今日我開始左對公司啲同事進行復仇大計: 第十九節
今朝返到公司，照舊同Daisy食早餐。不過唔知點解，當我望住佢果張天真無邪嘅俏臉，我嘅眼睛有啲濕潤。我有預感，過左今晚之後，我嘅人生將會徹底改變。而我同Daisy嘅關係喺過左今晚之後，將會有翻天覆地嘅改變……因此，我格外珍惜呢一餐早餐…平時我都盡量將Daisy嘅早餐嚴格控制喺三十蚊以內，但今日為左令呢一餐早餐變得memeroable，喺茶記買早餐果陣，我諗都無諗就叫侍應將果件多士烘埋底，而且我亦唔再希罕果兩蚊，直接將杯奶茶轉埋做涷飲。你地可能覺得我好傻，大拿拿畀多幾蚊喎，不過我真係好希望今日Daisy可以好好咁食一餐。平時我同Daisy食早餐果陣其實都無乜野講，今日我專登主動同佢講左好多關於自己嘅野，例如：我平時睇開邊個日本動作女星呀，我平時睇藝術片鍾意download黎睇定直接喺線上睇呀，又例如我平時用開左手等右手等。雖然佢都係聽得一頭無緒，不過佢都好努力咁扮有興趣去聽我講。呢餐早餐雖然只係食左大約四十五分鐘，但對我黎講，呢不足一小時嘅時光將會係我人生其中一段最難忘嘅回憶。
今日雖然係星期五，但全公司都瀰漫住山雨欲來之勢，大家都喺度猜度緊邊個會對阿Kate嘅寶座率先出手，但所有人都好似選擇謀定而後動，所以就演變成你眼望我眼嘅局面。就連新黎嘅Evans都睇得出勢色唔對路，佢全日都埋頭做自己野，無理過其他人。而無打選參賽，只係一心想搞局嘅我。為左盡快引爆呢個彊局，我唯有代替其他人講出心底話。喺大家都專心工作果陣，我行左出辦公室中央，開始左我嘅一篇演講：「昔年，馬丁路德金喺推動美國黑白種族平權嘅時候，佢曾經喺一篇speech講過，I have a dream。同樣地，我今日都要話畀大家知，I have a dream。我喺呢間公司一直受到不公平對待，大家喺去曾經杯葛過我、侮辱過我，令我百般難受。就因為我同大家唔同，無錯我份人係比較善良同好行公義，見到不公嘅事就會不平則鳴。不過除此之外我同大家其實無乜唔同，我同你地一樣都只係一個打工仔。我有一個夢想，我希望可以製造一個再無辦公室政治嘅工作環境，人人都可以互相尊重同包容對方意見。為左呢個夢想，我會努力爭取成為你地下一任嘅上司，You may say I am a dreamer but I am not the only one，我希望在座有邊個有同一個夢想嘅，都可以支持我。」我講到呢度停一停，再行埋去Judy身邊繼續講：「我知道呢度有啲同事返工唔係為左工作，佢地單純係想殘害其他同事，為左上位，咩下三流手段佢地都會用上。不過大家唔洗怕，為左阻止呢啲小人有機會當道，我會努力。」
講完之後，全場鴉雀無聲，不過我其實唔多care，我講咁大段廢話其實只係想點燃戰火，等班友仔唔好再等快啲踐踏他人博上位。不過隔左幾十秒之後，Evans竟然一邊起身拍手掌，一邊叫好。我心諗你唔係真係睇上左我呀嘛，咁嘅廢話你都竟然認同。而為左附和Evan，我身邊嘅Judy竟然都企埋起身拍手掌，而其他人都一臉尷尬咁一齊拍手掌，當時個場面應該係我人生見過最awkward嘅一刻。呢個時候我見機不可失，我拉住Judy隻手，好誠懇咁當住咁多人面前講：「Judy姐，我知你都好恨坐Kate姐個位，不過我希望我地可以公平競爭，ok？」騎虎難下嘅Judy唯有擠出一個好難睇嘅笑容附和我。喺我返返位坐低果陣，Daisy扮拎文件畀我果陣偷偷同我講：「我一定會支持你架。」而遠處嘅Evans都對我豎起左姆指而表贊同，不過我喺望住Evans嘅時候，不其然擔心佢今晚會對我豎起第二啲嘢…
