今日我開始左對公司啲同事進行復仇大計: 第十八節

Judy某程度上算係一個EQ幾高嘅女人，每每就算有過一剎失控，佢好快都會收拾心情。要對付佢真係唔容易…呢一排由於忙住對付其他人，我一直冷落左Judy。但其實我一暗地裡都仲有Keep住叫道友權唔好放棄Judy，喺阿權嘅誠意之下，Judy由原本想對阿權下禁制令，變到而家都肯當佢係兵。不過由於阿權啲行為實在係太脫軌，而Judy又好似已經唔會好似啲青春少艾咁，會迷戀音樂家嘅才氣，我諗對佢黎講財氣應該比較緊要。老實講，我唔認為阿權可以打開佢感情上嘅缺口，如果想繼續利用阿權去對付Judy應該就無乜可能，講真呢一刻我對Judy真係無晒計，頭先Miki提出要同我聯手對付Judy，無疑係有助我去打破而家呢個僵局…不過究竟係咩原因，會令到Miki咁突然撕破自己嘅面具呢?而喺時間上最合理嘅原因，就係喺尋日突然出現，同Miki係舊識嘅Evans…咁喺我決定同唔同Miki合作果陣，我首先要起清Evan個底先。

 

聽聞Evans同佢爸爸關係好差，佢爸爸一向唔鍾意提呢個仔。不過睇佢個樣又唔似係果啲鍾意花天酒地嘅二世祖呀。相反佢言行舉止都散發住一種溫文儒雅嘅氣度，而且佢連喺公司由低做起都制，我真係諗唔到點解佢老豆會以呢個仔為恥。不過喺今朝早，我同Daisy食早餐果陣，Daisy畀到啲啟發我，喺談到Evans果陣，佢話：「Evans又靚仔又有錢，應該好多女朋友啦，就連Judy姐尋日見到佢都畀佢迷住呀。不過唔知點解，女仔直覺話我知Evans份人好似好sensitive，而且佢講嘢啲語氣溫柔到好似我一個gay friend咁…」係喎，如果Evans因為性取向問題同屋企人發生爭執，咁樣就好合理啦。唔知點解，我腦海裡突然浮現左一個場面，喺一個大雪紛飛嘅晚上，喺一間雪山上嘅小木屋，屋入面得Evans同一個貌似Twilight入面會閃下閃下嘅白淨吸血彊屍嘅洋漢。由於天氣太涷，Evans又喺滑雪果陣整親腳，所以個鬼佬開始除晒雙方嘅衫想互相取暖…正當Evans欲拒還迎之際，木屋嘅大門突然打開，屋外企住正心急想搜救兒子嘅Evans雙親。Evans父親見到呢個場面之後怒不可遏，而母親就一臉傷心欲絕；而從後趕到嘅細妹，喺見到阿哥同個咁靚仔嘅鬼佬肉帛相見，亦都心生妒忌…諗諗下，我覺得如果他朝有機會，我應該將呢個故事拍成電影，套戲個名可以叫做斷背雪山。

 

為左試探Evans嘅性取向，今日喺公司我不斷埋阿佢身，先旨聲明我唔係歧視同性戀，不過我對男同性戀認知真係好小，我除左不斷問佢有無女朋友之外，我仲喺網上搵左一大堆問題喺lunch果陣問佢。一到lunch我就捉住佢去附近一間餐廳食飯，我知道其實Judy都好想約Evans去食晏，可惜畀我截足先登左一步。喺往餐廳食飯途中，我同Evans經過一檔報紙檔，我問佢：「如果畀你揀，喺流落到荒島度果陣，你只可以揀帶一本雜誌去，你會揀雄風定龍虎豹？」佢聽到之後好緬甸咁笑一笑，之後答：「龍虎豹唔係得啲阿叔先會睇架咋咩？咁我揀另外果本咩風啦。係呢果本咩風係咩事黎架？」呀同我黎扮無知呢一套？有無咁純情呀，定係你個番書仔睇開鬼佬唔睇港男呀？之後我又繼續問佢：「你最鍾意嘅女歌手會唔會係林憶蓮，而男歌手就係黃耀明？」大家可能有所不知，據聞林憶蓮一直係好多本地男同志心目中嘅Diva，至於原因係點解我都好唔知。Evans聽到之後搖搖頭，表示自己無聽開香港歌手。老老實實我對男同性戀嘅認知都只限喺啲最stereotype嘅嘢，其實真係好難試探到Evans係直定孿。不過我唯一繼續硬住頭皮問落去。





 

去到間餐廳果陣，我見到附近有一個著住背心嘅肌肉大漢，而Evans望左佢好耐。正當我心諗今次仲捉你唔到之際，Evans突然同我講：「你有無做開GYM架？我喺美國果陣成日都想操到自己好似果個大隻佬咁，不過唔知點解操緊都操唔到？」做GYM想操大隻自己，我睇你喺想畀大隻佬操咋掛。我決定單刀直入咁問佢：「Evans你而家有無女朋友架，你啲咁嘅荀盤應該日日都畀女圍啦。」Evans聽到我提到女朋友三個字果陣，神情變得有啲憂愁，佢答我佢而家無女朋友。我本身想即刻問咁你無女朋友有無男朋友呀，不過話晒都係初相識，我當然唔可以太單刀直入。我繼續不著邊際咁問佢：「你平時多唔多出去clubbing飲嘢架？下次帶埋我出去玩呀。」點知Evans話：「我去玩通常都剩係同自己圈子嘅人去，雖然剩係得啲自己人，不過如果你有興趣，聽晚你都可以一齊黎架。」仆你個街，又自己圈子又自己人，仲唔係同志？叫我一齊黎？唔通佢都想試探我係咪自己人？我隨即問佢：「聽晚個活動包唔包埋格劍架…」Evans聽到之後失笑問我：「點解你成日問我玩唔玩格劍，乜我個樣好似玩開劍咩？不過我中學時期其實真係學過下fencing…」死啦，fencing會唔會係佢個圈子嘅咩暗號呢？我唯有硬住頭皮咁答佢我中學果陣都有玩開fencing，佢聽到之後好興趣，話搵日大家一齊交流下心得…喺餐飯度我雖然問左好多奇怪問題，不過Evans好似察覺唔到有咩異樣。其實我本身唔歧視同性戀，只不過由於無乜機會同佢地相處，我怕聽晚我會講錯野破壞左成個計劃…不過為左埋Evans身從而探聽到Miki啲野，我聽晚都要硬住頭皮去…