只要和你在一起: 半分

之後Peace有兩日無搵過我。我只能夠send 兩句問候等佢回覆，但佢已讀不回。

我終於忍唔住，打俾阿周問Peace嘅檔期，再去後台同褓姆車之間嘅路等佢。

「對唔住，我想冷靜吓先。」Peace避開我嘅目光。

我無出聲，只係靜靜咁望住佢。

「果晚之後我有認真諗過。余豪講得啱架，我同佢經歷咗咁多，最後都分開。我同你都唔會有將來。長痛不如短痛啦。」



「我唔要。」唔知幾時開始，眼淚開始唔受控，「我只係想同你一齊……」

「我要放低一段感情好容易，」Peace溫柔咁抹走我嘅眼淚，「但我知道你會越嚟越投入，最後嘅結局亦都將會好似余豪一樣。

「你唔好再見我啦，我係為你好。」我感受到，呢一刻我同Peace嘅距離，就變返好似一般偶像同粉絲咁，有一條神聖不可侵犯嘅鴻溝。

「點可以……」我目送 Peace 走得老遠，只能夠默默地接受佢定落嘅、不可僭越嘅分界線。
https://www.youtube.com/watch?v=PcZMsBNpVs4
呢個時候，我收到一個來電—— Peace粉絲會會長阿周，一個典型油頭粉面嘅死肥宅。



「老地方見。」然後極速收線。

時間嘅巧合，令我諗起呢趟來電應該並非偶然。
彌敦道，差館對面麥記，兩個板燒雞腿包餐加大。

「你應該知道我叫你過嚟做乜。」果然。

「係 Peace叫你嚟勸我？」我提出我嘅推測。



「嗯。」阿周無否認，「但另一樣我想你知道嘅係，其實你依家suffer緊嘅嘢，我都經歷過。

「吓？」我忍唔住瞄一瞄我身邊嘅龐然巨物。

「⋯⋯ 有一排咪好興話越大份嘅男仔就越有『安全感』嘅。佢就係喺果股風潮下搵咗我。」

聽完我有兩樣嘢係難以置信：佢居然連粉絲都唔放過，仲食得落咁油膩……
我個口仲 O 到收唔到嘅時候，阿肥周又繼續一口可樂又一口薯條：

「當時我淨係可以攤喺床上面俾佢攬住訓，但都有錫…… 我當時完全唔明白，點解佢會睇得上好似我呢亭脂肪多過肉嘅肥男。」
我托一托頭，同樣表示大惑不解。
「但我後嚟被佢冷落、疏遠後先發現，原來有一種人嘅本質就係咁：當佢有能力去賺取所有人嘅愛，佢會為自己爭取更多，直到佢可以得到所有人嘅愛。
佢都好清楚個結果係傷害到所有人，包括埋佢自己——但佢無辦法，佢更需要嘅係不停咁發放同接收愛呢個動作，直至耗盡所有可以為佢付出嘅力量為止。」
講完一大輪，一臉凝重嘅阿周吸一口可樂，然後又回復放空狀態。
阿周果然係一直留喺Peace身邊嘅人。



最了解佢嘅人，竟然係一個最名不經傳，喺佢背後默默支持佢嘅肥宅……

我無出聲，點頭，英雄所見略同。
「點講都好啦，我哋都係佢嘅救命水泡，」佢又用食完薯條嘅肥手搭我膊頭，「就算救過佢一命都好，都無人會拎個救生水泡返屋企架。」

今次我無再離阿周而去，因為我已經無處可去。
「一陣過唔過機舖逛返轉。」我終於開口問。

「Why not? 今晚一人唱一張大牛，唔打完唔好走呀！」阿周將大堆薯條塞入口，睇嚟佢已經蓄勢待發。