廟街有殭屍（已在各大書局上架）: 第五十五章
夜晚的廟街繁華熱鬧，人來人往，攘來熙往，小販叫賣聲不絕。
「先生⋯⋯先生，嚟唔嚟睇相？」占卜檔一個大叔喊着：「睇相埋邊、埋邊。」
「塔羅、星相呢邊。」第二檔一個女人叫道。
只是路過的人都來去匆匆，沒有人停下。
「唉，自從香港大亂之後，少咗好多人睇相。」那大叔對那占卜女人嘆道。
「鬼咩，咁多人喺死，大家都實際咗好多，唔信鬼神呢啲。」
「唉都唔好講，好彩啲怪物唔識襲擊人咋，唔係香港都亂到七彩，嗰日我留喺屋企，死都唔落樓，聽講陳師奶帶住佢成家落樓，變晒殭屍，陰公囉。」
「話時話你有無識嘅人變咗殭屍死咗？」女人細細聲問。
「我就無，聽過嗰日唔少人咁做，幾萬人左右啦，自甘墮落。」男人說。
「好彩香港無畀佢哋玩殘咋，大部分人都有骨氣。」她說。
「唉，總之生意差就係啦。」他點了一枝煙，深深吸了一口，呼出煙氣道。
「我哋生意差都一日仲有一兩單，你睇下隔離嗰檔先慘，日日拍烏蠅。」
「隔離嗰檔唔係個後生靚女咩？點解會變咗呢個後生仔。」
「九成九轉咗手，但佢就慘啦，日日坐成日，精神病咁畫畫畫。」
我坐在檔口的椅子上，睡意來襲，一邊打着呵欠，一邊抄寫符文。雖是睏蟲上腦，但耳朵還是聽到他們的竊竊私語，他們自以為說得細聲我不知道，其實我每一字每一句都聽得清清楚楚。
其實廟街，不時都有些大叔在高歌尹光，讓我精神又為之一振，不然沉悶的生活很辛苦。
忽然，有二十多歲的一個男人站在檔前，身裝傳統道士服，像極出殯時破地獄的師傅。
「韓壬辰少保？」他說。
「你係？」
「我叫小發，北區嘅驅屍工會，有事相求。」
十多分鐘後，我跟他進了一間座落舊區、殘舊破燜的戲院，準備觀看一場電影。
我們坐在電影院的最後一排，此時將臨深夜，午夜場的人數不減，幾乎坐滿每一行，好不熱鬧。
「今次真係麻煩你幫手。」他點點頭說。
「唔緊要，多謝你場戲就真，要你陪我睇。」我吃着爆谷說，反正一段時間沒有看過電影，就當是放鬆一下。
「我應份嘅，之後麻煩到你幫手，可惜南門僕射唔喺度，唔係都唔會麻煩到你。」他說。
「唔使客氣，但點解你北區嘅事會搵到嚟廟街嘅我幫手？」我問。
小發這次前來，是因為幾日後要到大埔猛鬼橋驅魔，但因數目繁多，怕力有不逮，
便來請求我的幫忙，我一口答應，作為報酬就請我看一場電影。
「你知啦，而家出面好亂，自從大戰之後，工會要清理全港殭屍後，人手已經好唔夠。我點敢向其他工會求人手，何況你殺咗傲因，係英雄，向你請救都係吸取經驗。」
「唉乜說話。」
「何況，工會而家都四分五裂。」
「噢？」
「因為其實殭屍入侵呢件事，工會背後係好多內鬼幫助，想請屍入關，就係「屍派」，通常好多同區都係「屍派」，覺得香港淪陷，工會先會多工作、受尊重。呢件事激起兩派鬥爭激烈化，唔少「屍派」嘅人都被揪出，而家亂成一團。」
「呢啲工會政治鬥爭真係亂，我完全唔明。」
「總之你今次殺咗傲因，打亂咗「屍派」計劃，就係大英雄啦。遲啲仲要你幫手。」
「好好好，無問題。」
此時，溫度寒冷，冷得我手腳抖動，我不禁問：「嘩⋯⋯呢間戲院都幾凍。」
「係咩？戲院冷氣就不嬲凍㗎啦。」他不以為然。
「但⋯⋯」
燈光熄滅，全院歸暗，大螢幕燈光調亮，開始播起廣告來。
「你頭先話『屍派』係好多同區，咁咩區會最多？」我趁電影還未開始時問。
「北區。」他語氣淡然的道。
我皺皺眉頭，心裏打了一個冷顫。
