【青春純愛+靈異】收音機裡的情人: 第二十二章：睇穿

「有個男人佢爲咗令老婆有更好嘅生活而努力工作，係就係搵到唔少錢，但係就好少見到老婆，可能一日先講到幾句說話。 

點知，個老婆某一日因爲交通意外過咗身，而呢個男人竟然因爲做嘢而錯過咗見佢老婆嘅最後一面。就當佢悲痛至極，痛恨自己點解以前冇好好同老婆相處，珍惜同佢一齊嘅時光，佢竟然得到陰陽眼嘅能力，仲見到佢老婆喺佢身邊。

正當佢由谷底上翻去谷頂嘅時候，老婆就同佢講多謝佢嘅陪伴，希望佢工作上可以更上一層樓，趁後生快啲搵個第二個，過得快樂，之後就走咗。 明明佢哋兩個係如此深愛住對方，卻一啲都唔了解對方究竟想要啲乜。

老公以爲自己努力工作就係對老婆最好嘅回報，點知老婆其實只需要丈夫嘅陪伴。

當老婆覺得老公只需要自己份工同個伴侶就可以開心嗰陣，佢偏偏唔知道自己先係老公快樂嘅來源。你話喇，呢段關係係咪充滿遺憾？」

大師仍能保持冷酷的外表，卻阻止不了眼眸流露着的絲絲哀傷。

 我也許也能猜到故事的來源了。 

「總之，我想你諗通咗之後就好好溝通下，睇吓你哋想點面對。我宜家去搵翻昕昕，同佢講返成件事先。」 

「妙姐，幫手睇住個細路，叫佢飲埋杯嘢就好上嚟喇！」他匆忙地掏出紙幣放到桌面，便回到大廈。

 「收到！」她回應。





 「喂！細路！煩緊感情事呀？」她過來拿着紙幣，再和我搭訕。

 「我想一個人靜下。」我冷酷的回答。

 「唔緊要，我只不過係好奇有咩細路可以引到呀文佢講返自己嘅往事啫。」她又露出那詭異的微笑。 

「你又知係佢嘅經歷？咁佢又有無加鹽加醋先？」

 「我可以睇穿所有人嘅諗法，包括你。」她把手指放到我的心上，腦海頓時有如被黑客入侵般閃了一下，只是在一秒內已經回復正常。





 「開得鬼餐廳嘅都唔方係正常人啦！更何況我都唔係人。」她這樣說，實在令人更心寒了。

「你哋人類啲情情塔塔嘅嘢真係麻煩，有咩事就三口六面講清楚啦，有咩必要將所有嘢孭嗮晌身啫。」她冷笑着。

 「好唔捨得人，但又覺得佢走先係最好呀？呢啲情節仲老土過我嗰個年代啲嘢喎！」 

「不過我都幾佩服你呢個細路，短短一兩個月嘅時間就可以建立咁深厚嘅感情，果然係同佢前世有啲淵源。我呢個阿婆，閒閒地都過咗幾百年，一兩個月識嘅人算得上係咩。」她掩着口，噗哧的笑着，也許她年輕時也是個優雅的淑女。

「就算我知道我要同佢溝通，但我實質上應該點樣揀先係啱呀？」這個問題纔是關鍵。

「呢個世界邊有分啱定錯㗎！唔同角度睇都會有唔同嘅結果㗎啦！睇下你以前嘅經歷就知道你一定係一個爲人着想，唔理自己諗法嘅人喇。或者你可以試下諗多啲自己呢，呢個世代下下顧住其他人，自己會蝕底㗎！」雖然我欣賞她稱讚我爲人着想，但被她看透心事的感覺始終不好受。

 「人仔細細，就係到扮偉大，扮情聖，得嗰丁朵經歷就已經記住幾年。連自己嘅感受都顧唔到，又點顧人地喎！」 

「你唔好再篤喇！啲檸檬比你篤到爛嗮，飲完實胃痛啦！我免費醒杯新嘅比你！」她強行拿走我還在篤着的檸檬茶，換上另一杯檸檬茶。 





「你慢慢飲，加咗料比你㗎！」她繼續笑着，害我差點把茶噴了出口。 

「唔係嗰啲加料，係加咗啲智慧俾你，唔係我驚你仲係咁蠢嘅話，會諗唔通呀！」她此時已經把笑容換爲恥笑的模樣。 

對着這些長輩，也許我和昕昕的經歷也只是個黃毛小子在無病呻吟而已。