【青春純愛+靈異】收音機裡的情人: 第二十一章：茶餐廳
「誒......好啦好啦。」其實，我也只不過是想自己一個人冷靜一下而已。
我隨着他在越夜越熱鬧的廟街上行走，並往街上一間茶餐廳坐下。
「嘩，妙姐！今日未入黑就咁熱鬧嘅？」他看着空無一人的茶餐廳。
「誒！講呢啲！我個場不嬲熱鬧開㗎啦！你咁講唔驚嚇親隔離個細路㗎？」那個人稱妙姐的中年婦人和藹的對我笑着，令人心寒。
「佢都見慣㗎喇！坐低啦！」我可沒說自己有陰陽眼的呀！
「你坐先啦！」我不敢擅自坐下，生怕自己坐上了其他「人」的位置。
「我都話㗎喇！你唔好嚇呀細佬啦！」妙姐又展露她燦爛但詭異的笑容。 我隨着大師坐下後，只叫了一杯凍檸茶走甜。
「呢到係咪真係好多人㗎！因爲我其實冇陰陽眼........」我也挺好奇自己是否進入了一間鬼魂專用的餐廳。
「呢到係真係好多人㗎，係估唔到你睇唔到鬼，就竟然聽到鬼講嘢，真係唔好彩喇。」他嗤笑着。
「咁你其實有咩要講呀？係都要我嚟呢到。」我下意識地督着檸檬說。
「最主要都係想講下詳細放昕昕出嚟嘅方法，同埋勸下你考慮清楚啫。」
「咁你講啦。」事情好像有點不妥。
「啱啱咪講到怨氣轉移落部收音機到嘅，或者我用執念去代替怨氣啦！總之，要令佢唔好留喺收音機到，就要解除佢轉移咗落收音機嘅執念，譬如係搵到佢點死，然之後令佢釋懷，又或者係同佢做啲佢想做嘅事嚟解除執念。因爲佢似乎有啲ptsd，所以就開啓咗自我保護機制，對於佢點死嘅過程就唔記得嗮。不過，經過我嘅催眠之後，我似乎都有啲頭緒喇。佢就應該好驚佢屋企人，面對住考DSE嘅壓力，之後就唔知點樣食藥自殺。又或者咁問，佢係咪好鍾意玩電結他？」我完全跟不上他的說話。
「你話電結他？係呀！佢好鍾意玩音樂㗎，之前仲好似有夾band。」我其實只聽到他最後這句。
「咁就啱啦！或者成個故事可能係佢要考DSE，屋企人逼佢讀書， 但又想夾band 追夢，所以一時諗唔開自殺？希望我冇估錯啦。」
「都.......合理嘅。佢讀書真係幾叻㗎，嗰時DSE係佢同我一齊溫書嘅。」說到這裏，我也終於明白剛才的對話。
「咁就啱喇！我宜家叫佢諗緊自己有啲咩夢想，有啲咩想做，咁可能做埋呢啲，加埋搵返佢屋企人，加啲心理輔導，佢就可以釋懷呢！」他高興的說。
「咪住！又要滿足夢想，又要釋懷........佢唔係一放完出嚟就要走喇？」我激動得站了起來。
「你唔好咁激動住，聽我講埋先，我宜家就係想問清楚你呢樣嘢。」他表情依舊平靜。
「係人都會激動喇啩！我係想佢自由自在，但無話想佢走喎！咁同驅鬼有咩分別呀？你而家重要收埋我錢！」若不是這裏太多「人」，我早就拍枱質問他了。
「其實將佢放出嚟嘅話， 個鬼魂本身都可以因留喺人間嘅執念選擇升天定唔升天嘅，只不過唔升天嘅話就會彌留喺人間，而佢越執着要留喺人間嘅話，怨氣就會越重，最後仲有機會變成怨鬼，到時就算比人降咗都會永不超生。」
「或者我比啲時間你諗吓。」他續道。 我實在無話可說，只好繼續篤着那片檸檬，骨都骨都的把酸到不行的檸檬茶喝掉。
茶的苦澀，與那酸得灼喉的檸檬味停留在口腔之中，有如自己的心情般糟糕。
按照昕昕的性格，她必定會主動升天，儘早離開我，但我又偏偏想她留在我的身邊，至少一兩年也好吧。
可是，她留在人間太久的話又有機會成爲怨鬼，我可不想她由一個善良的女孩黑化成遺禍人間的惡鬼。
又或者，我們維持現狀，她繼續留在收音機內，一切煩惱都可以煙消雲散？
可我總有一日會沒空閒陪伴她，這也豈不是要她孤獨困在監獄裡幾十年，甚至像其他鬼魂般被困幾百年？
爲何我們只有短短一兩個月的相處已有這麼多的顧慮？難道人和鬼實在這麼難相處嗎？
「我諗通咗㗎喇，爲咗佢好，我應該會放咗佢，由得佢升天，咁樣佢又唔會做怨鬼，又唔使困住喺部收音機到咁孤獨。」
「你真係諗通咗？你真係覺得佢過得好，你就會過得開心，最後會有大團圓結局？」他竟然對我們的私事如此關注。
「你哋一個二個都話爲對方好，但咁樣係咪真係對雙方一個最好嘅結局？你哋唔係應該互相溝通，先可以有個最好嘅決定嘅咩？正如你都對昕昕單方面嘅決定唔感到滿意，咁你係咪應該將心比己，諗吓自己宜家呢個決定又係咪對佢最好？」他語重心長的道出道理。
「但係.......佢應該係咁諗啩.......你而家叫我決定，咁我咪講自己嘅決定囉。」我似是而非的明白他所說的，卻不解自己當刻應該如何實行。
「你識咗佢一兩個月咋嘛，點解會覺得自己好了解佢？我宜家係想叫你諗自己真正嘅諗法，唔係幫佢諗埋。」他此時竟成了個戀愛專家。
「有好多嘢唔係一廂情願就可以解決到㗎。既然你地係情侶，咁唔係應該坦誠向對方講自己嘅諗法，再互相溝通嘅咩？」
「現實並唔係愛情小說，唔係話一味爲對方犧牲就叫做愛㗎喇！愛只不過係人同人之間嘅聯繫，係要互相了解，信任同埋磨合先可以長久㗎！」雖然我都能明白他所說的，但這都只令到我更爲迷茫，不知如何是好。
「唉，或者你地仲後生，唔會明白呢樣嘢，又或者我講個故事比你聽。」