廟街有殭屍（已在各大書局上架）: 第十九章

定睛一看，正是兩隻穿醫院病人的白殭，突門而入，它們看我們在此，順勢撲向我們，張口露出變尖牙利齒，舉頭就咬。
 
「嘩嘩嘩。」我嚇得回頭倒後。
 
南門蔚反應迅速，雙手夾住兩張紅符，同時往牠們的額頭貼去，符文亮光時，蘇盈卻衝過來，大喊：「唔好呀！佢哋係救小麗嘅希望嚟！」
 
「佢哋唔係。」南門蔚道。
 
「變咗小麗做殭屍就會有用咩？」我說。
 




「我淨係知唔可以無咗佢⋯⋯」
 
「盈姐，」南門蔚說：「生離死別係每個人都要經歷嘅事，即使小麗好後生都好，死咗就係死咗，雖然我知道係好痛，就係好似有人格硬抽走你生命中嘅一部分，但⋯⋯現實就係無得返轉頭，生命就係咁無常，我應承妳，會搵兇手出嚟，但希望妳都放低，因為小麗變咗殭屍，只會害佢一生。佢唔會咁因為復活咗就快樂。」
 
蘇盈哭得死來活去，小麗在旁安慰她。
 
「媽媽⋯⋯」
 
蘇盈一怔，緩緩抬頭望著她。
 




「唔緊要㗎，小麗唔緊要。」
 
南門蔚再次按手在符上，兩隻殭屍被無名之火燒成灰燼。
 
「安息。」
 
隔了好一段時間，我們出席了小麗的喪禮。
 
蘇盈面色已經比之前好，起碼是紅潤不少，而小麗也離開這個世界，南門蔚說這是對小麗最好，留在人間只會害她。
 




火葬後，蘇盈對我們點點頭道謝：「多謝你哋嚟送佢最後一程。」
 
「妳而家好啲嗎？」我問。
 
「嗯，我會搵一份新工，好好再開始，泰國嗰邊有個同事話想我過去幫佢，應該係新開始。」她說。
 
「我哋都會嚟探妳。」我說。
 
「記得嚟搵我呀。」她說。
 
「一定。」南門蔚說。
 
三人互相擁抱，就道別盈蘇。
 
「點解有啲鬼可以留喺人間，有啲唔得？」離開火葬場時，我問。




 
 
「被害嘅鬼，好容易積怨，即使今日唔會，之後都可能會，就會變成地縛靈。而無變、可以留喺人間，都未必一定好。」
 
「點解？」
 
「因為佢哋有心事未了。」
 
「咁妳係咪有心事未了，我嗰時見妳講到好感同身受。 」
 
「關你咩事。」她說完這句，就不再跟我說話。