［真人真事改篇］《有一種鍾意，係我鍾意你鍾意我。》/《初戀1000天》: 第十五章上 「ASSO仔就站一邊　談何奮鬥踏入界線」 〈COME ON JAMES〉

https://www.youtube.com/watch?v=SvEi8pnRcKs&ab_channel=%E6%8C%BD%E6%AD%8C%E4%B9%8B%E8%81%B2
第十五章上
  
        由那天開始，Jessie就經常到自修室和Jonathan、Joey等他們一起溫習。也許是有他們在身邊鞭策自己的關係，Jessie的溫習效率竟提升了不少。不過，即使已盡所能把所有時間花在溫習上，還是會覺得時間不夠用，總祈望時間能過得慢點，能多偷點溫習的時間就好了。
        然而，現實總與期望相反，愈是想要抓緊的事便愈是遙不可及，時間一下子就來到了開考的日子，第一科應考的筆試便是中文，接着是英文、數學和通識。
        還未反應過來，主科竟已全部考完了。
        雖然還未考完，可考完通識這天，Jessie還是忍不住約了多日不見的James一起吃午餐。James起初不太願意，怕會阻礙隔不到兩天便要應考選修科的Jessie溫習，可當Jessie搬出那句：「算囉咁。」James便馬上投降了。
        「點呀？今日份卷你識唔識做？」Jessie一看到James便興奮地摟着他的手臂問道。
        「算係識掛？」




        「咩叫算係識，識就識，唔識就唔識架啦。」
        「咁我答完無例子算唔算識？不過我有聽你講，唔識都吹落去，所以最少都應該有3掛？」
        3咋？Jessie心想，目標是奪星的她沒想過對她而言最簡單的通識，他竟也只能拿Level 3 這樣的成績。
        「數學呢？你幾乎日日都Re-quiz，你覺得你會lv.幾？」Jessie問道。
        「4？3？我份MC唔夠時間做。」
        「都叫咗你跟我入Formula架啦。」Jessie剛學會用Formula後，便興致勃勃地打給James，想要拉他出來入替他入Formula，他卻一口拒絕了。
        「你識咩，我依啲叫憑實力，唔用依啲旁門左道嘅方法，OK？」
        「實力，你有咩？」Jessie挖苦道。
        「你講咩呀？」
        「係呀嘛，明明啲Formula就好好用。」Jessie還是覺得James應該聽她的話，出來自修室學Formula，那就不會不夠時間做了。接着，她又問道：              「咁你中文同英文呢？」




        「唔知喎，唔記得啦。」
        「大概呢？你覺得你有無Lv.4？」
        「中文可能有掛，英文有3都算係咁。」
        4加3再加4再加3⋯⋯Jessie馬上在心裏盤算了一番，說：「唔係喎，如果你History拎到星嘅話，仲有機會喎！」
        「拎星咁睇得起我呀。」
        「你唔係一早就開始溫啦咩？」
        那不過是James為了堵住Jessie嘴巴說的話，事實上，他一份筆記都還未溫好。
        「但⋯⋯拎星邊有咁易呀。」
        「History，背晒佢咪得囉，得嘅你！最多我陪你一齊溫啦。」
        吓，唔好啦，都無可能拎到星，James心想，連忙找別的話題，說：「不如你講咗你想食咩先呀。」




        「無所謂呀，你鍾意啦。」
        「真係？」
        「咁食M記啦。」
        「但我地之前放學已經成日食M記啦喎。」
        「唔好咩？當重溫下舊回憶囉，以後都唔知仲有無機會再成日一齊食M記。」
        「點會無？入咗U，放咗學都可以一齊去食架。」
        如果我都入到就話姐，James心想。
        「不如我地食牛肉飯？」
        「真係唔食M記？」
        「下次先啦，行啦，過馬路啦。」Jessie牽着James的手往前走，卻沒留意James臉上的表情。
       
        終於，來到了放榜的大日子，這天Jessie一大清早便約了Joey一起吃早餐。
        「你覺得我地入唔入到大學？」Joey看着熱香餅，腦裏想的卻是那張藍色的成績單。
        「入⋯⋯到掛？雖然我好似份份都考衰咗咁⋯⋯」Jessie想起英文聆聽當天，她進了特別室，考中文聆聽那天又在發夢，考數學那天又好像答錯了好幾道題⋯⋯
        「入唔到嘅話點算？你會唔會讀Asso？死啦，會唔會Asso都無得讀，要淪落到讀IVE？」




