廟街有殭屍（已在各大書局上架）: 第十八章

「我嘅真樣⋯⋯就係咁。」她說。
 
我嚇得退後幾步，從未見過如此嚇人的相貌，說：「妳⋯⋯妳係鬼？」
 
「小麗！」
 
這時，盈蘇已經衝過來，擋在小麗的身前。
 
「我唔明⋯⋯」我說。
 




「你仲唔明？頭先一切都係呃我哋。」南門蔚說。
 
「呃我哋？係幾時開始？」我問。
 
盈蘇面有慚色地道：「對唔住⋯⋯我都唔想，但為咗佢嘅復活⋯⋯」
 
南門蔚說：「由一開始佢話有個奇怪客人已經係大話。殭屍唔會有性慾，即使變異緊都係。所以根本無呢件事，妳只係想呃我哋上嚟，係咪？」
 
她咧嘴不語，等同默認一切。
 




「點解要呃我哋上嚟？」我問。
 
「唔係呃⋯⋯唔係呃㗎，唔關我事，係有個男人要搵你哋，佢話⋯⋯佢可以幫到小麗⋯⋯但條件係⋯⋯要幫你哋上嚟，只係需要搵你哋上嚟咁就可以復活小麗。」她捉住我們的腿說：「求下你哋唔好走，小麗⋯⋯佢就會可以返生⋯⋯」
 
 
小麗原本只是一個天真無邪的孩子。
 
「盈姐你返嚟啦。」
 
每日黃昏放學回家，她都會一個人到街市買菜，煮好飯等蘇盈回來。




 
「嘩，好香喎，今晚有咩？」剛進門口的盈蘇也聞到香噴噴的食物味。
 
「係你最鍾意嘅豉汁蒸排骨！」
 
「叻女。」她摸摸小麗的頭。
 
小麗從不需要她勞氣，自動自覺做完所有家務、功課，兩個人雖是被社會歧視的一對，卻樂得自在，有對方在生命中便足夠。
 
盈蘇一邊看小麗的功課，一邊吃她整的排骨，她一直默默地為小麗儲錢，準備將來供她讀書。
 
「盈姐⋯⋯今日呢，放學嘅時候，我見到一個黑衫嘅男人。」
 
「黑衫嘅男人？無乜嘢呀，每日都好多著黑衫嘅人。」
 




「但佢好奇怪，全身都黑色衫，仲有戴住黑色眼鏡，一直望住我。」
 
「喔？喺邊？」
 
「學校門口，不過跟咗我一陣就無啦。」
 
「可能咁啱⋯⋯妳有事再同我講，等我去接你。」盈蘇內心也有種種不安感。
 
「好。」
 
到了第二天放學，門口仍是有那個黑衣人。
 
小麗嚇了一驚，轉身入校，想打電話給盈蘇，不過她知道盈蘇工作繁忙，不想勞煩她。
 
「老師，可唔可以陪我行一段路？」




 
學校的陳老師帶小麗過了馬路，走了好一段路，才回校。
 
小麗也放下心頭大石，再不到那個黑衣人。
 
然後當她坐行人天橋的升降機時，入𨋢按掣後，卻感到不安，回頭一看，竟是黑衣人。
 
「啊！」
 
小麗從天橋被扔出出馬路，捲入車底，輾得面容扭曲，整塊頭皮移位到面上。
 
盈蘇一直痛得暈倒入院，她發現小麗的靈魂回到家裏，雖然能重見，但小麗的人生已完。
 
一天在工作時，一個男人來找她，他行為怪異，付了肉金卻沒有什麼行動。
 




「妳想唔想妳個女復活？我可以幫到妳。」他說：「殭屍，長生不老。」
 
她心裏一怔，雖不知道他為何會知道這件事，但還是罵道：「痴線⋯⋯」
 
「妳唔想永遠都見到佢咩？」
 
「咁⋯⋯有咩代價？」
 
「幫我搵韓壬辰出嚟。」他說。
 
蘇盈已經把整件事一一交代。
 
「就係咁⋯⋯佢話搵你出嚟就得⋯⋯」
 
「靈魂離開肉身後，只要再注入屍氣，都只會係活屍，小麗嘅靈魂都係唔會變返人。」南門蔚說。




 
「咩話？」
 
突然有東西破門而出，衝進屋內。