廟街有殭屍（已在各大書局上架）: 第五十四章
我赫然驚醒，便發現自己在一個水湖邊，四周只有一望無垠的綠蓁蓁草地、還有藍天白雲。
風吹得綠草低彎，清新的空氣讓我心身舒暢，深深吸了一口氣。
「我喺邊度？點解⋯⋯我唔係喺廟街㗎咩？」
我搔一搔頭，難道一切都只是一場夢？
肚腹傳來的痛楚提醒我剛才的不是夢，反是非常真實。。
摸不着頭腦，完全不明白的我想走出這片草地，只是一直跑又跑，四周仍是草地，回望仍是一個水湖。
望着高天，我嘆了一口氣。
「我係咪去咗蒙古⋯⋯？」我問道：「點解會直接嚟咗呢度。」
「咳⋯⋯」
一把甕聲甕氣的聲音從我身後傳出，我立馬回頭，只見一個蒼老年邁的老伯伯，長著純白色的長鬢，摸着自己的長鬍子，在湖邊釣魚。
咦，剛才有這個人？我怎麼會看不見。
我上前，但見那湖水碧綠清澈，能看到水底，水如明鏡平滑，沒有一點波紋，如人間仙境。
「八八，梨支刀這屎毑嗎？」我問。
「都係講你母語啦，我聽得明。年輕人，你喺度搵乜嘢呀？」
「我搵出路，咁伯伯你喺度做乜？」
「釣魚。」
「⋯⋯咁呢度邊度？」
「呢度係我屋企。」
「你屋企？」
「係係係，應該問點解你會壓住我屋企？」
「我⋯⋯唔明你到底講緊乜嘢。」我說。
「哈哈年輕人，你係正直，不過略嫌蠢咗啲。之但係大智若愚，好事好事，哈哈哈哈。」他仰天大笑道。
「原來我入咗青山。」我喃喃自語。
「咩話？」
「無⋯⋯伯伯，我覺得你釣唔到魚。」我說。
「點解？」
「呢度根本無魚。」我說。
「係咩，唔覺喎，我咪釣咗上你嚟。」他說。
見他一副神秘莫測的樣子，我不禁說：「噢，你一定係神仙之類！係周公？」
「唔係。」
「觀世音！」
「唔係。」
「佛？」
「你睇我個樣邊忽似佛？」
「唉伯伯你不如講我知，我應該點走，我係同一隻殭屍打緊，但我都唔知點會嚟咗呢度，而家成個香港都好危險！殭屍入侵！」
「後生仔，你當你自己係英雄呀？」
「少少啦⋯⋯」
他瞪住我，我馬上改口：「當然唔係，只係咁啱，責任落咗去我身上，蜀中無大將，我都唔想㗎。」
「後生仔我問你，你為咩而戰？為自己？為愛人？」
「我⋯⋯呃⋯⋯」
「做殭屍有咩唔好呀？」
「吓，做殭屍有咩好，畀人決定自己人生，同無存在過有咩分別？」
他又哈哈大笑，笑得手上的魚桿都在亂晃，真是一個喜歡笑的怪老頭。
「有趣有趣，果然係殛。」
「伯伯你知⋯⋯噢⋯⋯但其實唔關我事，只係我飲咗一個屍體嘅水，先變成咁，無咩大不了。」
「傻小子，飲屍水點會關事。」
「吓？但嗰個咩傲因係咁講喎。」
「佢識咩，你要記住，你唔怕屍氣，只係因為你係一個真正有自由意志嘅人，你係自己選擇唔變成殭屍，呢種人萬中無一。」
「自由？我又唔係好覺我係⋯⋯」
「世界好多災難都係從不自由而來。」
「咁伯伯你又錯。」
「哎，點解呢？」他驚喜地問。
「我話好多事都係太自由所致，自由咁想殺人、強姦、打人，呢啲唔會係唔自由囉。」
「有趣，但後生仔，你有無諗過，呢啲都係慾望，殺人係殺戮慾望、強姦係性慾望，呢啲人受制於佢嘅慾望，而變成慾望嘅奴隸，咁又係咪自由？」