        「唉，你唔好再講啦，再講我就早餐都食唔落。」Jessie本來已夠緊張，聽到Joey的話更教她感到不安，連忙喝了口熱朱古力奶定驚。
        「萬一真係呢？你會揀Retake定讀住先？唉，真係諗下都淆。」
        「緊係讀住先，我真係無信心可以咁自律。」
        「話時話，你估Jonathan會唔會去外國讀書呀拿？」Joey終於開始吃快不熱了的熱香餅。
        「佢真係決定咗去外國讀書呀？你點知架？」Jessie略為驚訝地問道。
        雖然Jonathan的哥哥和姊姊都在外國讀書，也提過他嚮往外國的生活，但他也說過不捨得這個地方，Jessie便以為他只是說說，沒想到他真的會付諸實行。
        「佢好似申請咗啦，仲收到Conditional offer，但佢仲猶豫緊，仲未決定去唔去。佢就好啦，就算考衰咗都唔洗驚。有錢真係好。」Joey羨慕地說。
        佢真係會去外國讀書？咁咪一年先見到佢一次？Jessie心想。
 
        還未回到學校，離遠Jessie和Joey已看到Andy急忙上了一輛的士。然而，Andy平日的成績也不俗，也是有望能入讀八大，沒想到結果他竟然如此狼狽，嚇得Jessie和Joey也加快腳步回到學校。
        從班主任手上接過成績表，Jessie驚訝得瞪大雙眼，看了好幾遍右下角的名字和地址，直至確定成績表是自己的，才拍着Joey肩膀，問道：「你考成點呀？」
        「哇，我竟然都讀到大學。」Joey驚訝地說。
        「係呀！我見到都勁驚訝！」
        要知道剛才二人還擔憂得幾乎早餐都吃不下，沒想到成績竟比預期的更好，教二人感到難以置信的驚喜。
        而當Joey和Jessie交換成績表看的時候，Joey更是驚訝，說：「哇，一粒，兩粒⋯⋯，咁勁嘅你。」




        「咩呀，高你少少咋嘛，你聽我講做多兩份News cut可能差唔多呢。」
        「哇，你估有無人高過你？」
        「你估Jonathan幾多分？」
        「係喎，仲有Jonathan，唔知佢係邊呢？」
        「去禮堂睇下？」Jessie想起禮堂都是升學擇業的老師，便拿着成績單和Joey一起跑了下去。
       
        「Yes！」K哥拿着成績表，來到James和Lemon的課室，興奮地抓着James的肩膀，說：「你估我幾多分？」
        「有屁快放。」James沒好氣地看着K歌說。
        「我竟然有雙位數呀！我全部都前一晚先笠一笠都有雙位數！」K哥興奮地說。
        「超，我都夠有啦，拎黎睇過，」Lemon一把奪過K哥的成績單，看了看，不屑地說：「得嗰十分仲好意思攞出黎，我大拿拿高你兩分我都未出聲呀。」
        「好心你兩個就唔好係到鬥低分啦。」Hannah看着二人無奈地說。
        「收皮啦，你好高分呀？」Lemon說。
        「唔高，所以我唔會好似你咁，驚死人唔知你地得嗰十分。」Hannah不屑地說。
        「閘住，我唔係十分，佢係姐。」Lemon說。
        「你咁『高分』諗住讀咩呀咁？」班主任眼見Lemon三番四次強調自己的分數，忍不住諷刺一下他。




        「可以讀咩呀，咪又係嗰D，唔係拎1對我黎講已經好高分。」Lemon未拿成績單前已猜到自己的成績，只要夠分讀IVE便已心足矣。
        「咁你諗住讀咩科呀？」班主任問道。
        「未決定呀。」Lemon說。
        「咁你地不如落去禮堂問下啲老師意見啦，唔好係到曬時間啦。」班主任說。
        於是，他們便順着班主任的話，來到禮堂。
        禮堂的人並不多，因為分數不足而又準備不足的，早出了去撲學校；分數低的不少已收到Asso、HD等的Conditional Offer，也不用着急；分數高的更不用說了，唯獨一小群分數高不成、低不就的在問老師意見。
        看到這樣的環境，Lemon突然覺得他們不屬於這裏，因為他們就是早已收到Conditional Offer的低分一族，站在這裏好像成了異類。
        「算啦，我地返去自己睇本升學指南好過。」當Lemon正準備走的時候，Jessie卻走了過來。
        「你考成點呀？」Jessie向James問道。
        「係喎，你幾多分？你啱啱好似無講過喎。」Lemon又一把奪過James的成績表，驚訝地說：「哇，十六分，出貓呀你？」
        這分數在James的朋友堆來說已算是不俗，在Jessie面前卻低分得可以。
        畢竟高和低只是一個相對詞，這並不能代表一切，但卻標示着他和Jessie之間的距離。
        「你呢？」James看着Jessie問道。
        「我夠分入U呀。」Jessie知道James的分數並不高，並不打算把分數說出來。
        「姐係幾多分？」Lemon八卦地問道。




