廟街有殭屍（已在各大書局上架）: 第二十五章

事件擺平，第二日如常的出殯禮，在火葬場時，呂嬸遲遲未按火化掣，呂子璇見狀，上前抱住呂嬸，二人一同按掣，將呂生的屍火化。
 
人火化後，只餘下不多的骨灰，只有一百多克。
 
在海撒的時候，灰通過一條長長的管道進入大海，融入大自然當中。
 
撒灰禮那天，南門蔚要開檔，所以沒有來，只有我跟AV仁出席了。
 
在灰入大海後，所有事都成了。回程之際，我望著大海發呆，呂子璇走近來。
 




「多謝你，我同媽媽嘅關係好返好多⋯⋯」
 
其實她不發脾氣時是挺漂亮的。
 
「你明就好啦，其實呂嬸好錫妳，唔好再做啲嘢去激佢或者令佢傷心，潔身自愛一啲。」
 
「我唔會㗎啦，不過無錢點得，除非你養我啦。」
 
「吓，」我被她這番言論嚇得心跳加速，說：「妳有手有腳做其他嘢都得啦，使鬼我養咩。」
 




「你鬧完我唔負責㗎？」
 
「我哋差咁多年，咪玩啦，我唔係妳啲客。」
 
「你嫌棄我呀？」
 
「咁又無。」
 
「咁得啦，你養我。」
 




解決完一個問題，另一個又油然而生，我快被她煩死。
 
此時，破浪聲劃然而止，一隻大渡輪船經過我們。
 
「妳覺唔覺得有啲奇怪。」我問。
 
「你唔好諗住扯開話題喎。」呂子璇說。
 
「唔係呀，頭先經過我哋隻船嗰度嗰啲人好似全部都無精神，似鬼咁樣。」我說。
 
「隻船去邊㗎？」
 
「呢個方向好似去長洲。」
 
當時我們仍未知道，一場巨大的暴風雨即將來臨。