「呃⋯⋯」
「棄隸者若棄泥塗，知身貴於隸也，貴在於我而不失於變。且萬化而未始有極也，夫孰足以患心！已為道者解乎此。」
他說出一堆古文，完全聽不明白。
「你覺得保有自己天性重要，定融入社會重要？」
「當然融入社會但保有自己天性？」
他愣了半响，又哈哈大笑。
「哈哈好答案，你答應我，好好利用呀。」
「利用，利用咩？」
這時，本來湖中無一物，卻有一條小魚從小洞中竄出，老公公一下鉤上，這條魚是怪魚，被鈎上後身軀漸漸變大，忽然變化為大鳥，伯伯一跳上其背，牠一拍翼就飛上幾重天外，消失不見。
「喂，講一半唔講一半！頂你！」
「醒啦。」
一陣冰水涼過我的面，我幾乎要窒息，赫然驚醒，只見AV仁、呂子璇、呂嬸和馬仔站在我的面前，一面擔心。
「你無事嘛？」他們問。
「點解你哋會喺度？」我說。
「見你唔夠打咪過嚟囉。」AV仁說。
原來他們收到我的電話後，聽話守在家中不出，之後一直在樓上留意我，見我被傲因轟出廟街，就冒着生命危險趕來救我，讓我免於被其他殭屍分屍。
「多謝我啦，唔係我你死咗好耐。」AV仁說。
「吓話，頭先落樓邊個腳震震，話急到想賴屎？」呂子璇不屑地說：「係多得馬仔殺退啲殭屍，靠你？」
「我邊有賴屎？嗰時係未熱身，熱咗身之後我背住佢跑咗幾遠呀。」AV仁辯解。
「你放咗好多個臭屁，我完全聞到。馬仔，可？」呂子璇向馬仔求問，馬仔一臉面紅說：「嗯，女神你話咩就係咩。」
「女神？馬仔你真係要驗眼。」AV仁說。
他們爭論不休時，只有呂嬸好心扶起我，說：「唔好勉強自己呀。」
「多謝呂嬸，唔會呀。」
「係呢，南門呢？」AV仁忽然說。
我一時說不出話，他們也不再追問。
「係呀，頭先你暈咗，撞爛咗地下一座土廟。而且發現你時，把驅魔劍爛咗啦。」他把斷開了兩截的青冥劍交給我。
「但你手上握住呢舊野，把口係咁口噏噏。」他給了我一枝伸縮魚桿。
魚桿？
剛才不是夢？
我收好魚桿，站起身準備離開。
「喂，你仲要去？」AV仁問。
「當然，我應承過人，同埋呢度係我屋企。」我說。
「韓壬辰。」
他們忽然感動的抱着我，整整一分鐘之後，然後說：「小心呀。」
「知道。」
拜別他們後，我又重新回到廟街，剛才的傷痕竟全部消失不見，奇怪萬分。
此時，廟街比剛才多了一倍的殭屍，成了一隊隊，横列街上，大概深夜臨近日出，這時黑得伸手不見五指，陰森可怕。
你問我怕不怕，我當然非常怕，正如你先前才給一個惡霸打得你滿身是傷，那你怕不怕他？不是怕，是怕得要死！只是越怕就越逼自己面對，我深吸了一口氣，高聲喊道：「喂！」
傲因正站在廟街牌坊上，轉頭過來，眼神充滿驚恐，見我仍站在街上，驚問：「點解，點解你仲未死？」
「梳呀難死咗少少，可能你太細力，下次可以試下大力一啲。」我說。
「韓壬辰，你⋯⋯」牠本是憤怒，後停了一秒，笑說：「你果然係有趣嘅人，點解唔接受加入我哋，接受長生不死？」
「唔使遊說我啦，無用㗎。」
「點解？」
