男攬下抱下食下飯咋嘛，你一早出聲咪得囉。其實只要你之後識做，你要我同啲毒男咀埋我都肯架，反正佢地都唔敢再進一步搞啲咩架啦。一世人兩兄妹，我唔幫你邊個幫你呀，不過你之後要識得感恩呀，你知我架啦，其實都唔願返工乜滯，最好有你養埋我啦，我而家就幫下你手，等你第日有錢囉，咪可以盡做人阿哥嘅責任，喺我嫁之前養起我囉。」
我畀我個妹嘅提議嚇到唔識得畀反應，我呆左一陣先回過神。其實諗深一層，反正如果我第日成功左之後，都唔會少左我個妹一份架啦。而且佢係唯一一個我要佢幫手之後，我唔覺得會欠左佢嘅人。再講，本身佢份人都無乜廉恥架啦，呢啲出賣色相嘅踩界活動，唔搵佢做搵邊個呀。就係咁，我嘅問題終於解決左，雖然我交唔到Jasmine出黎，不過交左自己細妹，阿油同Taylor都覺得好滿意。而且我地嘅計劃都進行得算相當順利，我地隻game嘅一眾血氣方剛玩家，一聽到可以一親我細妹香澤，都好努力地買隻game入面果啲道具。而且估唔到喺game入面真係有班玩家，已經經營出有一定規模嘅骨場。我雖然唔覺得有咩成功感同滿足感，相反仲喺心入面暗笑有一咁認真去玩呢隻爛game。但喺我細妹嘅幫助下，我地隻game終於有啲回本嘅跡象。而喺呢個時候，阿油同我講，話如果我地喺隻game再加啲鹽花，即係再踩界啲畀啲玩家可以經營色情場所的話，一定賺得更加快。佢同我講話：「剩係得正經骨場，啲玩家玩得唔夠過癮架。不如我地畀啲玩家經營埋飛機場啦，到時我地就唔只回本，大賺都得呀。」初頭聽佢講飛機場之時，我都有啲一頭無緒，我以為佢食正香港人鍾意睇飛機師空姐電視劇條水，所以想搞埋飛機場。不過我諗左一陣之後，就明佢飛機場嘅意思，應該係指幫人打飛機。雖然我唔係咩高道德人士，不過一時間佢要我地隻game變做咸game，我都未係好接受到，要啲時間去考慮。