廟街有殭屍（已在各大書局上架）: 第二十四章

「極有可能。」她說。
 
AV仁一直在逗喪禮的女賓客說話，見我們竊竊私語，便湊過來問：「你哋傾緊咩？」
 
「無，你估你有無方法問到，究竟呢度嘅人邊個負責呂生條屍？ 發生過咩事？」我問。
 
AV仁的交際的段一直比我們優勝，這個由他去做自然最好。
 
「無問題。」
 




過了一會，AV仁已經打通殯儀館的天地線，回來說：「有個叫財叔嘅話，佢有負責睇住下面個雪房，不過無乜特別，無人點過條屍，係打咗防腐啫。」
 
「防腐？」
 
「殯儀館係咪都鍾意叫人打防腐去呃錢㗎啦，但嗰日負責開防腐嘅鳳姐有事，變咗一個著黑衫嘅男人嚟。」
 
我跟南門蔚面面相覷，我問：「係咪著黑色大衣，戴黑超？」
 
「咁呢層我又唔知啦。」
 




「瞻仰遺容之後再睇下點，我唔希望呂嬸佢哋又受第二次喪夫之痛。」
 
「妳都幾有感情。同妳外表好唔一樣。」
 
「收聲。」
 
到了瞻仰遺容，我們各人魚貫地進入瞻仰室，出來後，我對她說：「好似都無乜嘢啫，個樣都係差唔多。」
 
她卻神色沉重地說：「呂生已經屍變緊，要有心理準備。」
 




我們陪伴呂嬸守夜，呂嬸一邊摺衣紙，一邊細訴她跟丈夫當年的感情。
 
早在一旁聽著的呂子璇，站了起來，一面不快，眼睛通紅地說：「如果妳真係咁愛佢，就唔會喺佢最需要妳嘅時候離開佢啦。」
 
她這樣的反應倒是平常，因為呂嬸不想打破她對父親的幻想，她自然不解父母離異的原因，只是這樣卻苦了呂嬸，一直成為罪人。
 
「呂嬸。」我想說話，呂嬸卻示意我不要。
 
呂子璇一下就跑入瞻仰室。
 
過了一會，就傳出她的呼叫聲，我們立即衝入室內，只見呂生整個屍已經站了起來，成為一具殭屍。
 
呂嬸見狀，幾乎暈倒，驚問：「點解⋯⋯會未死⋯⋯」
 
AV仁更是吃驚地叫：「咁⋯⋯咁激？」




 
「殭屍。」南門蔚說，話語間已經從袋中拿出劍。
 
「殭屍？電視入面嗰啲長生不死嘅殭屍？」呂嬸問。
 
「係，都中中地。」我說。
 
這時，我無意中瞥見呂子璇的樣子起了變化，眼神仿佛由悲傷變成盼望。
 
「呂嬸，對唔住，本來都想呢件事係我估錯，但而家佢變成殭屍，就一定要收咗佢。」南門蔚說。
 
呂生的臉已由青色變成漸白，眼睛是灰白，看來是一隻白殭。他由迷迷糊糊之中，逐漸甦醒，回復意識。
 
「老婆⋯⋯女⋯⋯」牠深情地道。
 




「呂嬸，佢係殭屍。」南門蔚說：「唔好心軟。」
 
呂嬸掙扎不已，最後痛苦地道：「好，我明。」
 
南門蔚欲上前一劍了斷他時，卻忽然被呂子璇一下抱著不放，纏住她的手。
 
「對唔住！唔好傷害我爸爸⋯⋯佢係我爸爸嚟⋯⋯」呂子璇說道。
 
「你爸爸死咗，佢只係怪物。」南門蔚說。
 
「唔係㗎！」
 
呂子璇死纏不放，呂生見有機會，一下就跑了出去，破窗而出，逃之夭夭。
 
我們各人衝出去追，去到殯儀館門前，只見空無一人，沒有牠的足跡，不知去向。




 
「一日最衰都係我啦，累到佢無老豆，而家仲⋯⋯唔知點解搞到佢變咗隻殭屍出咗嚟。」
 
「呂嬸，呢啲嘢邊有得怪自己，不過妳都唔好過份偉大，保護得太多，隱瞞得太多，搞到妳個女唔明白妳，反而疏遠妳同佢嘅關係。」我說。
 