喺放工返屋企換衫果陣，我望住我個衣櫃惆悵左好耐，究竟我點著先夠fabulous，先會喺呢啲自己人活動到唔顯得失禮呢？如果呢個時候我有粉雄救兵幫我做stylist就好啦。喺無乜選擇之下，我著起左一件Paul Smith粉紅色恤衫，講起呢件衫其實都有啲來頭，話說我有個前女友嘅阿哥好捨得買衫，我成日喺我前女朋友屋企借頭借路著左佢啲衫走，而且差唔多一件都無還過，真係慳唔少置裝費架。講返我今日嘅打扮先，到下半身啦，我除左有著boxer之外，仲著定兩條底褲打底，可以話係重副武裝上陣，但由於入面著左太多，我喺著果條超skinny牛仔褲真係有少少困難……而且仲不經意咁令到我個臀部顯得格外豐滿，不過由於太趕時間我都唔可以再換過第二套裝束，喺拎左我細妹支Dior香水噴左幾下次後，我就懷住戰戰競競嘅心態出門口赴約……
喺見到Evans果陣我嚇左一跳，原本以為佢會打扮到花枝招展咁去蒲，點知竟然一身長毛議員裝，上身哲支華拉大頭tee，下身就係一條爛仔褲，一副社運青年示威裝咁，完全唔知一位公子哥兒。我忍唔住問佢：「Evans今晚係咪咩theme party？ 總之我都扮阿詹培忠議員黎襯返你啦。」佢聽到之後好豪氣咁大笑出黎，之後搖搖頭話：「James，你陣間去到咪知囉。信我，今晚我會令你對人生嘅睇法有重大改變。」重大改變？佢唔係真係要我中途轉基呀下？
正當佢揸車戴我去到灣仔果陣，我仲想問乜我地唔係去中環clubbing咩？不過喺車上面Evans掛住聽The Beatles，我都唔好意思阻住佢跟住唱。但喺播到Come Together果陣我心底不其然有道寒意升起，一陣唔會係香腸派對，一班男人Cum Together咁大鑊呀下？而喺首歌差唔多播完果陣，我地到達左目的地，灣仔一棟唐樓嘅樓下。
「喂Evans，你條番書仔唔識路就出聲啦，點睇呢度都無野玩啦掛。你唔會帶我去一樓一洗樓呀下？」Evans聽到之後話：「你跟住上黎就知架啦。」去蒲玩到上唐樓，唔通Evans哥今晚準備帶我去佢嘅秘密基地？喺別無選擇之下，我唯有跟住Evans行上呢棟破舊嘅唐樓…….正當我一路跟住佢行，而我嘅括約肌亦隨住我越黎越接近目的地而開始有啲收緊嘅時候。Evans喺一個單位門口度停低左落黎，而個門口招牌上面大大隻字寫住同盟會三個字。睇到個同字我已經暈一暈……今次唔通真係黎左個基場，仲要上到埋唐樓玩咁激？
開門嘅係一個高高瘦瘦嘅紅毛仔，一身punk rock打扮嘅佢令我諗起本地某位極度憤怒嘅band仔，雙目無神嘅佢神情有啲呆滯。佢見到我呢個陌生人都無乜反應，佢打開門之後就好似條喪屍咁行返入去，我懷疑呢條友好有可能飲左過量火麻仁。果個唐樓單位畀我想像中大，而入面出奇地唔只得男人，仲要有男有女。不過我心諗既然叫得同盟會，男同女同都應該歡迎啦。Evans喺呢個場所睇黎好有地位，大部份人見到佢黎到都上前打招呼。而被冷落在一旁嘅我徑自行左入去個單位觀察四周，個單位基本上乜都無，除左廁所之外就一間房都無。而單位入面除左一張當梳化，幾張地毯，幾個大書櫃，一部電腦同一部電視之外就乜都無。在觀乎我身邊嘅人嘅打扮，佢地個個唔係band仔band女look就係文藝青年look，當中仲夾雜左幾個社運鬥士打扮。而喺單位嘅一角，我正見到幾個男女好落力咁喺地下整緊banner，我估佢地應該係為反性傾向歧視遊行做緊準備。而綜合我以上嘅觀察我得出左一個結果，同盟會一定係反性傾向歧視嘅團體，呢班囝囝囡囡一定係為左自己權益而集結起黎。
而呢個時候，有一個眉清目秀，著住格仔恤衫戴著幅黑色粗框眼鏡嘅少女行左埋黎同我打招呼。由於無乜心理準備之下我都唔知應該同佢講乜好，好彩係由佢主動打開話匣子。「睇你個樣你應該好少黎呢啲地方喎，我叫Jasmine，你係Evans嘅朋友？」「係呀，我叫James，雖然我好少參與呢啲活動，不過我本身都好關注你地嘅權益架，我唔認同社會大眾成日將你地stereotype左……」Jasmine聽到之後好興奮咁話：「係啦我地八十後喺社會真係成日畀人睇低，啲人成日覺得我地剩係識搞事……」八十後？咩八十後呀，我估呢條女應該同阿紅毛仔一樣隊過草黎咁，講野九唔搭八。喺虛應左佢幾句之後我就返返去搵Evans。
