《當全世界都染上唔扑野就會死嘅怪病》: 25

「因為發覺自己需要你囉。」樂兒收起頭先嘅嬉皮笑臉。
 
我方才醒起之前發生係樂兒身上嘅事。
 
「Sorry，之前無出嚟陪你。」我覺得我需要為呢件事道歉，縱使樂兒好似玩緊我咁，但你話佢唔緊張咩？又唔係，佢又無做啲咩十惡不赦嘅事。
 
我為咗咁唔出去陪下佢，一諗起嗰陣時佢無依無靠，要自己一個去面對嘅時候，我就覺得自己唔多唔少都有啲責任。
 
「唔緊要啦。」簡單嘅回覆。
 


又點會咁簡單啊⋯⋯
 
「只係嗰陣時，我⋯⋯我唔想再同你keep住以前嘅關係。」我坦白自己嘅想法。
 
「我知啊，我一直都知我哋想要嘅，完全唔一樣。」樂兒將手環繞背後，一腳一步有節奏咁行起上嚟。
 
「我呢，想要嘅係一瞬間嘅愛情，而唔係永恆嘅感情。」
 
「睇住我呀爸呀媽係我細細個就離婚，係呀嫲面前又驚佢知，扮恩愛，連我都要扮埋一份。」
 


「其實有幾多愛情會一路永恆不變先得㗎？如果係咁，點解唔享愛嗰一剎那嘅美好？」
 
「但你唔同，你一路都想要長長久久嘅愛情，我唔係無察覺到⋯⋯我亦唔係唔理解，相反，我覺得你會唔理解我呢個諗法。」
 
「既然你想講清楚，我都同你講清楚我一路以嚟嘅諗法。」
 
我細心聆聽，同時間又有啲緊張，好似終於知道一直以嚟嘅答案咁，亦唔知會唔會改變啲咩。

「你係我心目中唔一樣，係咁多個男仔入面，唯獨你係一路都會係我身邊。」
 


「你的確唔係啲咩靚仔，又唔高大，但事實就係咁樣發生咗。」唔知樂兒係讚緊我定踩緊我。
 
「我想將愛情停留係最美好嘅時間，因為呢個時間嘅美好，同每一個人都可以。」
 
「同一個人耐咗就算遲下無分手，但始終都會平淡，同埋會返返去熱戀期當初嘅美好咩？」
 
世界嘅荒唐好似已經過咗去，依家真真實實接觸樂兒嘅想法嘅時候，一樣帶俾我唔少衝擊。
 
「如果係咁，我一咪一路keep住呢個熱戀期囉，我係鍾意熱戀期，而唔係鍾意嗰個人，無論邊個都可以。」
 
「你明唔明啊？」好似有種幻覺係樂兒企係我面前，但又望到佢好遙遠咁，老實講，我真係唔係幾理解。
 
但又好似幾撚有道理咁⋯⋯
 
「唔明。」我坦言。


 
樂兒輕輕一笑。
 
「我都估到㗎啦，無乜邊幾個會明白，就算係食開女嘅狗公，佢哋只不過純粹係性慾驅使，真係無邊幾個係鍾意一個時期。」
 
「我淨係鍾意花開嗰一瞬間，之後等待嘅，就係得枯萎。」
 
「你唔會買一大埋枯萎嘅花，但點解咁多人會一直維持枯萎嘅愛情呢？」
 
呢種感覺有啲似層相識，嗰種想反駁，但又唔知點反駁嘅感覺⋯⋯
 
「只要期限一過，我就會頭也不回咁離開，消失係對方嘅世界入面。」
 
「嗰啲無端白事俾你飛嘅男仔真係辛苦。」我曾經就係咁。
 


諗起呢樣就又扯火。

「你咁樣不知不覺間傷害咗唔少人，你自己驚自己受傷害，然後就用呢啲方法保護自己，唔俾自己受傷害，但就係度傷害緊人，我自己就係曾經俾你傷害過嘅嗰一個！」
 
「你咁樣諗，只不過係美化自己嘅自私！」其實我一路以嚟都想屌鳩佢，發洩自己曾經嘅難過，同埋得唔到嘅唔甘心。
 
「我唔係美化，我只係講返我諗緊啲咩，我亦無唔承認自己自私。」
 
「之但係，我都有遇過無因為咁而受傷嘅男仔，反而好似幾enjoy呢段時間，唔知佢係咪都有咁嘅諗法定係睇開咗？想拍散拖？我唔知，總之大家都係好嚟好去。」
 
「唔係每一個都因為我而受傷，如果係咁嘅話，遲早佢都會因為我受傷，長痛不如短痛。」
 
我都分唔清呢啲係歪理定點⋯⋯我都有啲混淆。
 
「但你嘅話，我知你就係嗰類人，加上你同我一齊大，所以連開始都唔好開始，會係最好。」


 
「咁你又同我扑嘢？」我大膽地問。
 
樂兒行過嚟撓起我隻手，靠得好埋，呢種感覺好熟悉。
 
佢細細個就成日都係咁，請我食波餅。
 
「你唔想咩？」挑逗嘅語氣，挑釁嘅表情。
 
根本佢就係同我玩緊心理戰，樂兒好似清楚曬我內心嘅動搖一樣，識得捉到實一實，加以運用。
 
呢個就係我上當，沉船嘅原因。