「你唔明，永遠都唔明，因為⋯⋯」
「因為不自由，毋寧死。」
我盡全力地跑，牠甫落地，我已纏上牠身邊，牠先發制人，我左手擋住牠的來爪，右手捉住牠的臂，牠轉手脫開，我們連連交拳數十招，風在我的耳邊颼颼而響，每一拳都快得肉眼難見，我完全是挑戰自己極限，徒手戰了十多回合，我們互捉住大家的手，雙方掙扎不已，勢均力敵。
「大力咗。」牠說。
「可能食咗飯。」我說。
「但係你得一個人，仲要無咗把劍。」牠笑說：「你輸硬。」
「輸你老母。」
「呯」一聲巨響，我用頭猛然撞擊牠的額頭，再來一下、兩下，雙方頭破血流。
「無用㗎。」牠身體的人頭在流動，哀嗚一聲，頓時氣力大增，掙扎開我的手，蓄全力一 拳猛地擊在我的肚，將我打飛。
「唔夠我打，你得一個人，孤身一人，而我⋯⋯背後、體內有好多人。」牠正想上前了結我時，忽然有聲音傳出反駁。
「邊個話佢得自己一個？」
頓時，本來死寂的廟街，湧出無數鬼魂，無頭的鬼、串燒店婆婆、保險鬼一一走出，回復百鬼夜行的都市之貌，數百隻鬼魂嚷叫：「我哋都忍得班屍耐，壬辰，我哋撐你㗎！」
「保護廟街！」
說罷，數百隻野鬼一同撲上，化成煙霧纏擾牠。
此時，鬼婆婆指着我袋中的魚桿，點一點頭。
我掏出魚桿，忽然魚桿搖震，同時地面震動不已，像魚桿有一條無形的魚線穿入地面，我用力一拉，發覺卡住不動。
「咁重嘅，啊！」我花盡吃奶的氣力也拉不出，卡着一點不動，心想死定了之時，AV仁他們卻及時趕到，一同幫手拉桿。
「頂，見你咁嘅樣，我哋都忍唔住幫手。」
「多謝呀。」
說罷四人也一起發力，可是仍然不能拔出，其他鬼魂見狀也上前幫忙。
「一、二，二個半⋯⋯」
「半你老尾，拉啦！三啊！」
齊集廟街眾人和眾鬼的全力，我們終於把一塊巨大的寒冰鉤出，頓時四周變得極為寒冷，如身處北極一般，溫度降至零點。
我手一摸巨冰，立時破裂，冰封裂後現出變成一把劍，那劍一踫便覺寒意入心，久久未平，一會才適應，劍身呈皇室藍色、清徹如鏡、亮麗光滑，有寒氣繞劍身，柄上有細字寫着「易水寒」。
「相傳廟街地下有一舊鎮魂冰，令呢度成為陰氣泉湧處，百鬼棲身地。」婆婆說。
我記得南門好像說過這個傳說。
「頂唔住啦！」忽然眾鬼大叫，他們支撐不住，傲因已闖過他們，來到我們面前。
「去死啦韓壬辰！」傲因大聲吼叫。
牠疾奔而來，我也全力衝去，二人相迎，牠左爪揮來，我揮劍而去，全身墨氣注劍，還是使出南門教的「颯沓流星」，蓄力疾刺，速度快如流星，眼前所有事物都變成光線，廟街的四周於我所經之處都結成冰塊，寒氣衝襲！
「啊！」
冰花六月寒！
「呯」的一聲，牠的爪僅離我的眼球半厘米，但寒冰劍已刺過牠的心臟。
「我唔明⋯⋯」牠問。
「你多人但只係受你強勢威壓所逼，我嘅朋友係真正追求自由嘅人，你唔會明。」
森綠色的屍氣湧噴，無數的鬼魂急忙從牠的身驅竄走，街道上的殭屍也如失去頭腦一樣，面面相覷，一動不動。
這時東方發白，金黃色的煦光灑照廟街，頓感一陣溫暖，我嘆了一口氣，只覺眼前發黑，頭腦發昏，便暈了過去。