廟街有殭屍（已在各大書局上架）: 第二十六章

自從那件事後，我就被一隻鬼一直纏住，那隻鬼叫呂子璇。
 
「喂呀，你又話帶人去迪士尼公園。」在屋企的廁所，我正擦着牙的時候，她就在我耳邊「嗡嗡」叫，好像一隻煩人又打不死的蚊子。
 
「@$@$@%（*Q@%*@%」（刷牙聲翻譯：我幾時有講過呀大姐？）
 
「有呀，你發夢嘅時候有講過。」
 
漱了個口後，我說：「喔咁易辦啦，咁妳搵返夢入面嗰個我負責咪得囉。」
 


「而家人哋瞓唔返啦，要你負責。」
 
「我真係負責唔起。」
 
說實話我明白她這樣只是少女青春期妄思，即是有個人對自己有一點關心就當作偶像。
 
剛好南門蔚經過，我就向她求救。
 
「救命呀師父，幫下我啦。」
 


她冷眼地道：「點解？我對你哋之間無興趣。」
 
「吓。」我捉住她的手說：「妳唔係咁絕情呀嘛？」
 
「係。」南門蔚一下就掙開我的手，回到自己的房間。
 
這下子到呂子璇捉住我的手不放。
 
「嚟啦，我哋去玩啦，一係去海馬公園，我想玩鬼屋好耐！有個妙齡少女陪你呀，你應該開心！」她說道，一邊拉着我，我拖着她由廁所回到大廳。
 


「呂嬸早晨。」呂嬸剛從廚房出來，我就像發現救星一樣撲向她。
 
「媽⋯⋯早。」呂子璇開始變得對呂嬸有禮，不過仍是適應階段，雙方都有點不習慣。
 
「呂嬸⋯⋯不如你帶子璇去公園玩下，你哋兩母女應該好耐無去。」我進諫道。
 
「但我要返工，不如壬辰你幫我帶佢去玩？順便同佢解下悶，最多呂嬸出錢。」
 
「好Yeah，多謝阿媽！」
 
「呂嬸，唔係呢個問題⋯⋯」
 
但呂嬸開到口，我也不好推拒。
 
幸好的是，我捕到正要出門口的AV仁，幾番哀求下，他便跟我一起去，他還帶來一位新朋友叫小君。我們四個人便開始海馬公園之旅。


 
我有五六年沒來過海馬，大概是中學之後就沒有，感覺許多事物都變了，變得不一樣，我們第一步就參觀水族館，子璇全程都像一個剛接觸世面的小女孩，看見新事物就會一直都在哇哇大叫。
 
「呢個咩嚟㗎？」
 
「喂！你睇下條魚好大。」
 
新的水族館相對我以前小時候參觀那一個，是翻新過，但沒有從前的落地大玻璃，是看魚看得不夠愉快，不過我仍喜歡在這種置身海底世界的感覺，安舒寧靜，如一條魚在海中自由自在暢游。
 
小君相對於子璇，則安靜得多，好像一個乖乖女，只默默地伴在AV仁身邊，細聲談笑，有氣質得多。
 
畢竟子璇是個青春少女。
 
「對唔住，呢隻人好煩，會唔會嘈到妳？」我問小君。
 


「唔會呀，子璇妹妹好得意。」
 
她伸一伸脷，對我做鬼臉說：「聽到未呀，人哋都話我得意。」
 
「叻啦你。」
 
「咦。」AV仁忽然指着前面，說：「嗰個咁熟口面？」
 
她今天穿了淡紅色連身裙，是南門蔚。