廟街有殭屍（已在各大書局上架）: 第三十八章
在小君死後的幾日，AV仁一直消沉不樂，躲在自己的房間，什麼人都不見。
待了一星期後，他終於出房，神情是好一些，黑眼圈極深，如熊貓一樣。
「無事嘛？」我問。
「無。」他說。
「我以為你死咗。」我開玩笑說。
「的確係。」他說：「我都以為自己會死。」
「去食啲嘢？」南門蔚問。
AV仁不說話，看來是對南門蔚心存芥蒂，始終殺小君是由她下手。
我們來到串燒店，婆婆知道AV仁心情不好，送了我們好幾碟雞肉串，又是雞髀又是雞軟骨和啤酒，說我們慢慢坐，這枱是我們的，即使再多人也不做生意，真是說不得的人情味。
AV仁默默地吃著雞肉串，不願多說話。
「你最後講嗰句係真？」我一邊吃着雞串一邊問。
「咩？」
「基。」
他喝了一口啤酒，簡潔回應：「嗯。」
「咁你平時又睇咁多AV？」我問。
「掩飾。一個咁咸濕嘅正常人，無人會懷疑佢係基佬。」他說。
「其實你點解唔可以大方咁認，而家呢個年代都多咗好多人出櫃。」我問。
AV仁的父母是極度保守的人，由細到大都極憎恨同性戀，認為會搞亂社會的家庭價值，作為他們的兒子，當然害怕給人知道，所以他只會裝成一個正常人。
在小學裝成普通的男生樣子；中學為掩耳目去追求女生；長大後故意裝出咸濕的模樣，一句到尾，不想被歧視，為要在這個社會生存。
「咁樣唔會覺得好慘咩？扮到咁攰。」我問，腦海想起當初會面時的一刻，原來都是假裝。
「當唔知社會有病，定我有病嘅時候，我只能夠用呢種方法生存。」他幽幽說道。
「韓壬辰，我諗你上司消失呢單案後，你都係唔好再返工。」南門蔚忽然道。
「點解？」
「點為整死你上司嘅人，好可能都等緊你，特別係之前都咁多人搵緊你。」
「唔會掛。」
「唔信你可以返工，不過後果係點我唔擔保。」
忽然有一位六十歲的老伯站在我們旁邊，身穿道士服，白髮斑斑，長鬢及腰。
「邊位？」我問。
「聚星樓少保拜見南門僕射。」他道。
「僕射咩咩僕射？」我問。
「過嚟。」南門蔚跟他去到一邊聊天。
「南門僕射妳好。」老伯點點頭。
「僕射？」
那個老伯對南門蔚甚為恭敬，像下屬對上司的態度，讓我跟AV仁都大為不解。
「僕射，我諗妳都收到消息。」
「嗯，我知道。」
之前他們竊竊私語，說些什麼我們都不了解。
「咁可能呢件事要麻煩妳，小心。」
「得，你走先。」
「小心。」
他離開後，我們想追問之先，她了解我們的疑惑，兀自說出一切。
「僕射、少保係捉屍工會職級。驅屍工會喺18區都有分區，分區有駐守嘅驅魔師，而我係僕射，比佢高一級。佢嚟搵我係因為長洲近排發生多宗命案，全部都係不尋常嘅屍變，有可能嗰度將會發生社區爆發，更麻煩係，長洲嘅工會驅魔師被殺，係殘殺，所以要搵人入去調查同阻止。」
「喔，咁搵妳組團？」
「嚴格嚟講，係我一個。」
「妳一個？點解？唔係講工會18區都有人咩。」
「雖然18區都有，但係每區驅屍師人數好少，前排仲要忙住捉殮房走屍。」
「但少極都有百幾二百，點會得妳一個。」
「工會並唔係你想像中咁正義同團結，好多派系，事實上，香港出現殭屍，最大力嘅推動者係政府，其次係工會。」
「驅屍工會想殭屍入港？」我問，感到有點不可思議。
「因為工會唔少人覺得，工會唔受人尊重、唔夠重要，係因為太少殭屍，如果爆發災難，咁工會地位就唔同，所以就有啲人一直大力推動工會嘅政府合作。」
我忽然覺得挺心寒，捉屍本來是正義救人的工作，竟變成政治利益的操作。
「竟然為咗利益變成咁。」我感嘆說：「我去！」
「我又去！」AV仁說。
「你哋去又有咩用，今次好危險，我未必保護到你哋。」
「唔使啦，我哋識自己照顧自己，何況無妳喺身邊，萬一啲殭屍上門我哋都係死。」
她不多說話，其實每當她這個表情，就代表我們勝利。
星期日，晚上九時多，我們三個人往長洲出發，開始長洲命案的調查之旅。
「長洲，係一個點嘅地方？」在中環碼頭，買了一碗咖喱魚蛋作晚餐，她有點不習慣，因為平常是串燒店裏渡過晚餐，吃了一口後，她不經意問。
「吓，妳連長洲都無去過？」AV仁吃驚地問，過了幾天後，他跟南門蔚的關係好了不少，雖然還是有一點隔阻。
「無，點解要去？」
「去玩下都有過。」
「無，自細都喺九龍大，油麻地廟街就係我長大嘅地方。而且無客會由長洲搵我，多數會搵返長洲嘅驅魔工會。」
「咁我哋一定要帶妳去玩下，去下張保仔洞或者掃下街，我知道有間炸雞係好好食！」我說。
這時，我望著南門蔚，覺得她這個女生有她的可憐之處，雖然平常冷冰冰，但都是從小訓練她捉鬼捉屍的原因，而且一生除了捉屍就沒有其他興趣，不能像其他女生過普通的吃喝玩樂的生活，想到這裏，不由得心生憐憫之情。
「唔使，我哋今次去係做嘢。」她一口拒絕。
這種感情很快就消失。