        人地幾分關你咩事姐，反正你一世都唔會考到嗰個分，K哥心想。
        「你幾多分呀？」James也問道。
        「交換啦。」Jessie不想讀出自己的分數，便和James交換了看，Lemon乘機在一旁偷看，小聲地說道：「哇，幾乎係你一個double喎大佬。」
        James對此並不意外，他知道Jessie很聰明，而更重要的是她這次確實很努力，甚至想要把他那份也一併努力。
只是有些事真的不能勉強，他始終不是讀大學的材料，而最重要的是他自己也相信了。
        「邊有咁誇張呀。」Jessie說。
        「咦，Jonathan係嗰度喎，Ken同Angel都係嗰度添，我地去問下佢地考成點囉。」
        「喔，咁我一陣再過黎搵你⋯⋯」Jessie還未和James說完，便被Joey拉了過去。
        那刻的禮堂分成了兩半，高分的在左邊，不夠高分的在另一邊；一邊和老師聊得興高彩烈，另一邊則心急如焚，卻沒有低分的位置。
        James站在禮堂較暗的一隅，看着Jessie、Joey、Jonathan、Angel和Ken他們正交換着成績單來看，臉上盡是笑容，像是在互相道賀，聊着他們的錦繡前程。
        而那裏沒有他們，他不應該出現在Jessie的萬里鵬程。
        「食咗早餐未？去食野？」Jessie問道。
        「Jessie唔係話一陣黎搵你咩？」K哥問道。
        「佢地有排傾啦，我餓啦，食野先啦。」James說完便頭也不回地離開了禮堂，Lemon和K哥緊跟在其後。
        「Jessie真係好勁，竟然可以咁高分，計計下，幾乎係你嘅三倍呀。」Lemon對K哥說，「枉你頭先仲咁開心，你羞唔羞恥呀你？」
        「車，我又唔係要入大學，佢幾多分關我咩事？」K哥毫不在乎地說，「諗下PS4幾時出新Game好過啦。」
        「你啱，一於食返個潭仔賀一賀佢！」
        然而，Jessie那張幾乎是他雙倍分數的成績單不斷在James腦海浮現。
       
        「一個蓄牲墨硯實小勒，一個搞菜青湯，一個個潮美線山小勒，一個大肚匪，三杯凍0勿，仲有毛？」侍應呀姐說。
        「無啦，唔該。」K哥說。
        「喂，唔好咁頹啦，你已經係我地裏面最高分嗰個架啦，你都咁嘅樣，我地點算？」Lemon說。
        James沒有說話，只默默看着他的手機。
        「係，雖然你同Jessie個分係差得有啲完，但Jessie可能唔介意呢。」Lemon再次勸說道。
        「咁又唔係喎，依家唔介意，唔代表將來唔介意。有無聽挽歌之聲首新歌？」K哥問道。
        「咩歌？」Lemon問道。
        「你好彩，我今個月Data仲未用晒，開比你一齊睇。」K哥拿出手機，按進YouTube，搜尋那首剛出不久的〈Come On James〉來，對James說：        「坐埋過黎一齊聽呀。」
        「聽咗啦。」James語氣低沉地說。
        與放榜的日子愈近，不知怎的，James就愈是不斷想起Jessie那天在M記說的那句話：咁你究竟有咩想做呀？
        其實他不知道，若Jessie不問，他甚至想都沒想過。
        從小他就沒甚麼大夢想，父母也對他沒甚麼要求，只要他生生性性，不要行差踏錯便足矣，沒有人告訴過他未來應該怎樣過。
        難道一定要為夢想拼搏那才叫人生嗎？
        也許，這就是他和Jessie的分別：她有夢想，她憧憬更好的未來，而他甚麼都沒有。
        「有無覺得首歌寫緊你地？HKU同IVE仔。」K哥說。
        「凍0勿。」這時侍應呀姐遞上三杯檸蜜。
        「飲你杯凍檸蜜啦，IVE仔。」 James篤着杯裏的檸檬說。