Evans呢個時候拉住我，當眾所有人面前將我介紹畀佢地：「呢位係我同事James，佢同一般香港人好唔同，佢同我地一樣都係好公義嘅人。今日佢喺公司度發表左一段宣言，佢竟然喺呢個金錢掛帥，咩都以行益行先嘅社會都夠膽出黎講公道話，表明自己係相信正義。我認為呢位James同我地有住同一種觀值觀，我希望喺過左今晚之後James會成為我地自己人。」一頭無緒嘅我剩係留意到佢最尾果三個字，自己人？正當我驚到開始腳震之際，頭先果位Jasmine行左埋黎，Evans喺交帶左Jasmine叫佢同我傾下計之後，就行開左同左幾名男女行埋一邊密密傾。
Jasmine拎左一支啤酒畀我，但由於我害怕酒中有春藥而婉拒左。Jasmine話：「其實我地本身唔屬於任何政黨，我地只係一班志同道合嘅人聚埋一齊，你唔洗咁緊張喎，你成個人好似好繃緊咁，take it easy dude…」我都知你地係志同道合嘅同志呀嘛…佢繼續講：「其實我地只係不滿社會有太多不公嘅事發生，而聚埋一齊，想商討我地一班年青人究竟可以做啲咩。」我越聽越覺得唔對路，乜呢度唔係秘密基地黎架咩？
Jasmine繼續解釋：「Evans爸爸同我爸爸本身係朋友，佢可以話係我哥哥。本身我同佢因為屋企都算有啲錢，所以一向都唔太關心社會公義。不過自從Evans去左美國讀書，而有喺我去美國探佢嘅時候。佢帶左我去參加Occupy Wall Street，我先知道我父母由細到大灌輸畀我嘅價值觀係錯嘅……」我喺呢度忍唔住打斷佢：「你意思即係你地唔係同志，呀唔係，我意思係問你地唔係同性戀？」Jasmine聽到之後嫣然一笑：「以我所知我自己同Evans就唔係啦，至於其他人就一啲啲啦，係咪Evans畀左咩誤會你呀？唔通你係因為以為Evans係gay所以先跟埋黎？你好勇敢呀，我欣賞你。」 我聽到之後先係鬆左一口氣，但隨即就急住否認：「唔係呀我唔係gay架，唔信你即刻除晒衫，我示範畀你睇我對女性會有生理反應呀……」Jasmine聽到之後捧腹大笑，笑左幾十秒之後佢先停低講：「Relax，我講下笑咋。不過如果你真係有興趣同我地一齊爭取社會公義，我好歡迎你。但就算你無興趣都唔緊要，當上黎交個朋友囉，呢度係我同Evans夾返買返黎畀大家有個地方搞gathering，你可以隨時上黎呀。」佢之後再喺我耳邊細細聲講：「有機會我都可以向你示範我鍾意男人多啲呀。」講完之後，佢拍一拍我pat pat留低目瞪口呆左嘅我，行左去同其他人傾計。
出乎意料地，Evans竟然係一名關心社會嘅熱血青年。由於太過驚訝，我自己行埋左一邊發呆，過左良久，Evans行左埋黎同我講：「我喺美國讀書果陣，識左一個美國女朋友，佢係讀social science，由於佢出身底下階層，佢自己要好努力去賺錢交學費。為左交學費，佢夜晚走左去做stripper，不過佢一啲都無睇低自己，佢只係歸咎於資本世界過份扭曲。佢係平日得閒仲成日會參與示威，去抗議果啲貪婪嘅banker同商人。而我亦由於成日跟住佢周圍去參加示威，我開始反思我爸爸多年黎灌輸畀我嘅野。雖然我係資本社會嘅既得利益者，不過我唔認同佢地果套。」估唔到呢條友仔身為富家子弟，唔鍾意花天酒地，相反佢就想為民請命，唔怪得佢爸爸咁唔鍾意佢啦。佢繼續道：「喺occupy wall street果陣，我爸爸嘅一個手下喺去果度出trip果陣撞破左我。我爸爸知道左之後好嬲，佢要我即刻返香港。如果唔係就cut我生活費，我為左避開佢走左去墨西哥度幫窮人做義工起屋。但喺果度我又反思我唔應該太忤逆我爸爸，所以我先順下佢意，返左黎香港幫佢打工。」我聽到之後對眼前呢件Evans完全改晒觀，雖然佢係有啲天真，不過佢心地真係唔好好。「之前Sam姐叫有咩唔明都可以問你，我初初都以為你係啲好叻拍馬屁，所以得到Sam姐信任。不過今日晏晝聽到你一番說話，我知我地可以成為朋友。」我雖然好想即刻問埋佢關於Miki嘅往事，不過既然佢呢一刻都當左我係朋友，我知我唔洗急於喺而家問。估唔到咁樣誤打誤撞之下我竟然同呢個太子做左朋友，佢本身想留我喺度睇一套關於資本社會醜惡之處嘅紀錄片，不過我托詞話想早啲返屋企而走左。