今日我開始左對公司啲同事進行復仇大計: 第九十四節

經過無數次嘅失敗，開心骨場終於可以推出第一個版本。由於某個手機平台一見到我地隻game已經唔畀上架，因此我地只可以喺單一平台度做生意。呢件事的確係相當令人洩氣，我地隻game明明無鼓吹色情架嘛，但就偏偏畀人無故打壓。由於我地段宣傳片可以話係相當失敗，所以我地唯有用過另一個方法宣傳。喺我苦苦哀求之下，Jasmine同阿秀同意再次幫我拍片。不過由於資源所限，所以我地只係求其拎部DC仔喺阿油屋企黎影，而段片更加係無內容，同隻game嘅主題幾乎無關，片段中只係打扮性感嘅Jasmine同扮cute嘅阿秀，嗲聲嗲氣地做一段一啲都唔好笑嘅趣劇。我原本都唔睇好呢件事，不過阿油已毒男專家嘅身份解釋，話段片唔需要有內容，只要記住影度阿秀個樣，同Jasmine個身已經夠。由於我自己本身已經無晒橋，亦都無乜錢，所以既然阿油諗度呢個咁慳水慳力嘅方法，我就由佢搞。但當我抱住幾乎絕望嘅態度去做呢件事，點知就有意外收穫。呢段拍得咁差又低成本嘅片，竟然短短時間就獲得幾個出名多咸濕仔嘅討論區支持。雖然初初好多人只係喺我地facebook page留言詢問可唔可以約阿秀同Jasmine出黎影相、又或者出黎造愛，而甚少人關心我地隻game。不過喺我地再次搵黎阿秀同Jasmine拍多幾條內容空洞，只係得佢地兩個賣弄下風情嘅hard-sell短片之後。我地隻game都總算多人download左，雖然據估計我地嘅玩家九成都係男，仲要當中一半係毛都未出齊，正值青春期嘅細蚊仔。雖然唔係如我所料，可以吸引埋平時鍾意上大陸按摩嘅港女OL們，但都總叫行出左第一步。雖然隻game係有唔少人download，不過我地好快就發現根本無乜人會喺隻game入面畀錢買嘢。而且亦好快引申出另外一個問題，就係果班血氣方剛嘅少男，發現隻game原來無色情成份之後，佢地就覺得好憤怒，不過喺各大討論區度話我地掛羊頭賣狗肉，叫到開心骨場，但內容唔可以令到佢地開心咁話。

 

由於有咁多意見要求我地加入開心內客，而喺大股東Taylor強烈要求下，我同阿油都要諗下計點先可以吸引返班咸濕仔。因為喺目前，班咸濕仔可以話係我地唯一嘅客。喺無計可施嘅情況下，阿油向我作出一個非常仆街嘅建議：「其實我一直有觀察網上嘅留言，真係有好多人當左Jasmine係幻想對象，至於係咩幻想……我唔洗講得咁白啦。我覺得可以利用Jasmine…….」喺阿油未講完，我已經忍唔住一拳打左埋去：「呀你條人渣呀，Jasmine都已經無條件幫左我地咁多，我地都無以為報架啦，你仲夠膽話要利用佢？你條人渣真係唔驚畀雷劈架喎。」阿油無因為畀我打左一拳而退縮，佢繼續講：「你唔好同我扮純情啦James，我地無得翻轉頭架啦。係人都睇得出Jasmine對你一往情深，你叫佢做雞養你佢都可能制果隻……拿唔好打住，我打個比喻咋，即係唔係叫佢真係要做雞。喂James你以前連毒男都夠膽販賣，而家只係叫你搵條女幫下手姐，你連我個建議都唔聽完就扮晒好人咁。我地無得返轉頭架啦，你聽我講。你只要叫Jasmine幫手，同啲毒男食下飯就得架啦，最多當眾有啲身體接觸就得架啦。」「我唔係好明咁樣同我地賺錢有咩直接關係，唔通你想搞埋果啲喺game入面洗得最多錢，就可以同Jasmine食飯嘅活動？講得衰啲，如果我地真係咁做。其實同做扯皮條無乜分別架咋喎。」阿油聽到扯皮條呢三個字，好堅定地點頭話：「唔好話做扯皮條，我為左令隻game可以賺大錢，我連賣賣阿虎做鴨都無問題呀。更何況其實好多人都同我地一樣架啦，你估大紅果啲網上紅人真係賣搞笑，賣才華咩，佢地都係賣下身邊啲美女咋嘛，你唔好咁天真啦James哥。你估我地隻低成本製作嘅game唔搞下花臣，真係可以大紅做到第二隻angry bird咩，醒下啦。你可唔可以拿出你以前向同事報仇果種恨勁，黎疊埋心水同我搞好呢隻game呀。」

 

估唔到我都會有一日，反過來畀阿油說服到。雖然明知阿油講嘅係歪理，但我都竟然跟住做。我再一次厚面皮地請Jasmine幫手，但今次佢態度同以前好唔同。之前佢都係表面唔情願，但都係會無條件幫我手；相反，當佢聽到我提出希望佢可以同啲毒男食下飯，或者握下手抱一抱之後，佢好嬲咁問我：「即係你要我為左你隻爛鬼game係做雞？你當我係咩呀？你覺得我份人真係咁開放，可以隨便同人攬攬錫錫架咩？」我原本好想答佢：唔係呀，你識左我無耐就同我又遊車河，又攬攬錫錫咁，都你都好似無乜問題咁。但呢番說話我唔敢講出口，我唯有動之以情話：「Jasmine，當然唔係啦，不過你係呢個世界上對我重好嘅人。我有困難嘅時候，第一個就諗起想搵你求助。如果可以選擇，我當然唔想畀其他男人掂你啦，不過係我無用……」 本身仲係勃然大怒嘅Jasmine，聽到我呢番說話後面色好左少少，不過佢都仲係好惡咁話：「你食屎啦James，你正一衰男人黎，下下都要食住我。不過我都唔係傻架，好呀，我幫你都得呀。不過我一個條件！」我口都疾埋咁問：「你唔係要我以身相許呀嘛？」其實就算要我以身相許，點計都係我賺，又食又拎，不過我心入面始終都係有另一個人，雖然果個人已經離我好遠，所以果一刻我真係擔心佢話要我同佢一齊。點知佢話：「瀟姐一早睇穿你啲衰嘢，就算你而家肯同我一齊，難保你轉過頭就唔要我，我先無咁傻。我幫你嘅條件係，以為你靠呢隻game賺到嘅一分一毫，有一半都要歸我。」嘩我身邊啲女人真係恐怖過高利貸，繼Daisy話要我十倍還畀佢之後，而家呢個Jasmine仲要同我對分。啲人成日話咩紅顏知己，不過我身邊呢班就係紅顏貴利，睇黎我呢啲人情債，可能真係要用金錢去還。