【穿越/愛情】《我同鍾意咗十一年嘅人表白，佢竟然跳海死咗》: 四十八
此話一出，不論是謝明哲、安蕎還是我，都不禁屏息靜氣地等待著阿晴的下一句。
「我鍾意嘅人，係一個擁有夢想嘅人。有好多事即使佢有能力做到，佢都會等，等一個適合嘅時候同位置先會完成佢。佢明明係一個可以好高調嘅人，但係佢又好似好享受一個人嘅時間，呢樣嘢咁啱又同我一樣；佢好聰明，聰明到可以明白我莫名其妙嘅諗法；佢好善良，而且教識咗我去相信每一個身邊嘅朋友。」阿晴一邊說，嘴角一邊露出淺淺的微笑，「而最重要嘅係，我哋都好細膽，細膽到唔敢面對自己嘅感情。」
直到最後的一句，阿晴的笑容才靜靜地淡化了。
而我聽著阿晴的讀白，內心一直猛烈地跳動著，似是不斷地反問著自己：「阿晴所說的人就是我嗎？」
就在這時，安蕎突然在我旁邊拍案而起，大叫一聲：「我知阿晴鍾意邊個啦！」
這一起，連我們身邊的食客都嚇得望了過來。
我連忙把安蕎拉下，低聲問道：「你估係邊個啊？」
「好明顯就係Owen啦！Owen嘅口頭禪係『無十足嘅把握，我唔會試』，呢句咪就係阿晴所講嘅會『等』囉！仲有啊，Owen份人勁聰明，而且lunchtime又成日一個人食，同埋佢平時都唔多講嘢喎，仲唔係細膽！今次仲唔係中哂？」安蕎滿意地笑說，「阿晴係鍾意Owen就好啦，至少成件事會易處理好多。」
聽著安蕎的分析，我又說不出到底有什麼錯，但我心裡總是希望阿晴口中所說的是我。
但我是個聰明的人嗎？我是個應該高調的人嗎？我是個明白她的人嗎？
這些問題，或者只有阿晴才能回答我了。
「阿晴，但係我同你先係最夾㗎。你望下我嘅袖口鈕。」謝明哲這時發了聲，向阿晴展示了自己的鈕扣。
「H2？」阿晴看見了謝明哲的鈕扣上是兩個字符，但似乎不太明白此舉的用意。
「阿晴，你就係我嘅氧氣，氧氣加上我嘅『H2』，我哋就可以成為『H2O』化成 水，變成細水長流啊！」謝明哲這表白的話一出，我和安蕎都是傻了眼。
「對女仔嚟講，呢個化學系嘅表白值幾多分？」我無奈地問安蕎。
「成功機會係0 分，不過學術性嚟講都有2分嘅。」安蕎無情地笑著說。
而作為接受表白的阿晴先是一愣，然後也忍俊不住地笑了起來：「多謝你嘅心意同創意啊，但係，我諗我哋真係唔適合。」
「阿晴，如果人無咗氧氣就會死，而我而家就好似，就好似咁，」謝明哲掏出了一個打火機，然後把它燃亮，「我每日咁掛住你，就好似不斷俾火燃燒緊氧氣，氧氣愈少，我就愈生存唔到。只有你成為我嘅氧氣，我先可以繼續生存㗎。」
「乜簡簡單單咁表白真係咁難咩？」安蕎聽了謝明哲的表白，忍不住再度吐嘈。
「咁可能你需要一個氧氣樽多過我啦。」阿晴見謝明哲反應有點大，似乎令她有點害怕，「不如今晚我哋都係唔好一齊食嘢住啦，我俾你休息下先啦。」
說著，阿晴想要拿起自己的飯盒轉身就走的時候，謝明哲卻快一步搶到門前。
「阿晴，你聽我講，你知唔知邊個係拉瓦錫？」謝明哲緊張而認真地問。
「牙石？」阿晴看見謝明哲手上還是拿著那個仍在燃點狀態的打火機，不禁也面露憂色起來。
「拉瓦錫係現代化學之父，佢都經過好多次嘗試先可以成功發表到第一個週期元素表，所以點解你就唔可以俾一次機會我哋嘗試下呢？」謝明哲一臉難過地問，雙手隨著語氣而揮動。
「你放低打火機先，我哋慢慢傾。」阿晴似乎也開始緊張起來了。
我這時候看不下去，馬上站了起來想要衝上律師行救出阿晴。
當我正要離開之際，我的手臂卻被安蕎拉住了。
「要救人，都唔可以係你救。」安蕎用手指著屏幕上閉路電視畫面的一角，那畫面顯示著Owen仍然在父親的辦公室中幫忙執拾著。
「而家係個好機會俾Owen同阿晴建立感情啊。」安蕎認真地說。
安蕎把她的手機遞了給我，上面已輸入「133」和Owen的電話號碼。
我明白了她的意思，所以緩緩地吐出了一口氣。
我與阿晴的愛情中的可能性，最後還是要由我來當劊子手嗎？
不過假如這是讓阿晴命運得以扭轉的選擇，我是甘於成為犧牲品的。
而且阿晴真如安蕎所說的喜歡Owen，那麼我是應該成人之美的。
就在我要按下「撥出」鍵之前，屏幕中的阿晴卻在這時開口了。
「其實比起做氧氣，我都係想做二氧化碳多啲。」阿晴認真地說。
「點解嘅？二氧化碳對地球無益喎。」謝明哲交出了令人毫不失望的理科思考。
「因為，我鍾意嘅人好鍾意飲可樂。」阿晴說著，然後承著謝明哲一時不解的腦袋空白時間，快步就跑向門口。
當阿晴這奇招成功，正打算扭轉門把開門的時候，門卻紋風不動。
看來，是剛才謝明哲翻熱飯盒回來的時候，已經在門口做了手腳。
雖然畫面上的情節驚險，可是我的心神卻不在畫面上。
因為，剛才阿晴的一句話，引起了我內心莫名的震撼。
「嗯......Owen明明講過佢淨係飲熱茶，最憎飲可樂㗎......」安蕎在質疑著自己的想法時，眼睛剛好就看到了我眼前放著的東西。
那是一杯來自咖啡店的可樂。
而我，也正好呆呆地看著這杯似乎戳破了真相的可樂。
這杯我平日最愛喝的飲料，此刻竟成為了百味雜陳的關鍵答案。