廟街有殭屍（已在各大書局上架）: 第三十七章

「發生咩事⋯⋯」我不可思議地望着自己的手，沒想到會做出這樣的事。
 
「你⋯⋯你頭先唔知點解好似中咗邪咁，好似南門蔚幫你解咗幻覺。」AV仁說。
 
 
「走呀。」南門蔚道。
 
沒搞清楚狀況，南門蔚袋中拿出十張黃符，飛在空中，連爆數十個冰寒的霧氣，一時掩蓋我們，我們得以順勢躲進其中一間空房。
 
「頭先⋯⋯」我問。




 
「黃殭應該無能力可以令人中幻覺，殭屍之中都好少會有，但頭先佢的確控制咗你，到底係咩事？」南門蔚問。
 
「我⋯⋯我自己都唔係好明。」我說：「我頭先見到我屋企，又諗返起啲唔開心嘅嘢。」
 
南門蔚大概見我思愁，就說：「唔緊要，之後再慢慢講。」
 
「咁而家點算？」AV仁不停抹汗，手心發抖地問：「佢仲喺出面，我哋走又走唔到。」
 
「未了解佢所有能力前，唔好亂出去，今日唔適宜同佢打，因為有你哋兩個喺度，如果又控制你哋就麻煩，我好難唔傷害你哋又保住你哋兩個。」她說。




 
「所以⋯⋯？」AV問，看得出他已非常緊張。
 
「等佢走。」南門蔚說。
 
只聽到室外傳來踏踏的腳步聲，越來越接近，一致有序的踏踏聲亂人心神，煩得心縮不寧，每一步都驚心動魄，深怕牠會進來發現我們。我們面面相覻，各人都不敢說什麼，屏息靜氣，連稍為大一口氣也不敢透，害怕發出丁點聲音，我和AV仁直接雙手掩口。
 
這次的敵人完全不同。
 
「踏⋯⋯」




 
雖是一分鐘，卻是人生最長最煎熬的數十秒，像是過了數百年，終於聲音漸遠，我們鬆了一口氣時，忽然外面傳來熟悉的聲音。
 
「AV仁！」

「AV仁！」
 
這把熟悉的聲音⋯⋯
 
過了數秒，我終於認清這聲音是誰，不禁一凜，而AV仁更是面青口唇白。
 
是小君的聲音。
 
「死啦⋯⋯點解佢會喺度？」
 




AV仁完全不顧什麼危險，直接衝了出去，左右顧盼，卻沒有人在。倏地樓上傳來小君的慘叫聲，他發瘋般聽不到我們說什麼，直接往聲源奔去，我們只好緊已隨之，剛到樓上，就見小君一面難受，那隻唐服黃殭剛好咬在小君的頸項，血管盡現。
 
「今晚吸夠血，講咗只會有一個人死，下次再同你哋玩。」唐服黃殭推開小君，抹一抹嘴上的血，就跳出大樓，消失在黑暗之中。
 
 
「小君！」
 
小君此時青筋盡現，跪在地上，動彈不能，AV仁立時衝去抱住她。
 
「對唔住⋯⋯我發你脾氣，之後好後悔好想即刻同你講對唔住，但你唔喺屋企，問咗呂嬸佢哋話你嚟咗呢度，我先跟嚟⋯⋯。」小君有氣無力地道。
 
「唔好講呢啲住，南門蔚妳快啲救下佢呀！」AV仁緊張說。

 南門蔚搖搖頭，示意這是不可能的事。
 




「靠佢自己，但大部分人都無可能抵擋屍氣，最終都會失去自由意志，變成殭屍。」她說。
 
「其實你係咪唔鍾意我？」小君問，此時她已經一隻眼變成全白，成乳白色，口中漸漸長出尖牙。
 
「唔係⋯⋯唔係⋯⋯」AV仁見狀，已經不斷流淚。
 
「咁點解？」
 
「我根本唔係鍾意女人！我根本唔係鍾意女人⋯⋯對唔住⋯⋯我只係好鍾意妳呢個朋友。」AV仁說。
 
此話一出，我們無不震驚。
 
「喔⋯⋯就好，對唔住，原來係咁。」小君釋懷地道。
 
她另一隻眼都開始呈現白色，快要完成殭化。




 
「唔好殺佢⋯⋯做殭屍都無乜唔好啫⋯⋯」AV仁對南門蔚說。
 
「人變咗殭屍係最悲慘嘅事，控制唔到想吸人血嘅天性，變成一種殺人生物，而且長生不死嗰種孤獨，你唔會明。最可怕係會受上頭殭屍控制，做好多自己未必想做嘅事，無個人自由，唔好為咗一己感情，害佢終生。」南門蔚說。
 
我嘗試拉開他，但他死扯住小君不開。
 
「唔好，佢已經好慘⋯⋯」AV仁說。
 
「你都記得呂嬸老公都係咁，大家要識放手！」我說。
 
他還是不放。
 
「我明小君好慘，所以我會俾她去得無痛苦。」南門蔚道。
 




最終我花盡氣力拉開他，他仰天大叫一聲，南門蔚合上雙手，在她的面前畫了一個十架。
 
「希望妳安息。」
 
符貼在她的頭上，屍氣如煙霧漸散，把靈魂也帶走了，一去不回。
 
「有生必有死，早終非命促。
昨暮同爲人，今旦在鬼錄。
魂氣散何之，枯形寄空木。
親戚或餘悲，他人亦已歌。
死去何所道，託體同山阿。」