今日我開始左對公司啲同事進行復仇大計: 第十七節

「Miki，點解你會喺度架？一兩年無見你靚左好多，我真係差啲認唔到你呀。」一返到黎公司，我就見到眼前呢位高大英俊兼且西裝畢挺嘅陌生男子問Miki呢個問題。而Miki對呢個問題顯得有啲慌張，但佢都依然保持佢嘅甜美笑容去答眼前呢個俊男：「又會咁啱嘅Evans，你幾時喺美國返黎架？你果陣唔係話畢業之後就要返香港幫令尊手架咩？點解你會黎做呢度嘅？」對住Miki呢種以一連串問題去做答案嘅攻勢，今次又輪到呢位叫Evans嘅男子有啲措手不及，佢笑得有啲緬甸。而呢個時候緊隨住我返黎嘅Daisy見到有個陌生男子一早出現喺公司都表現得相當錯愕，Evans呢個時候發現左我地嘅存在，佢走埋黎話：「你地好呀，我叫Evans，係新黎負責HR架，不過我啱啱返黎香港咩都唔識，大家多多指教呀。」雖然係客套說話，但係直覺話畀我知眼前呢個男仔除左態度誠懇之外，而且仲好有教養。我雖然估到眼前呢個男仔應該係傳說中果個玩到連工都唔記得返嘅太子，但從佢態度同談吐我真係完全聯想唔到佢係玩世不恭嘅富二代。但最令我感興趣嘅莫過於佢同Miki竟然係舊識？我對Miki到而家都可以話係一無所知，正當我苦惱在搵唔到地方入手之際，竟然無端端彈左個Miki舊識出黎，睇黎我終於有機會了解到Miki嘅過去。

 

喺差唔多所有人都返齊黎之前，大家開始互相介紹一返。而Judy見到Evans果陣即刻兩眼發光，嗲聲嗲氣咁挨埋Evans度喺咁講，而一臉尷尬嘅Evans剩係識喺度傻笑。喺呢一刻我不經意咁望到Miki，我竟然喺佢表情上搵到一絲妒意，我好少喺Miki臉上發現到任何負面情緒，但一向擅於掩飾嘅佢竟然喺呢一刻流露出真性情，雖然佢好快就扮返無野，但呢一下微細嘅變化就咁啱畀我捕捉到。呢個時候阿Kate出黎幫Evans解圍，佢話：「真係唔好意思呀Evans，你一上任我就有件事交畀你做，有位同事今朝打返黎話要辭職…」唔洗講都知，辭職果個就係今日都無出現到嘅楊偉明。阿油同文員輝喺聽到大明要辭職之後都難掩興奮之情，而其他唔知情嘅女同事雖然都顯得有啲錯愕，不過對佢地黎講少左一個對手爭升職應該都係好事。

 

Lunch嘅時候Evans自己作主嗌左啲外賣請晒我地全部人食，估唔到呢個少爺仔都幾識人情世故。正當我諗緊點樣埋佢身套料嘅時候，佢自己走左埋黎同我講：「James你好呀，Sam姐同我提過你，佢叫我有咩搵你幫手就ok。其實我對公司一無所知，如果你有時間嘅話，我地約個時間出黎飲杯野好好傾下呀？」我聽到佢咁講真係好驚訝，我除左驚訝Sam姐竟然對我咁信任之外，我亦驚訝全公司咁女同事佢都唔搵，竟然走黎搵我飲野？感到慌張嘅我乾笑左幾聲拋下一句：「飲野無問題呀，我成日都口乾要飲野架，不過先旨聲明我對劍擊無興趣架哈哈。」講完之後我就落慌而逃，而一臉茫然嘅Evans應該都唔知我發咩神經。





 

臨放工之前，一心打算向Evans套料嘅我知道自己頭先嘅反應應該嚇親佢，於是我走埋去同Evans講：「我個人有啲怕醜，對初相識嘅人通常都好唔自然。你想知道公司啲咩隨時約我出黎傾都可以架。」而Evans答我佢都喺Sam姐度聽聞過我份人脾氣有啲古怪，所以佢都無放喺心度。

 

放左工之後我喺街度漫無止境地兜左一兩個鐘試圖放空一下緊張嘅心情，因為我有預感隨住Evans嘅出現，我同Miki與及其他人應該好快會黎個了斷。喺返到去屋企樓下果陣，我離遠見到有個熟悉嘅面孔喺度等緊我，呢個人就係我近排諗得最多嘅人-Miki。有別於平時嘅鬆容，我覺得Miki全身嘅神經都好似好繃緊。而平時總愛不經意地利用自身魅力試圖迷惑我嘅佢，收起晒平時嘅嬌嗲話氣，好直接認真咁同我講：「我唔轉彎抹角啦，我想你同我聯手對付Judy，我唔可以畀佢升職架。」「原因呢？」「我自己想升職坐正。」「我點解要幫我嘅對手去上位？」Miki就好似一早看穿我咁，佢嫣然一笑，講左句：「我知你根本無興趣升職，你慢慢考慮下啦。」就揚長而去。眼看就連Miki都開始主動要求我幫手，我難掩心底興奮，睇黎我好快就可以揭穿Mik嘅底牌。