「係呀，咁樣好可惜㗎，佢會終身都會唔認妳，而家嘅關係先最重要。」AV仁幫口說。
 
說到這裏，呂嬸終於意識自己或許有點地方做得不好，太偉大不是一件好事。
 
「咪住。」南門蔚突然剎停，AV仁一個鼻子撞了上去。
 
「嘩，撞死我咩？」AV摸摸鼻子道。
 
「做咩事？唔係追緊殭屍㗎咩？」
 




「係⋯⋯不過我覺得⋯⋯佢唔喺度，無晒屍氣。」
 
「咁會喺邊？」我問。
 
「死！」
 
她回頭就跑，我們都不明其因，只好跟著她身後，結果又回到殯儀館。
 
「做咩？佢唔係走咗㗎咩？」
 
回到靈堂，只見呂子璇驚慌地轉身，見到是我們更是吃了一驚。
 
「子璇，殭屍有無返過嚟？」南門蔚問，同時小心翼翼地踏前。
 
「無⋯⋯」子璇回答。
 
「真話呢？」
 
「真係無呀！」她激動地說。
 
「妳知佢係殭屍嚟，係會咬人同害人，佢已經唔係你爸爸。」南門蔚繼續緩步向前說，左手掏出劍柄。
 
「璇，妳咪講真話囉。」
 
「收聲呀，如果唔係妳，我哋點會變成咁？」
 
此時南門蔚貼上白符在牆，紅光一閃，變成一張土黃色的符，一陣似電流之物傳入房間。
 
不多時，呂生又再彈出，南門蔚上前欲收，但被呂子璇擋所在前。
 
「唔好殺佢呀！佢係我爸爸嚟，最後一個錫我嘅人！」她說。
 
「唔係，錫你嘅人有好多，包括我哋，同你媽媽呀。」AV仁說。
 
「痴線，亂講！我媽咪點會理我，係佢離開老豆先！」她搖頭道：「殭屍又點，都係我爸爸⋯⋯」
 
南門蔚輕聲說：「我強行收咗佢。」我大叫不好，說：「咁可能大家都受傷，畀次機會我。」
 
「喂呂子璇，點解妳唔識調轉諗，係妳媽媽為咗妳先離開妳爸爸？」
 
「咩意思？」
 
「有時唔係一段婚姻強行一齊就叫幸福，係妳媽媽為咗妳，先唔離婚，同時亦係為咗妳先離婚，其實最傷係佢，妳又有無諗過？」
 
她終於冷靜過來，眼神漸漸動搖。
 
「當年係妳爸爸太爛賭，妳媽媽為咗妳先離婚。」
 
「真？」她望向呂嬸。
 
呂嬸點點頭，緊張地說：「過返嚟啦！」
 
「點解唔講⋯⋯」
 
「因為妳心目中，爸爸係最好嘛，我唔想破壞佢。」
 
「⋯⋯」
 
「過返嚟啦！」
 
她想走時，卻被背後呂生一手捉住，呂嬸不顧危險衝了上前，用身軀護著她，正是呂生發瘋要咬呂嬸時，在危急存亡之秋，南門蔚急拋了一把劍給我，我接過後，有點不知所措。
 
「墨氣。」她提醒。
 
「緣督以為經。以墨入氣。」
 
我心中只想著這兩句，運氣入劍，劍柄伸出血紅色的劍色，頓時我的眼睛一熱，只見呂生身上有著的不同流動中的綠色紋理，如同透視中的血管一樣浮動。
 
我順著綠色紋理最深的地方，一劍疾刺入呂生的胸口，森綠氣的屍氣沿傷口傾出，牠的眼睛終於變回黑色。
 
「對唔住呀⋯⋯老婆⋯⋯對唔住呀⋯⋯女⋯⋯我到死前都係傷害到你哋，好對唔住⋯⋯」
 
「唔緊要呀⋯⋯唔緊要⋯⋯」呂嬸已經哭成淚人，眼淚和鼻水混成一體，完全分不清。
 
「究竟結婚有咩意義。」南門蔚問。
 
「咁唔係每一對夫婦都失敗嘅。」我說。
 
這晚，殯儀館出現一具乾屍，他們還以為是自己冷氣房導致呂生變成這樣，想向呂嬸賠一筆錢，呂嬸當然推卻了。