【穿越/愛情】《我同鍾意咗十一年嘅人表白，佢竟然跳海死咗》: 五十四（續）

擾攘了大概十五分鐘，在兩位女生催促下，我們三個男生再次出發。
即使我有想過再找藉口回去偷聽二人的對話，但我相知蕭揚二人並不會隨便把我放走偷懶，所以我就打消這念頭了。
「其實呢，我覺得你唔好追Aiko會好啲。」蕭揚在大魚蛋檔前突然又重提起九公的話題，「話哂我哋咁耐朋友，若然追唔到，到時大家尷尬都唔係咁好。」
九公聽了，擠出了一個笑容回答說：「咁又係嘅，我都知我天生就係要做一個喺外面漂流嘅浪子比較好。」
說到這裡，我突然明白了為什麼我腦海中完全沒有九公喜歡過Aiko的記憶。
原因就是或者九公當年確實曾向我們像現在般提出過，但因為我們直接予以否定，而他也唯唯應是地接納了我們的意見，所以我才沒有把這事收在記憶中。
原因想通了，而此刻作為穿越者的我不知為何對這件浸沒在記憶中的事情很有興趣，於是不禁向九公問道：「其實我哋都frd咗咁多年啦，做咩突然先嚟鍾意Aiko嘅？Aiko嘅樣，唔似你會鍾意嘅類型喎。」
的確，九公以往所追求的都是姿色出眾的女生，所以這也是他失敗記錄豐富的原因之一。
而Aiko的外表在她精湛的化妝技術補救下，尚可追得上一般女生的外表平均值，但跟九公喜好的類型相比，Aiko就是差天共地了。



「因為佢好人囉。」九公不假思索就回答了這個問題。
「你呢個答案，同答「因為佢係女人囉」係無分別㗎喎。」蕭揚咬下了一顆麻辣魚蛋，同時如常地吐出直接而辛辣的回應。
「吓，我覺得「好人」已經係一個好重要嘅原因啦。」九公一臉無辜地說，「其實，我對Aiko有好感都有成半年啦。我記得，嗰時係我被第79個女仔拒絕。當時個女仔拒絕我嘅原因，就係覺得我成日周圍追女仔好似playboy咁。但係其實，我都只係好積極咁想搵一個我鍾意嘅人啫，咁搵唔到，咪搵下一個囉，我唔明努力去追求自己鍾意嘅人有咩問題。而當嗰我喺度傷心緊嘅時候俾Aiko見到，其實佢都唔係第一次見我俾人拒絕㗎啦，所以就好自然俾咗包紙巾我。」

「就喺嗰一刻，我突然諗，點解我一直以來都無考慮過Aiko呢？係，佢個樣係偏離咗正常程度少少，但係，佢一直都好接納我，願意同我相處，甚至仲會聽我訴苦。唉，就係嗰一刻有咗好感之後，唔知點解，佢嘅優點突然間就不斷喺我眼中出現。例如佢好獨立咁一個人建立咗自己嗰個有成五萬followers嘅YouTube channel；又例如佢好有目標感，一直都好清楚知道自己想做啲咩；仲有為咗朋友成日都會挺身而出。總之一路相處，我就覺得自己愈來愈鍾意佢。」
九公一邊道出這故事，我和蕭揚一邊聽得目瞪口呆，而我也慶幸自己有問出了一個好問題，這樣才能得知九公心中這樣重要的感受。

「都幾難得你咁鍾意佢都忍得住唔急住狗衝表白喎。」蕭揚轉眼又完成了一串咖哩味大魚蛋，看來富家子弟對平民食品總是有特別的喜好。
「其實我自己都知自己事，以前急住嚟，最後都係無好結果。而為咗令Aiko可以唔好成為第80個拒絕我嘅女仔，呢半年嚟我都係等緊機會增加佢對我嘅好感囉。但我發現，原來我除咗識狗衝咁表白之外，原來真係唔識得點同女仔相處。而今次難得有機會嚟長洲相處三日兩夜，加上之後大家各自翻工又少咁機會見，所以我先想借今次機會問下你哋啲溝女方法，如果成功就可以順便同佢表白囉。」九公解釋完了，不禁嘆了一口氣，看來連他自己也感到箇中的難度。
「放心，今次見你咁認真，我撐你。」


聽著九公微笑著道出喜歡Aiko的經過，我突然因為過去自己一口就否定了他喜歡Aiko的可能有點內疚。
原來在九公的心目中，對Aiko有著如此認真的感覺，而且還難得為她默默等待半年，就為了一個成功表白的時機。
或者，若然過去的我和蕭揚多鼓勵九公，他跟Aiko早就成為了一對，不用像現在活到今天依然各自單身。
雖然我尚未明白來到這次回憶載點的目的，但我已決定要在這次的歷史中，好好支持他，協助他可以成功首次追求到喜歡的人。

「軒哥！」九公激動地抱擁著我大叫一聲，我卻因為他嘴邊因吃魚蛋而殘留的辣汁全抹到我衣服上而露出了一臉厭惡。
「你嘅認真的確係值得支持嘅。」蕭揚在旁笑了笑，並及時地阻止了又想撲過去擁抱他的九公，「而我，都諗到一個方法，或者可以幫到你。」
「咩方法啊？」九公雙眼發光地看著蕭揚，而我也大感興趣想知道機智聰明的蕭揚會提出什麼的方法。
蕭揚睿智一笑，開始談起了他簡單而富有層次的計劃。
這計劃不但令九公抱著蕭揚大腿感激涕零，同時亦令我不自覺地暗喜。


蕭揚的計劃，其實就是始於一個極為簡單的概念，以戰養戰。