(短故）《二月十四號嗰日，我收到一份情人節禮物》: 18.

除了見面以外，每日打電話把他叫醒已經成為每天的指定動作。

不知由何時開始，他睡不醒的壞習慣令我很看不過眼，於是我便成為了一部人肉鬧鐘。

有時候我根本不用早起，我也會特意起床叫醒他。

因為我比起緊張自己，我更加緊張他的一切。

「你聽日要幾點起身？」這是我每晚睡前對他說的對白。





「八點，聽日要present，一定要醒。」可是他就是那種經常睡到不省人事的人。

「咁我叫醒你啦。」

「你聽日唔係dayoff咩？唔使特登叫我啦。」

「我都想早啲起身做下嘢。」

其實我打算叫醒他後就會倒頭大睡，我根本不會刻意早起工作。





我執意要每天叫他起床，不是為了讓他習慣我，單純是擔心他會因為睡覺而錯過任何一件事，不論是上學或是上班。

結果日復日的習慣變成了我的習慣，可能他不曾依賴過我，而我卻習慣了讓他依賴。

這種生活維持了一段長時間。

除了生活上的依賴之外，我也漸漸地從生活各種事上了解到方天宇的為人。

我們在這段時間經常光顧一間茶餐廳，餐廳的食物其實不太好吃，但是我們一星期幾乎可以在這裡吃掉幾頓飯。





「靚仔靚女，今日食咩呀？」我們來這間餐廳的頻密程度已經令這裡的收銀阿姐認得我們。

「照舊喇。」阿宇的日常是沙嗲牛肉麵和凍奶茶少甜；而我則是雞排意粉和凍奶茶多奶，她都一一記得住了。

「收到！」收銀阿姐豪爽地說，之後打趣地道：「你哋次次食一樣嘅嘢，唔厭㗎咩？」

「食慣咗呀嘛，哈哈。」阿宇笑了笑。

就像我們每天都會和對方吃飯一樣。

「琴晚做咩咁夜唔瞓？」阿宇今天比平時更加晚起床，我們吃的雖然是「早餐」，但已經接近晚上七時了。

「我睇返古龍啲書，一睇就停唔到。」

「係？睇咩？」我對於還有年輕人會看書有點詫異，因為身邊多數的朋友都覺得看書是沉悶的活動，頂多都是看看連登故而已。





「《楚留香傳記》。我好鍾意睇金庸同古龍㗎。」他一臉興奮地說。

老實講，我對於武俠小說興趣不大、認識也很淺薄，於是我出於好奇地問他：「其實我唔係好熟佢哋兩個。每次講起武俠小說，啲人就會將佢哋相提並論，作品上嚟講有咩分別？」

他聽到我的問題後頓了頓，就認真地分析：「我個人咁樣睇喇：金庸就擅長將歷史背景融入佢嘅小說情節到，而且寫人物性格嘅時候都會將啲中國傳統嘅思想滲埋入去。例如佢啲劍俠角色都會係啲正義撚呀、好無敵好打得咁樣，好似天龍八部個喬峰咁。」

我「哦」了一聲，他就繼續講：「至於古龍，我覺得佢寫人性寫得好好。」

「咩意思？」

「我覺得好真情流露囉。佢筆下嘅主角唔會係最完美，總會有啲缺點。而且好多時啲劍俠都係啲浪子，可能成日飲酒又好多女咁樣，但心裡面又有份俠義情懷。」

「你唔講我真係唔知佢哋個寫作特色差咁遠，我成日都分唔清佢哋兩個啲作品。」我尷尬地笑了笑。





「你無睇開，好正常啫。」

「咁你自己鍾意古龍定金庸多啲？」

「各有各好睇嘅，不過我自己好鍾意楚留香。」

「點解？」

「佢似係一個活生生嘅真實人物，好貼地。」

我們聊著聊著，整頓飯的話題就是武俠小說。

吃過飯之後，我們慢慢散步到餐廳附近的一個小公園。

這裡可以看到九龍一部分的景色，傍晚時分總是一片紫紅。





他望著風景點起煙，我就這樣看著他。

「我可唔可以話，佢係一個風流嘅豪俠義士？」

「絕對係喇。」

雖然我本來很少接觸這類文學作品，但聽他說又覺得挺有趣；而且一個人的閱讀口味某程度也反映了他的內心世界。

我想他喜歡楚留香，大概因為他也在楚留香身上找到自己的影子。