只要和你在一起: 攤牌

所有事情都會有盡頭，再美好嘅事亦會有佢完結嘅一日。
我同余豪無再交集，雖然聽完佢一番自言自語式嘅自白之後，心裡頭嘅共鳴感經已油然而生：我完全明白佢心裡頭嘅果種唔甘心。
喺呢個時候響起好大力嘅趟門聲：「今晚你大獲啦，我要成隻腳塞落你個小咀到……」

係Peace。比著平時嘅我一定好似柴犬咁乖乖搖尾應門（自行幻想自己有一條尾）。

但今日多咗一位不速之客。
「come on，我哋已經 no longer、唔再係呢種關係，我以為我講得好清楚。」Peace 望見余豪，即時收起上車前嘅輕佻。



「點解我哋要咁輕易放棄，唔可以傾清楚咩？」一度沉寂嘅余豪捉住Peace隻手，睇得出佢好肉緊，完全忘記咗力度。

「你整到我好痛！」Peace 即時鬆開余豪，「我想要嘅嘢，你永遠都俾唔到我！」

余豪瞪大對眼望住 Peace，「你想要咩吖？」
「你知架。」Peace 講到呢度，就開始連珠爆發，「我想要嘅嘢從來都好簡單：每次我做完嘢，都有一個人默默咁喺屋企等我。我哋一齊好溫馨咁食飯，會開開心心咁講笑話…… 」

「我承認，我之前係顧住做嘢無好好陪妳。」余豪斷斷續續咁講，「但我多咗Job，就無可能淨係照顧妳一個歌手。之後我有時間就俾晒妳，好冇？」

「無可能。你每次都只係想氹住我，但係我仲有幾多年青春可以俾你玩？」



「我唔努力做嘢點養得起妳？」余豪突然失聲咁咆哮，「妳明明知道我係好認真……」

Peace閉上雙眼，「我就係唔想再浪費大家時間。都三年，你都唔知我最想要嘅係咩。」
「但我知道妳應該要嘅係乜嘢。」余豪冷靜落嚟，卻語帶堅定咁質問：「講到尾，妳到底係想要一個同妳走落去嘅伴侶，定係純粹想不斷換畫去滿足妳自己？」我見到佢講呢句果陣睄咗我一眼。
「我好多謝你一直以嚟咁幫我同維護我。」Peace似乎唔想再糾纏落去，「我知道自己以後都需要你嘅幫忙，如果你係愛我嘅話，可唔可以作為一個合作伙伴喺我身邊？我哋……仲係朋友？」
「妳…妳好自私。」余豪咬住牙關，表情扭曲咁問：「我哋一齊咗咁耐……唔通……妳從來都無愛過我咩？」
「再講呢啲已經無意義。」Peace斬釘截鐵咁講，「我哋以後要合作嘅時候再聯絡啦。」
余豪眼見無力挽留，只係冷冷咁拋低一句：「妳今日想要嘅嘢，他日到妳厭咗都係要重新再搵、仲要係永無止境咁去搵。妳最好諗清楚。」
講完余豪一手拉開車門離開，車廂一片寂靜。


正當我思考緊應該講咩開場白之際，Peace已經講咗一句：

「你都返去啦。我想自己靜吓。」佢眼尾都無望過我。
我知道呢個時候我做唔到啲乜，只能夠聽話咁離開褓姆車。
喺呢一刻，有種好強烈嘅感覺湧上心頭：呢個時候我咩都幫唔到！我好無用！
https://www.youtube.com/watch?v=FBMa8iq2B5E