「韓壬辰少保，你知唔知道，工會嘅人唔係個個都有工開，如果天下太過太平，咁捉屍人點生存？」
「或者轉行？」
「你哋啲身處廟街鬧區嘅，點會明冷清地方嘅痛，所以先有『屍派』存在。」
「小發，你係『屍派』，係咪？」
他輕笑一聲，算是沉默。
此時，電影廣告播畢，大螢幕出現一部古舊的電視機，那電視機只是播着雪花，發出茲茲聲，吵耳難聽。
「咩電影嚟⋯⋯」
然後，出現一個長髮披面的白衣女子的身影，漸漸從大螢幕裏，越爬越近⋯⋯越爬越近⋯⋯
「韓少保，我無同你講，我最拿手係養鬼，用鬼做武器。」在電影院青白的燈光照射下，他露出蒼白詭異的笑容，令人心寒。
這時，全戲院的百多個觀眾的頭都同時間180度扭轉，以白色的眼睛瞪着我。
「咁睇嚟我中咗伏。」
他們全部人一哄而上，來不及抽出武器，我已被他們眾人重重按着手腳，鎖住我的動作。那個長髮披面的白衣女子走近我，露出破爛的面，笑住用腐爛的手撫摸我的面。
「係肉體⋯⋯」她說。
「好快佢係你。」小發說：「怪就怪你太蠢太易信人，幾勁都好，太天真就係天真，就算係殛都不外如是，都好，殺咗殛就當替天行道。」
「等等等等，你知殛係咩？」
「當然，咪就係擁有自由意志嘅人，相傳係可以吸取屍氣嘅力量，但唔變成殭屍，帶領人類抵抗殭屍，但同時傳說，殛都係會毀滅呢個世界嘅人。」
「毀滅世界？」
「你都係去死啦！」
他掏出小刀，想割去我喉嚨之時，一張黃符飛出，爆出藍光，震得他的刀落地。
門口，長髮披肩、白衫短裙的年輕女子，她說：「唔記得叫你提防佢。」
「妳唔係喺醫院咩？」我問。
「南門蔚？」
「因為有人太蠢我放心唔落，驚佢拆我檔嘢，所以要提早出院。」說罷，她抽出一張符，結出手印，唸道：「靈、鏢、統、洽、解、心、裂、齋、禪。」
地上浮現一個圓形法陣，冒出一隻神相兇惡的天狗，提着燈籠，繫著一條飄浮的白色絲帶，身穿五彩顏色的和服，手長持刀，揮一揮手就捲走長髮女鬼和全戲院鬼魂，回到陣中。
餘下小發孤身一人，他沒想到自己所有的鬼仔一下消失，是低估南門的法力，嚷道：「我⋯⋯我會返嚟報仇㗎！」然後衝出戲院。
「使唔使追？」我問。
「唔使啦。」她說：「佢有排先搵得返啲鬼。」
「估唔到工會都有人報仇。」
「唔止工會，香港經過今次，殭屍佢哋都一定會報復，只會派更多比傲因高等嘅殭屍嚟。」
「仲有高級啲？」
「多的是。」她說。
「但妳好返晒啦咩？」
「關你咩事？」說罷，她頭也不回地走出戲院。
我急步追上，在漆黑的街道裏，她步速甚快，我好不容易追上，問：「喂，食唔食嘢？」
「咩？」
「Jollibee。」
「點解？」
「妳之前講嘅⋯⋯」我模仿她的語氣和聲音說：「『啊⋯⋯壬辰⋯⋯如果你你拍拖前，可唔可以陪我去食炸雞喔，耶～』」
她兩頰一紅，活像熟透的蘋果一樣，大力打了我一下，道：「我邊有你咁樣衰！唔準醜化我啊！」
「好啦好啦，咁我哋去食炸雞啦？妳講到我哋未來仲有咁多殭屍要對付，唔食飽邊有力打。」
「我而家唔想同你食啦喎。」
「吓，真係？」
「係。」
「真係？」
「係啊！」
「咁好啦，我同子璇食。」
她又大力打了我一下說：「你試下！」
「咁妳同我食。」
「唔食。」
「諗清楚喎。」
「好清楚！」
「咁妳幾時會同我食。」
「考慮下，可能一百年後。」
「啊，唔係呀？而家食啦！」
「唔食呀！喂呀，唔好追住我！」
月亮光光照地堂，兩個人影在漆黑街道上你追我逐纏成一團。
遠方正有無數不同顏色的眼睛覬覦着這地方。
月亮光光，小心廟街有殭屍。
第一季完